Soltüstık Казахстан
Облыс орталығынан 120 шақырым жерде орналасқан Қызыләскер елді мекенінде 320 адам бар. Олардың үштен бірі – оқушылар. Бұрындары көпбалалы отбасылар некен-саяқ кездессе, қазір олардың саны артуда. Қай тұрғынмен сөйлессең де, ауылдан кеткісі жоқ.
Мен өзім “Қызыләскер” ЖШС-да мотор жөндеуші болып жұмыс істеймін. Серіктестікте 140-тан астам ауыл тұрғыны еңбек етеді. Әсірелеп айтты демессіздер, тұрмысымыз қаладағыдан кем емес. Жалақыдан бөлек, жылына екі рет ынталандыру сыйақысы беріледі. 2018 жылы Валерий Кейсарчук шаруашылық басшылығына кіріскеннен бастап, бірінші кезекте адамдардың өмір сапасын жақсартуға, жастардың тұрақтап қалуына зор көңіл бөлді. Ескірген техниканы жаңалаудың, мал шаруашылығын дамытудың жолдарын тынбай іздестіріп, қаражат салудан тартынбады. Қазір бізде бәрі бар, жұмыс та, баспана да! Ең бастысы, туған жерді өркендетуге деген ықылас ерекше, ынта күшті. Әр аула қосалқы шаруашылықпен айналысып, төрт түлікті көптеп өсіреді. Өйткені мал азығы арзан, құнарлы. Мәселен, құрамажемнің әр тоннасы 20 мың, 35 центер шөп 7,5 мың теңге тұрады. Соңғы кездері облыс орталығынан бес отбасы көшіп келіп, біржола орнықты. Олар үймен қамтамасыз етілді.
Галина Ильяшенко “Қызыләскер” серіктестігінде 2013 жылдан бері жұмыс істейді. Қазір бас бухгалтер. Қаражат қайда, қай салаға жұмсалатынын күні бұрын біліп, хабардар етіп отырады. Орташа айлық жалақы 100 мың теңгеге жетеғабыл. Көктемгі, күзгі дала жұмыстары үшін тиесілі сыйақыдан басқа “онүшінші жалақы” да төленеді.
Ауыл ішіне дейін су құбыры тартылып, 50-ден астам отбасы игілігін көріп отыр. Суық су да, ыстық су да, дәретхана да, жуынатын бөлме де үйлерінде. Серіктестік бұл мәселені өз қаражаты есебінен шешкен. Бүгінде Қызыләскер ауылдық округіне қарасты үш ауыл да (Степное, Раздольное, Қызыләскер) сапалы тіршілік көзімен толық қамтамасыз етілген. 2019 жылы басшылық Меңгесерден Қызыләскерге дейінгі ауданаралық жолды қалпына келтіру мақсатында жобалық-сметалық құжаттамаға тапсырыс берген. Мердігер компания былтыр аяқтауы тиіс еді, бірақ үлгермеді. “Бір жылға қоян терісі де шыдайды” демеуші ме еді? Есесіне былтыр заманауи асхана пайдалануға берілді. Өртенген клуб үйі қайта бой көтерді. Орта мектепті күрделі жөндеуге құжаттар әзір. Волейбол, шағын футбол алаңы, мұз айдыны бар спорт кешені салынбақ. Валерий Ивановичтің ендігі ойы – тауарлы-сүт фермасын тұрғызу. “Ең бастысы, кадр жеткілікті. Бәріміз ортақ мақсат жолына жұмыла кіріссек, алынбайтын асу жоқ”, – дейді іскер басшы.
Ауылдық округте үш медициналық пункт жұмыс істеп тұр. Олардың екеуі “Қазпошта” бөлімшесі сияқты ЖШС ғимараттарында орналасқан және жалға алу ақысынан босатылған. Директор өз кеңсесіндегі бірнеше кабинетті шаштараз бен тігін ательесіне босатып берген. Елді мекенде бұрын балабақша, екі қабатты аурухана, сауықтыру лагері, тұрмыстық қызмет үйі болған. Оларды қалпына келтіру жоспарлануда. Ауылішілік жолдар да ретке келтірілмек. Бастауыш сынып оқушылары тегін тамақтандырылады. Наубайханада пісірілетін салмағы 850 грамдық бөлке нан 90 теңгеден саудаланады. Мал азығы тек жұмысшыларға ғана емес, барлық тұрғындарға таратылады.
Ескі “Кировецтердің” орнын ресейлік “Векторлар” басты. Содан кейін шетелдің егіс кешендері – “CASE” сатып алынды. Өнімділігі жоғары суперкомбайнның біріне бесаспап механизаторлар Александр Князев пен Виктор Згонник иелік етеді. Біреуі түнде, екіншісі күндіз егіс танаптарында астық бастырады. Кондиционер, стерео, “Bluetooth”, “Wi-Fi”… кабина іші осындай озық технологиямен жабдықталған. Жауапты, туған жеріне жанашыр басшының алдымен адамдардың жайын ойлайтыны заңды. “Бірақ берген көмекке арқа сүйеп, соны малданып, жұмыс істегісі келмейтіндер де кездеседі. Олардың намысын қамшылап, ар-ұятын оятып, сөзбен дүрелеп аламыз”, – дейді Валерий Кейсарчук.
Серіктестік бүгінде асыл тұқымды мал шаруашылығымен де шұғылдануда. Өсірілетін қалмақ тұқымдас сиырлар теріскейдің қатал табиғатына шыдамды, суыққа төзімді. Өсімтал, еті дәмді. Болашағы кемел осындай елді мекенде тұру – біз үшін бақыт! Қалаға көшкіміз келмейтіні сондықтан.
Алексей БЕЙ,
Қызыләскер ауылының тұрғыны.
Мамлют ауданы.