Soltüstık Казахстан
Петропавл қаласының тұрғыны, зейнеткер Алмагүл Есенбердина өзінің тірі екенін дәлелдеумен әлек болып жүр. Ол белгісіз себептермен мәліметтер базасында өлілер тізіміне еніп кеткен.
– Өлім туралы анықтаманы көргенде не дерімді білмей қалдым. Әлі түсініксіз күйде жүрмін, – дейді Алмагүл Есенбердина. Өзінің “өлгені” туралы ол кездейсоқ білгенін айтады. Жоспарлы отаға дайындалу үшін құжаттарды рәсімдейтін кезде медициналық портал оның тірілер қатарында жоқ екенін айтқан. Ал істің мән-жайын анықтауға кіріскен кезде, мәселе тіптен күрделене түсіпті. “Маған зейнетақы төлеу жөніндегі мемлекеттік орталықтан хабарласып, қаңтар айына зейнетақы жібергенін айтады. Бірақ ақпан айына бере алмаймыз. Өйткені сіз әлі тізімде “өлі” ретінде шығып тұрсыз”, – деген.
Алмагүл өзінің тірі екенін дәлелдеуге тырысып, түрлі инстанциялардың табалдырығын тоздырып жүргеніне бір айға жуық уақыт өтті. Бірақ оған алғашында ешкім мәселенің шешімін айта алмаған. Халыққа қызмет көрсету орталығы да қауқарсыздық танытыпты. “Бізде ХҚКО-дағы бағдарлама біріктірілген. Яғни адам кез келген мемлекеттік қызметті алуға келгенде, мәліметтер түрлі бағдарламалар мен ведомстволардан жүктеледі. Яғни ЖСН-ге қатысты ақпараттарды түзете алмаймыз”, – деп түсіндірді “Азаматтарға арналған үкімет” мемлекеттік корпорациясының халыққа қызмет көрсету бөлімінің басшысы Виталий Кирющенко.
Прокуратура өтініш білдіргеннен кейін ғана оның “өлімі” туралы жазба жойылды. “Екібастұз қаласының АХАТ бөлімі қызметкерінің техникалық қатесіне байланысты Алмагүл Есенбердина 2021 жылғы 21 желтоқсаннан бастап барлық деректер базасында қайтыс болғандар қатарына еніп кеткен. Қазіргі уақытта өлім туралы актілік жазбаның күші жойылды”, – деп хабарлады Петропавл прокуратурасының қызметкері Әмір Рахимов.
Алмагүл Есенбердина құжаттарды реттеймін деп жүріп, күйзелістен денсаулығы күрт нашарлағанын айтады. Енді бір емес, екі күрделі операция қажет. Емделіп шыққан соң тірі адамды “өлілердің” санатына енгізгендерден моральдық шығынды өндіріп алмақ.
Айтолқын КЕҢЕСХАН.