Петропавл полицейлері 15 күн ішінде 500-ден астам отбасылық жанжалқойды тексерді. “Зорлық-зомбылықсыз 16 күн” акциясы аясында облыс орталығында тұратын бірнеше әйел заң кеңесін алу үшін полицейлерге жүгінді.
– Біз ішімдік ішетін күйеуінен жәбір көрген қала тұрғынын дағдарыс орталығына орналастырдық. Бірнеше жыл бұрын күйеуі оған ауыр дене жарақатын салып, істі болған. Дегенмен бүгінгі күнге дейін әйел жанжалқой жолдасын тастап кете алмаған. Жәбірленушілердің арасында мұндай жағдайлар жиі орын алады. Сондықтан полицейлерге әйелдердің құқықтарын қорғау үшін заңмен қарастырылған механизмдерді насихаттау міндеті жүктелді, – деді Петропавл қалалық полиция басқармасы жергілікті полиция қызметі бөлімінің әйелдерді зорлық-зомбылықтан қорғау жөніндегі тобының аға инспекторы, полиция майоры Әсем Ілиясова.
Акция барысында құқық бұзушыларға қатысты 84 ұйғарым шығарылды.
Нұрбек БАЕКИН,
облыстық полиция департаменті ішкі және сыртқы коммуникациялар бөлімінің инспекторы.