Soltüstık Казахстан
Ақан сері атындағы облыстық филармонияда “Татьянин день” атты концерт өтті.
Санитарлық-эпидемиологиялық шаралар сақтала отыра ұйымдастырылған кеште филармония әртістері өнер көрсетті. Алғашқылардың бірі болып Геннадий Брюхановтың жетекшілігімен эстрадалық және джаз музыкасы оркестрі көрермендерді қуантса, “Sensitive” балдық би ансамблі мен Руслан Мұстафиннің орындауындағы тамаша ән көпшілікті ерекше әсерге бөледі. Концертте Дәмеш Құрманкина, Динара және Асхат Таушевтер, Данияр Құстанов, Юлия Стадухина, Медет Ибадуллаев, “Меломикс” тобы, “Туған жер” ансамблі, “Славянки” триосы мен тағы басқалары кеш көрігін қыздырды.
– Бұл біздің жаңа жылдан кейін тамашалаған алғашқы концертіміз. Кеш тамаша өтті. Филармония әртістерінің орындауындағы шығармалар жан дүниемізді баурап, ерекше әсерге бөледі. “Ән көңілдің ажары” дегендей есті әндерді тыңдап, күйбің тірліктен бір сәт демалдық. Алдағы уақытта осындай концерттер ұйымдастырылса, көрермендердің қатарынан табылатын боламын, – деді қала тұрғыны Мәриям Дәрібаева.
Ақмарал ЕСДӘУЛЕТОВА,
“Soltüstık Qazaqstan”.