Қазақ даласында небір дүлдүл әндер, ұмытылмас әуендер өмірге келіп, кейбірінің тарихы сол күйі ашылмай қалғаны рас. Әуезді ән немесе сырлы шумақтар жайдан жай туындамайды ғой, әрбірінің өзіндік азды-көпті тарихы болады. Сәкен Сейфуллиннің “Тау ішінде” деген ғажап әнінің тарихы осы күнге дейін әртүрлі жорамалдармен айтылып келеді. Тіпті бұл ән Сәкен ақталғаннан кейін ғана белгілі әншілердің орындауында шырқала бастаған. Алғаш рет әнші Ләззат Сүйіндікованың орындауында радиодан беріліпті. Тынысы кең, кербез шумақтарға өрілген әуен тыңдарман қауымды бірден баурап, шыңырауына жетелей түскені ел арасында осы күнге дейін сыр болып айтылып келеді.
Ән қалай өмірге келді? Бұл турасында Қазақстанның Еңбек Ері, композитор, өнер зерттеушісі Ілия Жақановтың жазғаны бар. Сәкен ақталғаннан кейін бұл ән жөнінде жұрттар неше түрлі аңыз-әңгіме тарата бастапты. “Бір жолы әдеттегідей Қарпық ағайдың үйінде қонақта болдым. Рымжан апай жаны қалмай өбектеп, Қарпыққа “Тау ішінде” әнінің мән-жайын айтқызып, өзі қосарлана сөйлеп, Жаңаарқада тұратын әйгілі әнші Игілік Омаров орындап жаздырған бір аудиокасетаны тыңдатты. Игіліктің жан-жүректі тебірентетін лирикалық үні бір ғажайып махаббат жыры боп қиялымызды көкке өрлетті. Осы әсерде отырып, Қарпық ағай:
– Блокнотың бар ма? – деді жайлап қана.
– Бар, – дедім сәл аңырып.
– Мен өзің көрген Әзімхан ақсақалдың “Тау ішінде” әні жөнінде айтқан хикаясын қаз-қалпында айтып берейін. Жаз… Бұл осы күнге дейін айтылмаған шын ақиқат сөз, басқа уәждің қажеті жоқ. Иә, бұл менің сөзім емес, Сәкен ағаның қияметтік досы, рулас ағайыны, бала кезінен бірге өскен Әзімхан ақсақалдың сөзі. Бұл сөзді Сәкен ағаның тойы қарсаңында келген сапарында Мәжит атамның үйінде емін-еркін отырып айтып еді. Содан бері бұл әңгімені қызғыштай қорып, жан біткенге айтқам жоқ. Көңіл түкпірінде жата берді. Оны өзіңе ғана айтуым – талай әнді тірілтіп, бағын ашып жүрсің. Көңіл дітімді түсініп отырған шығарсың, “Тау ішінде” әнін аманат еттім өзіңе”, – деп жазады Ілия Жақанов өз еңбегінде.
Ән 1919 жылы туған екен. Бұл – Сәкеннің Омбы түрмесінен қашып шығып, Жаңаарқаға келген кезі. Замана найзағайы ойнап, құбылып тұрған қатерлі күндер. Бір күні Сәкен өзімен байланысып жүрген жандардан Әзімхан досының үйленетінін естиді. “Барам! Тойы бола ма, құдалығы бола ма, бәріне барам! Тірі жүріп, көр ішінде түнегенім жетер енді! Шығам, мына жарық дүниеге! Өлсем де елдің ішінде өлейін. Айтыңдар Әзімханға, бір жақсы ат дайындап қойсын!” – депті.
Сөйтіп, Сәкен тойдан екі күн бұрын қасында екі-үш адамы бар ауылға ат басын тірейді. Ертеңінде Әзімханнан жақсы ат сұрап мініп, Ескене тауына қарай тартады. Бұл кез тұмса даланың жұпар иісі аңқып, сағым ойнаған дала бойдағы шабытты қозғап, гүлдері құлпырған жер-дүние әлем-жәлем күйге еніп тұрған шағы болса керек. Сөйтіп, жүрегін шер толқытқан ақын туған даласының көркем көрінісімен көз суара, бесін ауа ақбоз атты сылаң қақтыра қайтып оралады. Қымыз ішіп, аздап демін алғаннан кейін қағаз-қалам сұратып, әлде бірдеңені сытырлата жаза бастапты. Соған қарағанда жан-жүрегінен шыққан әуенге өлең шумақтарын жазып жатса керек. “Талантқа тау мен тас тосқауыл бола алмайды” демекші, Сәкенге бұл серуен үлкен шабыт бергені анық. Ән де, өлең де қалыпқа құйғандай әдемі шығуы оның сегіз қырлы, бір сырлы жан екенін айғақтамай ма?
Ертеңінде думанды той болып, әндер айтылып, жырлар оқылады. Жастарға қызыға қарап отырған Сәкен толқып кетіп, көзіне еріксізден жас алады. Бір кезде дуылдасқан жұрт Сәкеннен ән сұрайды. Қыран құстай қомданған ақын:
Мен келем тау ішінде түнделетіп,
Аймақты күңірентіп өлеңдетіп.
Астымда ақбоз атым сылаң қағып,
Жалтақтап құлақтарын елеңдетіп, – деп домбырасын қағып-қағып жібереді.
Ақбоз ат – менің тұлпарым,
Шалқыған көңіл сұңқарым.
Көкірек кере жұттым мен,
Ауаның жазғы жұпарын.
Ах-ау, сүмбіл шаш, тәтті сөзің, қара көзің,
Білгейсің келгенімді жалғыз өзің, – деп іңкәр жүректерді шымырлата, салалы саусақтары перне бойын былқылдата басып, жорғалай жөнеліпті.
Ән салдым есіп майда, жаяулатып,
Ырғалтып, шырқап, толғап, баяулатып.
Толқындай мың құбылған әнімді естіп,
Тыңдарсың кірпік қақпай, ояу жатып, – деген жері қандай әдемі! “Япыр-ай, Сәкен ағаның мына сөзін естіген қызда не арман бар?!” дегендер де болыпты тыңдарман қауым арасында. Сәкен мақпал түнде толықсыған алтын айға толғана көз тігіп:
Ұйқыға әнімді естіп берілмессің,
Маужырап төсегіңде керілмессің.
Ақырын үйден шығып, уәделі,
Жеріңе келуге сен ерінбессің, – деп шалқытып, баяулатып, сорғалатып барып тоқтағанда, әнге сусаған қауым демі үзіліп барып қайта жалғанғандай күй кешіпті.
Ән айтылып болған соң Сәкен: “Бұл әннің жайын білгілерің келсе, бүгін таңертең мен жүрген соқпақпен жүріп, Ескененің бір қойнауы Найзақалған сай дейтін жерге барып көріңдер”, – дейді. Сосын төс қалтасынан бүктелген қағазды алып, жаңа әлгінде Арқа әндерін, әсіресе “Бір келіншек” әнін сызылта шырқаған жас жігітке береді. Сол күннен бастап Сәкеннің “Тау ішінде” әні қолдан-қолға өтіп, ауыздан-ауызға тарап кетеді.
Көңілі мұңды, жүрегі шерлі ақын ақбоз атқа мініп, тау ішін кербез кезіп бара жатқанда көңіл көгершіні қалықтап, ғажап ән туғанын өзі де сезбей қалған-ау, сірә!
Әзімхан мен Сәкен бір ауылда өскен дос екен. Жаз жайлауы – Ескене, қыс қыстауы – Қарашілік. Сәкен Нілдіде оқып жүріп, каникулда ауылға келгенде алдынан шығып қарсы алатын да, шығарып салатын да Әзімхан. Сәкеннің біраз сырын білетін жан досы “Тау ішінде” әнінің кімге арналғанынан бейхабар. Жүрегінен терең орын алған сол бір ғашығы жайлы да білмейді. Бұл ән кімге арналған сонда? Ол жағы қазірге дейін жұмбақ. Сәкен жүрегіндегі құпия. Ел арасында бұл әнді өзінің туғандарына қарай икемдеп, Сәкен кезінде осындай бір қызға ғашық болған еді, соған арналған ән деген сыңайдағы әңгімелер, алыпқашпа сөздер көп болған сыңайлы. Бірақ нақты қолмен ұстап, көзбен көрсететіндей ешкім болмаған екен. Сәкен зұлым заманның құрығына ілініп кетпегенде, бұл әннің сырлы тарихын бәлкім өз аузынан еститін бе едік, кім біледі?
Сөйтіп, сұлулық әлемінің ғажайып сырын бар жанымен тебірене жырлаған, жыр сұңқары Сәкен “Тау ішінде” әніндегі бар құпияны ана дүниеге өзімен бірге ала кетіпті… Біздегі қалғаны әннің шыққан жері – Ескене тауы, Найзақалған сайы! Досының үйлену тойында өзінің орындауында тұсауы кесілгені. 1919 жылдан бері бір ғасырды артқа салса да, әлі күнге сандық түбіндегі қазынадай жарқырауда. Жүрек қылын тербетер, көңіл қалауынан қайнап шыққан әуен талайдың көкірегіне шер болып қатқан сағынышын басуда десек еш артықтығы жоқ.
Ерғали ЗИЯБЕК,
Мамлют аудандық Мәдениет үйінің көркемдік жетекшісі.