Аялы алақан

Soltüstık Казахстан

 Kyzylzhar_akparat@mail.ru

Балалық шақ – ұмытылмас сәт, шынайы қуанышты кезең. Кез келген ата-ана ұл-қызының ба­қыт­ты, дені сау болып өскенін қа­лайды. Біздің қоғамда әр бала қам­қорлыққа алынған. Балғын жас­тың қалай өсетініне мемлекет жауапты десе де болады. Мұға­лімдер қауымына да жүктелетін міндеттер қыруар. Белгілі педагог Василий Сухомлинский: “Бала­лар сұлулық, ойын, ертегі, музы­ка, сурет, қиял, шығармашылық әлемінде өмір сүруі керек. Бұл әлем баланы оқуға және жазуға үйретеді. Оның алға қарай талпы­нысы басынан өткеретін білу құ­марлығының алғашқы сатысына көтеріліп, өзін қалай сезінетініне байланысты”, – деген екен.

Ерекше білім беру қажеттілігі бар балаларды тәрбиелеу және оқыту процесінде күнделікті са­бақ­тарының үздіксіздігі мен әр ба­лаға лайықталған арнайы тәсіл­демелерді қолдануы психология­лық-педагогикалық түзету каби­неті жұмыс бағдарының өзегі, тіні болып саналады. Балаға мектепке дейін арнайы мұғалімдерден қа­жетті көмек алатындай және сенімді қадам жасайтындай етіп білім беру мен тәрбиелеу өте ма­ңызды. Мұны психологтың тілі­мен айтқанда “көзге көрінбейтін байланыс” дейді. Екі тарап бір-бі­рінің көңіл күйін қалай сезінеді, айтулы оқиғалар мен құбылыс­тарды қалай қабылдайды – басты сұрақ осы. Мүгедек балғынның жа­нын түсіну, олардың сауал­дарына тиянақты жауап берумен қатар барынша жанашырлық жасау, балалық шақтың бал қызы­ғын сездіре отырып білімге жетелеудің, жақсы дағдыларға үйретудің мәні айрықша.

Түзету кабинетінің мамандары балалармен түзету-дамыту сабақтарын өткізуде бірінші кезекте толыққанды білімін қалыптастыруға ден қойып, танымдық іс-әрекеттері мен шығармашылық қабілеттерін дамытады, өзіне-өзі қызмет көрсету дағдыларына үйретеді. Жүйелі түрде ұйымдасты­рылатын тәрбиелік, танымдық іс-шаралар жеміссіз емес. Балғын­да­рымыз республикалық, облыстық байқауларға қатысып, жүлделі орындарға ие болып жүр.

Кез келген жеткіншекті тәрбиелеп, білім беріп, жақсы адам қатарына қосу – бәріміздің ортақ мін­детіміз. Бала айналасынан, қор­шаған ортадан өзіне деген сүйіспеншілік сезім мен аялы қамқорлықты сезіне білсе, сенімі артып, алға ұмтылады.

Марина ШЕРСТОБИТОВА,

“Психологиялық-педагогикалық түзету кабинеті” КММ-ның жетекшісі.

Жамбыл ауданы.