ІЗДЕНІСКЕ ТОЛЫ ЖЫЛДАР ЖЕМІСІ

Soltüstık Казахстан

 Kyzylzhar_akparat@mail.ru

С.Мұқанов атындағы облыстық ғылыми-әмбебап кітапханада журналист-жазушы Жақсыбай Самраттың “Ізденіс жылдары” атты кітабының тұсаукесері өтті. Бұл жинаққа қаламгердің “Egemen Qazaqstan” газетінде жарық көрген мақалалары топтастырылған. Шараға облыс әкімінің орынбасары Ғани Нығыметов, зиялы қауым өкілдері мен оқырмандар қатысты.

Ғани Сақтағанұлы авторға шығар­машылық табыс тілеп, кітаптың оқыр­мандар үшін маңыздылығына тоқ­талды. Облыста руханият сала­сына ерекше көңіл бөлініп, жергілікті ақын-жазушылардың шығарма­шы­лығын насихаттауға бағытталған жұ­мыстар жалғасын табатынын атап өтті.

– Солтүстік Қазақстан облысының әкімдігі жергілікті қаламгерлерді әрдайым қолдап, олардың кітапта­ры­ның жарық көруіне қол ұшын беріп келеді. Зиялы қауыммен тығыз байланыс ешқашан үзілмейді. Бүгінгі іс-шара осының дәлелі деп білемін, – деді әкімнің орынбасары.

Кітап үш бөлімнен тұрады. “Ел қадірін көрген білер” деп аталатын бірінші тарау журналист сапарлаған елдердегі экономикалық ахуал, ұлттық болмыс пен салт-дәстүр және тарихтан сыр шертеді. Еуропа елдеріне, көршілес Қырғызстан, Ар­мения, Өзбекстан мен Түркі­менстан, Моңғолия мен Малайзия, Ресей мен Сирияға жасаған іссапарларында жазғандары топтастырылған.

Кітаптың “Қызықты деректер” деп аталатын екінші бөлімі тарихымыз­дың кейбір ақтаңдақ беттерін ашып, көпшілік біле бермейтін сырларға қанық қылады. Соның ішінде отарлау және ұлтты жаншып-басуға бағыт­тал­ған озбыр саясаттың қалай жүр­гізілгені, оны кімдер басқарғаны және салдары бүкпесіз айтылады. Ал жинақтың үшінші тарауы “Тұрпатты тұлғалар” деп аталады, өз ісімін көзге түскен адамдар туралы танымдық материалдар топтастырылған.

Тұсаукесер рәсіміне қатысқандар жазушы-журналист Жақсыбай Сам­раттың еңбегін жоғары бағалады. Баяндау шеберлігін, қоғамдағы мәсе­лелерді дөп басып көтере білгеніне тоқталды. М.Қозыбаев атындағы СҚУ-дың профессоры, филология ғылымдарының кандидаты Жанар Таласпаева автордың ономастика мәселесін зерттегенін атап өтті.

“Ізденіс жылдары” – Жақсыбай Самраттың жарыққа шыққан он үшінші кітабы. Осыған дейін көркем шығармалары, жеке тұлғалар мен елді мекендер туралы жазғандары жарық көрсе, енді публицистикадағы еңбегін де бөлек жинақ қылып оқыр­манға ұсынып отыр.

Сағындық МАУҒАЗИН,

“Soltüstık Qazaqstan”.

Суретті түсірген

Талғат ТӘНІБАЕВ.