М.Қозыбаев атындағы Солтүстік Қазақстан университетінде тарих пәнін оқыту мәселелеріне арналған пікір алмасу жиыны өтті. Басқосуға Ш.Уәлиханов атындағы Тарих және этнология институтының ғалымдары, жергілікті университеттің тарих, экономика және құқық факультетінің Қазақстан тарихы және әлеуметтік-гуманитарлық пәндер кафедрасының профессорлық-оқытушылық құрамы, облыс мектептерінің тарих пәнінің мұғалімдері қатысты.
Пікір алмасу алаңында Ш.Уәлиханов атындағы Тарих және этнология институты директорының қоғаммен байланыс жөніндегі орынбасары, тарих ғылымдарының кандидаты Әуезхан Шашаев тарих ғылымының алдында тұрған міндеттер туралы баяндама жасады.
М.Қозыбаев атындағы Солтүстік Қазақстан университеті ректорының кеңесшісі, тарих ғылымдарының докторы Ақмарал Ибраева Саяси қуғын-сүргін құрбандарын толық ақтау жөніндегі өңірлік комиссияның жұмысы жайлы айтып берді.
Саяси қуғын-сүргін құрбандарын толық ақтау жөніндегі мемлекеттік комиссияның мүшесі, Қазақстан халқы Ассамблеясы кафедрасының меңгерушісі, тарих ғылымдарының кандидаты Людмила Гривенная ХХ ғасырдың 20-жылдарындағы көтерілістерді басу кезінде сот шешімінсіз және тергеусіз атылған Саяси қуғын-сүргін құрбандарын ақтау жөніндегі жұмыс туралы баяндады.
Қазақстан тарихы және әлеуметтік-гуманитарлық пәндер кафедрасының меңгерушісі, тарих ғылымдарының кандидаты Нұрболат Әбуов университет пен білім беру ұйымдары арасындағы өзара байланыс, “Дарын” мектеп-лицейінің директоры, педагог-шебер Ерлан Мәкен дарынды балалармен жұмыс істеу мәселелері бойынша өз ойларын ортаға салды.
Диана ХАЛИМОВА,
М. Қозыбаев атындағы СҚУ-дың медиаорталығының бас редакторы.