«Soltüstık Qazaqstan»

PDF

МЕДАЛЬ СЫҢҒЫРЫ ЕСТІЛЕР ЕМЕС

Soltüstık Казахстан

 Kyzylzhar_akparat@mail.ru

Қытайда жалауын желбіреткен қысқы Олимпиада ойындары ұлттық құрамамыз үшін сәтсіз басталды. Қазақстандық спортшылардың дені медаль тұрмақ, алғашқы ондыққа да іліге алмай жатыр. Дүбірлі додаға үкілеп қосқан қыз-жігіттеріміз бірінен кейін бірі сүрінуде.

Олимпиаданың алғашқы жарыс күнінде могулшыларымыз бақ сына­ды. Іріктеу кезеңінде Олеся Граур 57.18 ұпаймен 23-ші орынға, Аяулым Әміренова 66.82 ұпаймен 16-шы орынға тұрақтады. Ал Анастасия Го­родко жарысты аяқтай алмады. Екін­ші кезеңде Аяулым Әміренова мен Олеся Граур бірінші іріктеудегі нәти­жесін жақсарта алмай, жарысты сол тұстан аяқтады. 16 жастағы Анаста­сия Городконың финалға өтуіне бір­неше ұпай жетпей қалды. Екінші ірік­теуде ол 11-ші орынмен шектелді. Ко­ронавирусқа байланысты бірінші ірік­теуге қатыса алмаған басты үмітіміз, 2018 жылғы Олимпиаданың қола жүл­дегері Юлия Галышева финалдық кезеңде бақ сынағанымен, супер­финалға берілер жолдама сарапқа салынған кезде сәтсіз өнер көрсетті.

Фристайл-могулдан ерлер ара­сын­дағы бірінші іріктеу сайысында қа­зақстандық спортшылар алғашқы он­дыққа ене алмады. Дмитрий Рейхерд 75.43 ұпаймен 12-ші, Павел Колма­ков 74.09 ұпаймен 17-ші орынды қа­на­ғат тұтты. Екінші іріктеу сайысында осы спорт түрінен Қазақстан құрама­сының көшбасшысы Дмитрий Рей­херд 76,77 ұпаймен сегізінші орынға табан тіреп, финалға бір қадам жет­пей қалды. Ең өкініштісі, 17 жасынан бастап 5 рет қысқы Олимпиадаға қатысқан Рейхерд бұл жолы да сенім үде­сінен шыға алмады. Отандық ма­мандар медаль алады деп топ­шыла­ған еліміздегі үздік спортшылардың бірі, Әлем кубогының күміс жүлдегері Павел Колмаков та елге құр алақан қай­татын болды. Ол екінші іріктеу сайысында 11-ші орын (69,54) алды. Осылайша қа­зақстандық могулшы­ларға Бейжің­де медаль алу бақыты бұйырмады.

Шаңғымен трамплиннен секіру спор­ты бойынша Қазақстан құрама­сы­нан екі спортшы жарыс жолына шықты. Ерлер арасында орташа трам­плинде өткен додаға Сергей Ткаченко мен Данил Васильев қатыс­ты. Бірінші айналымда қос қазақ­стандық атлет те келесі айналымға жолдама алған. Сергей Ткаченко ал­ғашқы жаттығуы үшін 43.1 ұпай алса, Данил Васильев 46.2 ұпайға ие болды. Алайда қос спортшымыз финалдық кезеңге жолдама берер са­йыста 30 спортшының тізімінен тыс қалды. Данил Васильев 46-шы, Сер­гей Ткаченко 41-ші нәтиже көрсетті.

Шаңғымен жарысудан ерлер арасындағы скиатлон 30 шақырымға созылып, жарысқа Қазақстан атынан екі спортшы қатысқан болатын. Виталий Пухкало төрт жыл бұрынғы нәтижесін қайталап, 32-ші орынға тұрақтады. Ол жеңімпаздан 7 минут 35 секундқа қалып қойды. Тағы бір спортшымыз Евгений Величко жа­рыс­ты аяқтай алмады.

Әйелдер арасында скиатлоннан қазақстандықтардан (классикалық стильде 7,5 шақырым, еркін стильде 7,5 шақырым) төрт шаңғышы өнер көрсетті. Ксения Шалыгина 48-ші, Ангелина Шурыга 49-шы, Валерия Тю­ленева 51-ші, Надежда Степаш­кина 58-ші болып мәреге келді. Жарыс жолына барлығы 65 спортшы шыққанын айта кеткен жөн.

Қазақстандық биатлоншы Галина Вишневская-Шепоренко жекелей сында өнер көрсетті. Ол ату кезінде бір рет қателесіп, қорытынды есепте 44-ші орын алды. Осы нәтижесінің арқасында із кесу жарысына жолда­ма алған 60 спортшының қатарына енді. Жарысқа барлығы 86 спортшы қа­тысқанын айта кеткен жөн. Бұл спорт түрі Қазақстанға бұрын медаль сыйлағаны белгілі. 2010 жылы Ванкувердегі Олимпиадада Елена Хрусталева жекелей жарыста күміс медаль алған еді.

Олимпиада ойындарында жүлде­ге шорт-трекшілер ғана бір табан жа­қындап барып тоқтады. Әділ Ғалиах­метов 1500 метр қашықтықта финал­ға өткен. Жартылай финалда қытай­лық спортшы біздің жігітті итеріп жібе­ріп, жазаланған болатын. Төрешілер Әділге финалға жолдама берген, таң­даулы он спортшының арасынан ол мәреге 8-ші болып келді. Шорт-трек­­тен аралас эстафетада бесінші орын алғанымызды да айта кеткен жөн. Біз­дің команда бесінші-алтын­шы орын­дар үшін болған сайыста Ни­дерлан­ды өкілдеріне есе жіберген. Алайда Канада құрамасының жарыс­тан шет­тетілуіне байланысты Нидер­ланды төртінші, Қазақстан бесінші орынға кө­терілді. Команда сапын­да­ғы Абзал Әжіғалиев, Денис Никиша, Ольга Ти­хонова және Яна Ханның әрқай­сысы 10 мың АҚШ долларынан сыйақы алатын болды.

Әйелдер арасында конькимен жү­гіруде Екатерина Айдова мен Надеж­да Морозова жарыс жолына шықты. Морозова 3000 метр қашықтықты 4:04.97 уақытта жүгіріп өтіп, 30 спорт­шының арасынан 13-ші орын алды. Ал 1500 метрге жүгіруде Надежда Морозова 14-ші, Екатерина Айдова 18-ші болып мәре сызығын кесті. Өкінішке қарай, бұл көрсеткіш отан­дастарымыздың жүлдегерлер қата­рынан көрінуіне жеткіліксіз еді.

Қазақстан құрамасының қоржыны әлі бос. Белгілі спорт журналисі Несіп Жү­нісбай қыз-жігіттерімізге енді жүл­де­нің ауылы алыс деп есептейді. “Сенім артқан саңлақтарымыз ә де­геннен сүрінді. Ал олардың ізбасар­ла­рын тәрбиелеп, мықтыларға жол ашуға жауапты мекемелер құлықсыз көрінеді. Қысқы спорттың дамуына жемқорлық пен инфрақұрылымның жоқтығы да тұсау болып тұр. Спорт нысандарын көбірек салу керекпіз. Осындай ірі жарыстан төмен қарап қайтпау үшін талантты спортшы­лар­ды табуымыз керек. Құрығанда, екі жылда бір іріктеу жарыстарын өткізіп тұру керек. Басты жауымыз – парақор­лық. Ол спорт саласында тіпті кең тараған. Қысқы спорт түрлерін шын мәнінде қолға алмасақ, әр төрт жылда миллиардтарды суша ағызып, жерге қарап қайтатын боламыз”, – деп пікір білдірді спорт журналисі.

Сарапшылар Қазақстанда қысқы спорт түрі кенже қалғанын, насихаты төмен екенін жасырмайды. Жан­күйерлер болса төртжылдықтың басты додасына аттанған 34 спорт­шы­ның бойында жеңіске деген жігер байқалмайтынын айтып, сын тезіне алуда. Дайындықтары да осал екені көзге бірден көрінеді. Төмен нәтиже көрсеткен спортшылардың бұл сын­дарға қарсы айтар уәждерін елге кел­ген соң тыңдай жатармыз.

Әділет БАҒЛАНҰЛЫ,

“Soltüstık Qazaqstan”.

Әлеуметтік желілерде бөлісіңіз:

Share on facebook
Facebook
Share on telegram
Telegram
Share on whatsapp
WhatsApp