Soltüstık Казахстан
Петропавлдағы Ұлттық ұланның әскери институты академия болып қайта құрылды. Білім ордасында ұйымдастырылған салтанатты шара кезінде офицерлер мен курсанттар сап түзеп, мемлекеттік Әнұранды орындады.
Шара барысында оқу орнының бас ғимаратының маңдайшасына латын қарпімен жазылған “Қазақстан Республикасының Ұлттық ұлан академиясы” деген тақтайша қойылды. Оны ҚР Ұлттық ұлан қолбасшысының тәрбие және әлеуметтік-құқықтық жұмыстар жөніндегі орынбасары, генерал-майор Әлібек Сералиев пен оқу орнының бастығы Бауыржан Әбжанов ілді. Жиында бірінші болып сөз алған Әлібек Сералиев жоғары оқу орнының ширек ғасырдан асатын тарихына тоқталды.
– Ғимараттың қазығы осыдан 25 жыл бұрын қағылған болатын. Сол кезде алғашқы оқытушылық құрам нақтыланып, білікті кадрларды даярлау үрдісі қалыптаса бастады. Кейін оқу ошағымызға Қырғызстан, Тәжікстан, Өзбекстан елдерінен талапкерлер қабылданды. Қазіргі күні офицер атанған түлектеріміз Қазақстан мен көрші мемлекеттерде әскери міндеттерін абыройлы атқарып келеді. Бүгін институтымыз академия мәртебесіне ие болды. Біз алдағы уақытта заман талабына сай әскери кадрларды даярлауға бар күш-жігерімізді жұмсай береміз. Ол үшін академияда барлық жағдайлар жасалған. Сондай-ақ жаңа оқу корпусы салынуда, – деді Әлібек Болатұлы.
Салтанаты шара барысында қызметте қол жеткізген табыстары мен әскери оқу орнының қалыптасуы және дамуына елеулі үлес қосқан әскери қызметшілерге, ардагерлерге сый-құрмет көрсетілді. Олардың дені еліміздің Ішкі істер министрі және Қорғаныс министрі, Ұлттық ұлан бас қолбасшысының және Солтүстік Қазақстан облысы әкімінің атынан түрлі марапаттарға ие болды.
Жиында әскери академияның 25 жылдығы мен ел әскерінің құрылғанына 30 жыл толуына орай екі кітаптың тұсауы кесілді. Олар: “Ішкі әскерден – Ұлттық ұланға дейін” және оқу орнының ширек ғасырлық тарихына арналған “Әскери институтқа – 25 жыл” туындылары.
– Бұл туындылармен офицерлер және курсанттар оқу ордамызда таныса алады. Жас сарбаздарымыз кітаптарды оқу құралы ретінде пайдаланбақ, – деді Ұлттық ұлан әскери академиясының бастығы Бауыржан Әбжанов.
Туындылардың алғашқы даналары әскер мен оқу орнында ұзақ жылдар бойы қызмет еткен офицерлер мен ардагерлерге берілді. Шараға қатысқан қонақтар әскери академия кафедраларының ғылыми жұмыстары мен жетістіктері туралы сыр шерткен көрмемен танысуға мүмкіндік алды.
Кейін салтанатты шара IV Халықаралық ғылыми-тәжірибелік конференциямен жалғасын тапты. Баяндамашылар “Мемлекеттің әскери қауіпсіздігін қамтамасыз ету” тақырыбында өз ойларын ортаға салды.
Олжас ӘДІЛБЕК,
Ұлттық ұлан әскери академиясының баспасөз хатшысы.