Soltüstık Казахстан
Екі мыңнан астам көлі, 700 мың гектарға жуық орманды алқабы бар өңірде экотуризмді дамытуға мүмкіндік зор. Оның ішінде Шалқар-Имантау курортты аймағының әлеуеті жоғары. Табиғаты көркем бұл жер 2018 жылы республикалық маңызға ие он үздік жоба қатарына енгізілген.
Қазақстан Республикасының туристік саласын дамытудың 2019-2025 жылдарға арналған мемлекеттік бағдарламасы шеңберінде инженерлік және автокөлік инфрақұрылымдарын салу, абаттандыру, маркетинг, жарнамаларды толықтыру жұмыстарын одан әрі кешенді түрде жалғастыру жоспарланған болатын. Жаңғырту тұжырымдамасына “Көкшетау” ұлттық паркі де еніп отыр. Өйткені ұлттық паркке қатысты шешімін табуы тиіс мәселелер баршылық. Әлеуеті зор, тынығуға қолайлы саналатын Шалқар көлінің бойындағы автомобиль жолдарының сапасы сын көтермейді, оның жалпы ұзындығы 17,5 шақырымды қамтиды. Демалыс нысандарының бәріне бірден электр желісі тартылмаған. Жылдамдығы жоғары интернет пен ұялы байланыс та барлық жерде ұстай бермейді.
“Көкшетау” ұлттық паркінің бас директоры Ербол Сағдиевтің сөзінше, паркті дамыту тұжырымдамасы жасалған, биыл жолдарды жобалауға, электр желісін тарту және курортты абаттандыруға кіріспек. Тұжырымдамаға сәйкес кемпингтер, глэмпингтер, эко-қонақүйлер, визит-орталықтар, қарау алаңдары, автокеруендерге арналған тұрақтар, этно ауылдар, сондай-ақ туристік соқпақтар мен маршруттарды танымастай өзгерту мақсатымен инвесторлар тартылмақ.
Бағлан ҚОЖАҚОВ,
журналист.
Айыртау ауданы.