Президент Қасым-Жомарт Тоқаев халыққа арнаған Жолдауында мемлекетіміздің егемендігі мен аумақтық тұтастығын және ұлттық мүддемізді қорғауды көздейтін стратегиялық бағытымызды айқындап берді. Жүзеге асырылуға тиіс бастамалар өте ауқымды, олар сын-қатерлерді еңсере отырып, басты мұрат – Жаңа Қазақстанды құруға бағытталған. Құндылықтарымызды түбегейлі жаңарту жоғары жауапкершілікті, бір-бірімізге деген жанашырлықты талап етеді. Мемлекет басшысы өз сөзінде: “Біз ұлан-ғайыр жеріміздің байырғы атауларын, ұлы тұлғаларымыздың есімін ұрпақ санасында жаңғырта береміз”, – деді. Қазақтың қай жері болсын киелі, қастерлі. Қожаберген жырау, Сегіз сері, Тоқсан би, Сәбит Мұқанов, Иван Шухов, биыл мерейтойлары жоғары деңгейде атап өтіліп жатқан Ғабит Мүсірепов пен Сафуан Шәймерденов сияқты тұлғаларды дүниеге әкелген Жамбыл ауданы ежелден батырлар мен ақындар, жазушылар мен жыршылар қонысы саналған.
Ауданның табиғаты шұрайлы әрі әсем. Қайың мен терек аралас өседі. Су айдындары мол. Солтүстігінде Ресейдің Қорған облысымен, шығысында Мамлют және Есіл, оңтүстігінде Шал ақын және Тимирязев аудандарымен, батысында Қостанай облысымен шектесіп, Батыс Сібір жазығының оңтүстігіндегі Есіл мен Обаған өзендерінің суайрығы болып есептелетін кең жазықты алып жатыр. Баурайынан бақ, байлауынан ат кетпеген құтты мекеннің тыныс-тіршілігі ауданның экономикалық әлеуетімен тығыз сабақтас екенін мына деректер анық аңғартады. Былтыр қолайсыз климаттық жағдайларға қарамастан диқандар жақсы өнім жинады. Гектар берекелігі 11,3 центнерден айналып, жалпы астық көлемі 229,8 мың тоннаны құрады. Нәтижесінде 58439,6 млн. теңгенің ауыл шаруашылығы өнімі өндірілді.
Тұрғындардың негізгі кәсібі – мал шаруашылығы мен егіншілік. Экономикалық белсенді халықтың үлесі – 45,6 пайыз. Өткен жылы 6,6 мың тонна ет, 38 мың тонна сүт, 11,4 млн. дана жұмыртқа өндірілді. Өсім 3,2-10,7 пайыз аралығында. 1367 адам жұмысқа орналастырылды. “Ауыл шаруашылығын қаржылай қолдау” қоры арқылы өз ісін ашуға 22 млн. 110 мың теңге мөлшерінде 8 несие берілді. Мәселен, Р.Зарипов деген азамат “Алтын дән” дүкенін ашып, кәсібін дөңгелетіп отыр. Демек, еңбек етемін деген адамға мүмкіндік мол деген сөз. Мемлекет тарапынан жасалатын жеңілдіктер аз емес. Аяқтарынан тік тұрып кеткенше қаржылай да, басқа да қолдаулар үзбей көрсетіледі. “Бастау-бизнес” жобасы бойынша 43 адам курс оқып, 16-сы несие рәсімдеді, 84 грант берілді. Қоғамдық жұмыстарға 240 адам жіберіліп, әлеуметтік жұмыс орындарына 23-і орналасты. “Жастар тәжірибесі” бағдарламасына 18 адам қатысты. 171 отбасыға атаулы әлеуметтік көмек тағайындалды. Алда Мемлекет басшысының тапсырмаларына орай әлеуметтік саясатты жетілдіре отырып, тұрғындардың өмір сапасын одан әрі жақсарту, кедейлікті азайту міндеті тұр.
“Мысний”, “Ақжар”, “FTK-Агро” серіктестіктері астық өндірісін әртараптандыруға белсене кіріскен. “Атамекен Агро” ЖШС 750 басқа арналған асылтұқымды репродуктор ашты. 237 бас абердин-ангус тұқымды мал әкелінді. “Екпін-3002” ЖШС 2450 бас қойға шақталған ферма ұйымдастырып, 2598 бас Шопан ата түлігін сатып алды. “Алисарай ЖШС 600 сиыр сауылатын заманауи сүт кешенін тұрғызумен айналысуда. “Жамбыл Агро Инвест” шаруашылығы бір мың бас ірі қара бордақыланатын алаңның құрылысын жалғастыруда. Онда сою және консерві цехы болады. Ауданның өнеркәсіп секторында 3219,4 млн. теңгенің өнімі шығарылып, өнеркәсіптік сипаттағы қызмет түрлері көбейді. Шағын және орта бизнеспен айналысушылардың қатары артып келеді. “Бизнестің жол картасы – 2025” бағдарламасы шеңберінде гранттық қаржыландыру бағыты бойынша “В.Н.Солодушкин” жеке кәсіпкерлігі 1 млн. теңгеге ет сүрлейтін жабдық сатып алды. “В.Т.Абдрешова” ЖК-нің ірімшік өндіретін шағын цех ашу жөніндегі өтінімі мақұлданды. “Династия Агро” ЖШС зығыр өңдеумен айналысады. Жылына 3 мың тонна азықтық және техникалық май шығаруға қауқарлы. Оның өніміне сұраныс жоғары. “Бастау бизнес” шағын несие беру бағдарламасы шеңберінде жылқы, бау-бақша шаруашылығы дамытылады. “Қарапайым заттар экономикасы” бағдарламасы шеңберінде 293,4 млн. теңгенің 5 жобасы қолдау тапты.
Аудан экономикасына инвестиция тартуда да ілгерілеу бар. Бұл көрсеткіш 10 млрд. теңгеге жетіп, өсу қарқыны 119,3 пайыз болды. Президент қаржы саласында өршіп тұрған жасанды сұранысты, оның ішінде сырттан келген сатып алушылардың белсенділігінен туындайтын сұранысты азайту міндетін қойды. Бұл орайда жергілікті жерлерде азық-түлік қауіпсіздігін қамтамасыз етудің маңызы зор. Осыған орай көктемгі егіске әзірлік жұмыстары пысықталып, қажетті жанармай қоры мен ауыл шаруашылығы техникаларының дайындығына жұмыла кірісіп отырмыз.
Есептік кездесулерде ұялы байланыс пен интернетке қатысты сұрақтар жиі қойылады. Көбі сапасының төмендігіне шағымданып жатады. 2021 жылы Казанка, Баян, Жаңажол, Жамбыл, Буденное, Троицкое елді мекендері кең жолақты интернет жүйесімен қамтамасыз етілді. Бұл бағыттағы жұмыстар бәсеңдемейді. Үлкен проблеманың бірі – ауызсу. Аудан орталығындағы су тарату желісіне 1300 үй, 69 ұйым мен кәсіпорын қосылған. Преснов топтық су құбырын қайта жаңғырту шеңберінде Троицкое, Орталық, Архангелька, Сенжаркаға су жеткізілді. Кладбинка мен Железноеге су құбырлары тартылды. Благовещенкаға су мұнарасы орнатылды. Преснов топтық су құбырынан Ұзынкөл мен Айымжанға су бұру құрылысына қаржы бөлінді. Жобаның құны – 225 млн. теңге. Атқарылып жатқан шараларға қарамастан тіршілік көзі тапшы ауылдар баршылық. Мәселен, Жаңажол ауылы. Қарақамыс ауылына су тарту үшін жобалық-сметалық құжаттар дайындалып, энергетика және тұрғын үй шаруашылығы басқармасының қарауына жіберілді. Осыған ұқсас жағдай Казанкада да орын алған. Бар мәселе қаржыға тіреліп тұр.
Ауылдықтарды жол мәселесі де қатты мазалайды. Әсіресе, қыстың көзі қырауда, жауын-шашынды күндері қатынау қиын. Аудан аумағындағы 612 шақырым облыстық және аудандық маңызы бар автожолдардың жақсы және қанағаттанарлық жағдайдағылары 85 пайызға жуық. “Нұрлы жол” бағдарламасын жүзеге асыру аясында республикалық бюджеттен қарастырылған қаражатқа біраз шаруа тындырылды. Петровка – Жаңажол – Бауман станциясы автомобиль жолының учаскесін орташа жөндеу екі жылға есептелген. Майбалық ауылына кіреберіс 12 шақырым жол қалпына келтірілді. Ведомстволық сараптаманың оң қорытындысы негізінде бірнеше жоба әзірленді. Биылғы жол жөндеу жоспары да ауқымды.
Білім беру ұйымдарының жағдайы да назарымызда. Бүгінде 29 мектеп болса, 86,2 пайызы – шағын жинақталғандар санатында. Оқушы санының азаюына байланысты Калиновка мен Чапаевта бастауыш мектептер жабылды. Ауданда барлығы 686 педагог қызмет етеді. 25 жас маманның келгеніне қарамастан математика, ағылшын тілі, орыс тілі мен әдебиеті пәндерінің мұғалімдері, әлеуметтік педагогтар жетіспейді. Тығырықтан шығудың жолдары тынбай іздестіріліп, балаларды оқытудың тең мүмкіндіктері жан-жақты қарастырылған. 6 мектеп жанында интернат жұмыс істейді. 27 елді мекеннен 8 білім ошағына 100-ден астам оқушыны жеткізу ұйымдастырылған. Преснов мектебі жанындағы интернат ғимараты апаттық жағдайда екені ескеріліп, “уақытша отбасы” қанатқақты жобасы енгізілді. 32 бала отбасыларға орналастырылды. Облыс әкімі Құмар Ақсақаловтың тапсырмасымен Благовещенка мектеп-бөбекжайында инклюзивті қолдау кабинеті ашылды. Білім сапасы жақсартуды талап етеді. Былтыр орта мектепті 178 түлек бітірсе, 8-і “Алтын белгіге”, 5-еуі “Үздік аттестатқа” ие болды. Алайда кей мектептердің жинаған ұпайы 55,1-59 аралығында ғана. 13 түлек 50-ден төмен нәтиже көрсетті.
Денсаулық сақтау мекемелері 28 дәрігермен, 1 провизормен, 132 орта буын медициналық қызметкермен, 1 фармацевтпен қамтамасыз етілгенімен, Пресновка мен Архангелкада жалпы практика дәрігерлері тапшы. Материалдық-техникалық жағынан жабдықталуында іркіліс жоқ.
Баспанаға деген мұқтаждық біртіндеп шешіліп келеді. 7106 шаршы метр тұрғын үй пайдалануға берілді. “Оңтүстіктен – Солтүстікке!” мемлекеттік бағдарламасы бойынша қоныс аударушылар үшін 11 жаңа үй сатып алынды. Қайта жаңартудан кейін Қайранкөл ауылында мәдени-демалыс орталығы бой көтерді. “Ауыл – ел бесігі” бағдарламасы аясында 2020 жылы Пресновка ауылында дене шынықтыру-сауықтыру кешенінің құрылысы басталған болатын. Жобаның құны – 284 млн. 222 мың теңге. Өкінішке қарай, мердігердің жауапсыздығынан “Тойыр” ЖШС-мен жасалған шарт біржақты тәртіпте бұзылды. Қазір сметалық құжаттамаға түзетулер енгізіліп, жаңа мердігер табу конкурстық рәсімдері аяқталғаннан кейін құрылыс жұмыстары жалғасатын болады.
Абаттандыру және санитарлық тазалау мәселелері басты назарымызда. Өйткені есеп беру кездесулерде жолданатын сұрақтардың көпшілігі осы салаға қатысты қойылады. Сол себепті “Өңірлерді дамыту” бағдарламасы бойынша елді мекендерді абаттандыруға жергілікті қазынадан 43 млн. теңге бөлінді. Оның ішінде саябақтар, балалар алаңдары салынады. 22 елді мекенде көше жарықтандырылмақ.
Руханияттың темірқазығы, ұлттық құндылықтарымыздың алтын бесігі, береке-бірлігіміздің бастауы саналатын ауыл ырысының ортаймауына, тіршілік базарының тарқамауына, қыж-қыж қайнаған еңбектің ордасына айналуына әркез мүдделіміз.
Марат ЕСКЕНДІРОВ,
Жамбыл ауданының әкімі.