Қызылжар ауданына қарасты Петерфельд ауылында кейбір қалалардың өзінде жоқ озық үлгідегі мектеп бар екенін естіп, тыныс-тіршілігімен танысу үшін солай тарттым. Сенімгерлік басқаруға берілген оқу ордасы Қызылжар Абай мектебі деп аталады. Кіреберістегі қабырғада ұлы ақынның “Үш-ақ нәрсе адамның қасиеті: ыстық қайрат, нұрлы ақыл, жылы жүрек” деген нақылы көп жайтты аңғартып тұрғандай.
Мектеп директоры Әділбек Исмағұловтың сөзінше, оқу ордасы 1969 жылы салынған екен. 2020 жылға дейін бір де бір рет күрделі жөндеу жүргізілмегендіктен жылу жүйесі, су құбырлары, шатыры әбден тозған. Қазіргі өзгерістер сол жылы сенімгерлік басқаруға берілгеннен кейін жасалған. Есік-терезесінен бастап, түгел жаңартылған. Аумағы 450 шаршы метр болатын спорт залы салынып, барлық қажетті құралдармен жабдықталыпты. Көктемде қардың суы көлкіп жататын аула тегістеліп, онда футбол алаңы салыныпты. Сонымен қатар ойын алаңы, балалар мен ата-аналар үшін демалыс орны да қарастырылған. Яғни, баласын алуға келген ата-ана мектеп аумағында демалып, кең жолақты ғаламтор желісіне қосыла алады.
– Біз Назарбаев зияткерлік мектептерімен тығыз байланыстамыз. Олар анда-санда біздің мектепке келіп, қажетті курстар өткізіп тұрады. Барлық мұғалімдер жаңартылған білім беру жүйесі бойынша арнайы курстан өтті. Білім ордасының үш жылдық даму жоспарын жасадық. Сол бойынша жұмыс істеп жатырмыз, – дейді білім ордасының басшысы Әділбек Нұрланұлы.
Екі қабатты білім ордасы өте жинақы, көрер көзге тартымды екен. Директордың жол бастауымен кабинеттерді араладық. Соңғы үлгідегі жабдықтар қойылыпты. Химия, физика, биология кабинеттері мен зертханалар кірсең, шыққысыз. Робототехника кабинеті де бар. Мұндай жағдай ауыл түгілі қаланың кейбір мектептерінде жасалмаған. Күрделі жөндеу кезінде әрбір кабинетті ұтымды пайдалануға баса мән берілген екен. Бос тұрған жер жоқ. Екінші қабаттағы дәліздің соңы – кітапхана. Онда оқушылар сабақ арасында кітап оқитын арнайы орындықтар қойылыпты. Осындай озық материалдық база оқушылардың білім алуына, алға ұмтылуына мүмкіншілік беретіні анық.
– Бізде сегіз интерактивті тақта бар. Бұлардың өзге ауыл мектептерінен айырмашылығы – қабырғаға ілінбейді, дөңгелектері бар, қай жерге қою керек болса, сонда апаруға болады. Бастауыш сыныптарға арналған зертханалық кабинеттер оқушыларды жан-жақтылыққа бейімдейді. Лингафон кабинеті 28 “Білімбук” құрылғыларымен жабдықталған. Бұл компьютер пайдалана алмайтын төменгі сынып оқушылары үшін қолайлы, кәдімгі смартфон сияқты экранды басып, жұмыс істей береді. Ал информатика кабинетінде 20-ға тарта компьютер қойылған, – дейді мектеп директоры кабинеттерді таныстыра келе. Мектеп Петропавлдағы Оқушылар сарайымен мемарандумға қол қойыпты. Енді робот жасау үшін оқушылар сондағы барлық жабдықтарды да қолдана алады.
Білім ордасы сенімгерлік басқаруға берілгенімен мектептің бұрынғы мұғалімдері өз қызметтерінде қалған. Кей ұстаздарға қосымша үстемақы төлеу мүмкіншіліктері де қарастырылған екен. Білікті маманның жұмысы қашан да жоғары бағаланады. Мектепте домбыра, вокал, хореография, спорт, робототехника үйірмелері ашылған. Сонымен қатар “Аналар мектебі”, “Әкелер кеңесі” де құрылған. Абай оқулары тұрақты түрде өтеді.
– Қазіргі таңда қазақ тілді логопед, психолог және технология пәнінен сабақ беретін мұғалім іздеп жатырмыз. Мектептің жобалық қуаты 240 оқушыға шақталғанымен қазір 270 бала екі ауысым бойынша білім алады. 56 орынға арналған асхана бар. Барлығы тегін тамақтанады. Мектепті жаңадан жабдықтаған жылы оқушылар саны 220-дай ғана еді. Одан бері 50 оқушыға көбейді. Қазақ сыныбында оқитындар саны жылдан жылға артып келе жатқаны көңіл қуантады. Биылғы оқу жылында 1-сыныптың табалдырығын 31 оқушы аттаса, 10 түлек 11-сыныпты тамамдайды, – дейді Әділбек Исмағұлов.
Білім ошағын сенімгерлік басқаруға алған “Bilim media group” компаниясының мақсаты – республика бойынша Абай мектептерінің желісін құру. Қазір осы бағытта жұмыстар жүргізіліп жатқан көрінеді. “Қызылжар Абай орта мектебі” қоғамдық қорының басқарушы директоры Берік Ракушевпен телефон арқылы тілдестік. Оның айтуына қарағанда, мектептің күрделі жөндеуі, спорт залы және материалдық-техникалық базасына, яғни, оқу ордасының осындай дәрежеге жетуіне 300 миллион теңге жұмсалыпты.
– Балалар мен жасөспірімдерді қазірден бастап Абайдың шығармашылығымен тәрбиелеу мақсатын ұстанып отырмыз. Әрбір қазақстандық Абайдың толық адам концепсиясымен сусындайтын болса, онда біздің мақсатымыздың орындалғаны. Білім мен тәрбие қатар жүргенде ғана нәтиже шығады. Сондықтан тәрбиеге де көп көңіл аударуымыз керек. Болашақта Абай мектептерін Мамлют және Тайынша аудандарында да ашсақ деген ой бар. Білім басқармасымен осы жағын ақылдасып жатырмыз. Жалпы Қазақстанның барлық аймақтарын қамтығымыз келеді. Оны уақыт көрсетеді, – дейді Берік Ұзақбайұлы.
Бектұрған ЛАҚАДЫЛ,
“Soltüstık Qazaqstan”.