Soltüstık Казахстан
Кез келген оқушы өз көзқарасын ашық білдіріп, ойындағысын жүзеге асырғысы келсе, саяси белсенді болуы шарт. Оған мектеп парламенті мүмкіндік жасайды. Жақында фракция жетекшілері сайланды. Хабарландыру білім ошағының сайтына және әлеуметтік желіге орналастырылды. Бұдан бөлек, сайлау комиссиясы құрылып, мектеп парламентінің фракциясына кандидаттар ерікті негізде ұсынылды. Үміткерлер өздерінің үгіт-насихат сөздерін дайындап, пікірталас алаңдарында лайықты түрде қорғай білді.
Сайлау жасырын дауыс беру арқылы өтті. Кандидаттардың есімдері жазылған бюллетеньдер арнайы жәшіктерге салынды. Заң бұзушылықтар болмағанын бақылаушылар қадағалады. Дауыс беру қорытындысы бойынша Андрей Судьин – құқық және тәртіп, Дильназ Сәлімжан – ақпарат, Анна Скорик – қамқорлық, Карина Бабинова – мәдениет және өнер, Аделина Саядян – өзін-өзі тану және бақыт, Камила Сәкенова – экология және еңбек, Анжелика Пенкова – пікірсайыс қозғалысы, Әлем Тоқтамыс спорт және салауатты өмір салты фракциясының жетекшісі болып сайланды. Менің ойымша, оқушылар таңдаудан қателескен жоқ.
Біз жасөспірімдердің әлеуметтік жағдайына барынша көңіл бөлінгенін қалаймыз. Жасөспірімдер арасындағы құқық бұзушылықтың алдын алу бойынша жасалған жұмыс жоспарымызға бірқатар идеялар енгізілген. Телефонға телмірген балаларды дебаттық интеллектуалдық ойындарға, волонтерлік шараларға тарту жайы да ойластырылған. Ұсыныстарымызды аудандық мәслихат депутаттары қолдап, жәрдемдесуге уәде берді.
Мектеп жанынан құрылған “Адал ұрпақ” клубының мүшелері тың бастамалардың ұйытқысы болып табылады. Жалпыадамзаттық және ұлттық құндылықтар негізінде тәрбиеленген жас ұрпақ қана аға буын жүктеген жоғары мақсаттарға жете алары анық. Іс-шаралар “Адал және сатылмайтын жас буын” ұранымен өтеді. Мектеп мұражайында “Жемқорлыққа жол жоқ!” картасы орналастырылған. “Транспарентті және есеп беретін мемлекет” бейнероликтер конкурсы, “Сынып жетекшісін сайлау” сюжеттік-рөлдік ойыны, парасаттылық сабақтары, “Біз сыбайлас жемқорлыққа қарсымыз” акциясы, жасөспірімдер инспекторларының қатысуымен “Қоғамдық тәртіп негіздері” пікірталас практикумы өткізілді. Қоғамдық тыңдауларда өскелең ұрпақ үшін тек адал еңбек қана табыстылықтың, жоғары жетістіктердің, білім мен материалдық игіліктің өлшемі болуы тиіс екендігі айтылды.
Аудандық полиция бөлімінің бастамасымен “Жемқорлықсыз өмір” ұранымен өткізілген байқауға жоғары сынып оқушылары белсене қатысты. Сурет салу және эссе жазу аталымдарында Алтынай Шалкенова, Бейнегүл Мағзұмова, Кристина Журавлева жүлдегер атанды. “Адал ұрпақ” клубының жетекшісі облыстық “Парасатты отбасы” байқауына қатысу құрметіне ие болды.
Келешекте “ЮНИСЕФ” еріктілерімен байланыс орнатуды, кибербуллинг, экология тақырыбы бойынша парасаттылық сабақтарын ұйымдастыруды жоспарлап отырмыз. Өзім Білім және ғылым министрлігі жанындағы балалардың құқықтарын қорғау жөніндегі өкілдіктің мүшесімін, “Елбасы медалі” республикалық бағдарламасының қола жүлдегерімін.
Данияр ҚҰДИЯРОВ,
№1 Смирнов орта мектебі мектеп парламентінің президенті.
Аққайың ауданы.