Soltüstık Казахстан
Қытайдың Бейжің қаласында өтіп жатқан XIII қысқы Паралимпиада ойындарында солтүстікқазақстандық спортшы Александр Герлиц құрама қоржынына қола медаль салғанын газетіміздің өткен санында жазғанбыз. Бұл – еліміз егемендік алғаннан бері Қазақстан паралимпиадашылары қол жеткізген үшінші жүлде. 1994 жылы Лиллехаммерде Любовь Воробьева шаңғы спортынан күміс медаль алса, 2018 жылы Оңтүстік Кореяның Пхенчхан қаласында өткен додада шаңғышы Александр Колядин ел тарихында тұңғыш рет жеңімпаз атанған.
Александр Герлиц Бейжіңде парабиатлоннан 10 шақырым қашықтықта сынға түсті. Өкінішке қарай, нысана көздеуде үш рет мүлт кетті. Соның салдарынан жеңімпаздан 1 минут 21 секундқа қалып, мәреге үшінші болып жетті. Бірінші орынды канадалық Марк Аренц алса, екінші орын украиналық Григорий Вовчинскийге бұйырғаны белгілі. Бұл – жерлесіміздің екінші паралимпиадасы. Ол төрт жыл бұрын Пхенчханда өткен ойындарға қатысып, жүлдеге бір адым жетпей тоқтаған, яғни төртінші орынға табан тіреген болатын.
Қола медальдің көмегімен ел құрамасы жалпыкомандалық есепте Австралия және Швейцария елдерімен қатар 17-ші орынға жайғасты. Жалпы биылғы Паралимпиада ойындарына Қазақстанның атынан спорттың екі түрі бойынша бес спортшы қатысып жатыр.
– Бұл жетістікке жету үшін ұзақ уақыт дайындалдым. Жаттығулардың арқасында осы нәтижеге жеттім деп ойлаймын. Бұдан кейін де халықаралық додаларда ел намысын қорғаймын. Қолдау білдіріп, үміт артқан барлық қазақстандықтарға өз алғысымды білдіремін. Дәл қазір ерекше сезімде тұрмын. Мені шаңғы спортына баулыған бапкерлерім Иван мен Мария Дробязкоға және қазіргі жаттықтырушыларым Аслан Тоқбаев пен Антон Ждановичке алғыс айтамын. Бұл – менің Паралимпиададағы алғашқы медалім. Сезімімді сөзбен айтып жеткізу мүмкін емес, – деді ол журналистерге берген сұхбатында.
Александр Герлиц 1989 жылы Ақжар ауданының Горьковское ауылында туған. Мектепті бітіргеннен кейін М.Қозыбаев атындағы Солтүстік Қазақстан мемлекеттік университетінің экономика факультетіне оқуға түскен. Уақытша спортты ысыра тұрып, бар назарын оқуға арнаған. Бірақ тағдырдың жазғанынан көнбеске лаж бар ма? Соңғы курста оқып жүргенде, яғни 2011 жылы жол апатына ұшырап, бір қолынан жарақаттанған. Осы оқиғадан кейін ұзақ уақыт өз-өзіне келе алмаған. Дәл осы сәтте жас жігітке ерлі-зайыпты Иван мен Мария Дробязко көмек қолын созды. Көңілін аулап, оны шаңғы спортымен шұғылдануға шақырған.
– Александр – қиындықтардан қорқу дегенді білмейтін адам. Кәсіпқой спортты таңдауы да сол мінезіне байланысты, әйтпесе мамандығына сай кеңседе экономист болып отырмай ма? Жас кезінен спортпен шұғылданып, уақыт өте әуесқой командалар сапында волейбол ойнаған, қыста шаңғымен сырғанап өскен ауыл баласы ғой. Әкесі де спорттан алшақ адам емес. Талай жылдар бойы дене шынықтыру пәнінің мұғалімі болып жұмыс істеген, – дейді мүмкіндігі шектеулі жандарға арналған “Үміт” спорт клубының директоры Вячеслав Латышев. Александр Герлиц – бүгінде аяулы жар, қамқор әке.
Спорт мамандары биылғы қысқы ойындарда Александр Герлицке үлкен сенім артты. Өйткені ол әлем кубоктарында тұрақты түрде үздік ондыққа кіріп жүрді. Тіпті Паралимпиада алдында Швецияның Остерсунд қаласында өткен әлем кубогы кезеңінде үшінші орын алған болатын.
– Александр үшін биылғы Паралимпиада сәтті басталды деп айтуға келмейді. Биатлондағы спринтте мәреге 8-ші болып жетті, бірақ бұл 10 километрлік жарыс алдындағы тамаша дайындық еді. Спринтте жарыс жолына, атыс алаңына дене үйретті десе де болады. Бәлкім содан болар, келесі күні өзінің үздік нәтижесін көрсетті. Барша Қазақстандықтарды осынау тамаша жеңіспен құттықтаймын! – деді ұлттық құрамадағы бапкері Василий Коломийц.
Александр қола жүлде алған күннің ертеңінде тағы да жарыс жолына шықты. Бұл жолы шаңғышылар арасында. Жарыстың дәл осы түрінен төрт жыл бұрын Қазақстанға Александр Колядин алтын әперген еді. Жерлесімізге сәл ғана сәттілік жетіспеді, сайысты 5-ші орынмен аяқтады. Александр өзінің жеке рекордын жаңартқанын айта кеткен жөн.
Ел мерейін асырған Александр Герлицке қола медаль үшін 75 мың АҚШ доллары көлемінде сыйлық берілетіні белгілі, бұдан бөлек, 5-ші орын алғандарға тиесілі 10 мың доллар сыйақы тағы бар.
Әділет БАҒЛАНҰЛЫ,
“Soltüstık Qazaqstan”.