Сәбит Мұқанов атындағы облыстық қазақ сазды-драма театрында “Рухани жаңғыру” бағдарламасының бес жылдығына арналған іс-шара ұйымдастырылды. Мерекелік жиынға облыс әкімінің орынбасары Ғани Нығыметов қатысып, жиналғандарға өңір басшысының құттықтау хатын оқып берді.
– Бұл бағдарлама қазақстандықтардың салт-санасы мен дүниетанымын өзгертетін қозғаушы күш болып отыр. Ұлттық құндылықтарымызды ұмытпай, жаһандық жаңашылдыққа жетелеуге де септігі мол. Қазіргі қоғам көзқарасы қалыптасқан зерделі де зерек тұлғаны тәрбиелеуі тиіс. Ол үшін ілім-білімге ұмтылумен қатар ұлттың бойында ғасырлар бойы қалыптасқан үздік сананы, озық дәстүрлерімізді, жан-жақты жетілген өнеге-тәжірибені, халықтық өнерімізді жаңғыртқан жөн. Тек рухы биік азаматтары бар елдің ғана іргесі мәңгілік болары хақ, – делінген облыс әкімінің құттықтауында.
2017 жылдың 12 сәуірінде Қазақстан Республикасынының Тұңғыш Президенті Нұрсұлтан Назарбаевтың “Болашаққа бағдар: Рухани жаңғыру” атты бағдарламалық мақаласы жарыққа шыққан болатын. Ал 26 сәуірде қоғамдық сананы жаңғырту бағдарламасын іске асыру жөніндегі ұлттық комиссия құрылып, әрбір қазақстандықтың санасын жаңғыртар 6 бағыт айқындалды. Жиын барысында бес жыл ішінде осы бағыттар аясында өңірде атқарылған жұмыс қорытындыланып, қоғамның дамуына үлес қосып жүрген 18 солтүстікқазақстандыққа облыс әкімі Құмар Ақсақаловтың Алғыс хаты табысталды.
“Қазақ әліпбиінің латын графикасына көшуі”, “Жаңа гуманитарлық білім: қазақ тіліндегі 100 жаңа оқулық”, “Туған жер”, “Қазақстанның киелі жерлерінің географиясы”, “Жаһандық қазақстандық мәдениет”, “100 жаңа есім”. Бұл аталғандардың барлығы да – “Рухани жаңғыру” бағдарламасының негізгі бағыттары. Осы бағыттардың аясында елімізде 5 жылдан бері ұлттық мәдениетіміз бен дәстүрімізді, тіліміз бен өнерімізді дамытып, ауылдарға қолдау көрсету үшін көптеген ауқымды жобалар іске асырылып келеді. Мәселен, облыста “Туған жер” арнайы жобасы аясында меценаттардың қолдауымен 1700 іс-шара атқарылды. Осылайша өңіріміздің шалғай елді мекендерінде 76 әлеуметтік маңызы бар нысан бой көтерсе, 680-і күрделі жөндеуден өткен. “Ауыл – ел бесігі” бағдарламасы аясында 17,2 млрд. теңгеге 131 жоба іске асты.
– “Ауыл – ел бесігі” бағдарламасының аясында жұмыстар биыл да жалғасады. Осы жылы 21 білім беру нысанында жөндеу жұмыстары жүргізіледі. Жалпы соңғы 4 жыл ішінде өңір мектептерінің 64 пайызы жөнделді. “Рухани жаңғыру” бағдарламасының тағы бір бағыты – “Киелі жерлер географиясы”. Бұл өңіріміздегі тарихи-мәдени нысандарды қалпына келтіруге және жөндеуге мүмкіндік берді. Қазіргі таңда облыста 33 сакралды нысан бар. Соның 8-і республикалық маңызға ие, – деді Ғани Нығыметов.
Республикалық маңызға ие болған 8 сакралды нысандар қатарына “Абылай хан резиденциясы” музейлік кешені, Қарасай мен Ағынтай батырлардың мемориалды кешендері, Ботай қонысы, Қожаберген батыр, Құлсары батыр кесенелері, Айғаным қонысы, алтын мен күмістен жалатылған “Қазақстан жұлдызы” алтарі және Қызыл оба кесенесі кірген. Қазіргі таңда бұл киелі жерлерге мектеп оқушылары, өңірімізге келген қонақтар мен туристер барып еліміздің бай тарихымен тереңірек таныса алады. Бұл бағыттағы жұмыстарды облыстық музей бірлестігі де іске асырады. Онда өңірлік тарихты зерделеу, өлкетану жұмысын жандандыру, тарихи-мәдени мұраны насихаттау бойынша бірқатар ірі жобалар айқындалған.
Облыстық тарихи-өлкетану музейінде “Рухани жаңғыру” бағдарламасы іс-шараларының облыстық тізіліміне енгізілген бес мұражайлық білім беру жобасы жұмыс істейді. Олар әртүрлі жұмыс түрлерін қамтиды: тарихи экскурсиялар, этюдтер мен квесттер; интерактивті дәрістер мен сабақтар; мұражай акциялары мен мерекелер; “дөңгелек үстелдер”, әдеби және поэтикалық кештер. Былтыр Петропавлда “Ботай – Ұлы дала мәдениеті” атты халықаралық суретшілер симпозиумы өтті.
– Симпозиумда еліміздің әр өңірінен келген дарынды суретшілер бас қосты. Оларға өңіріміздің сакралды орындарына экскурсия өткізілді. Сондай-ақ Ботай мәдениеті таныстырылды. Кейін олар алған әсерлерін түрлі бояу мен техниканы қолдана отыра, қағаз бетіне түсірді. Бұл суреттер көрмеге қойылды. Жобаның басты мақсаты – Солтүстік Қазақстан облысның бай тарихын жас ұрпақ пен өзге ұлт өкілдеріне таныстыру. Жалпы облыстық музей бірлестігі “Рухани жаңғыру” бағдарламасы аясында бұдан да басқа ірі жобаларды іске асырды. Және болашаққа да жоспарлары көп, – дейді облыстық музей бірлестігінің директоры Гүлнар Мұқышева.
“Рухани жаңғыру” бағдарламасының “Жаһандық әлемдегі заманауи мәдениет” арнайы жобасы аясында Самарқанд қаласында (Өзбекстан) және Ресей Федерациясының Қорған облысында “Ботай – Ұлы дала мәдениеті” көрмесін ұйымдастыру жоспарлануда.
Іс-шара концерттік кешпен аяқталды. Жергілікті әртістер ән мен жырдан шашу шашып, жиналған қауымның көңілін көтерді.
Рабиға ЕРАЛЫ,
“Soltüstık Qazaqstan”.