Soltüstık Казахстан
“Ауыл” халықтық-демократиялық патриоттық партиясының төрағасы, Парламент Сенатының депутаты Әли Бектаев жұмыс сапарымен Солтүстік Қазақстан облысында болып, өңірлік филиалдың кезектен тыс конференциясына қатысты. Алқалы басқосуда партияның алда тұрған мақсат-міндеттерін түсіндіріп, “Петерфельд-Агро” серіктестігінде, Қызылжар Абай орта мектебінде атқарылып жатқан игі шаралармен танысты.
Қызылжар ауданында орналасқан “Петерфельд-Агро” ЖШС-ның мал өсірумен және егіншілікпен айналысады. 5 мың сиыр сауылады, табындардың жартысына жуығы – асылтұқымды. Тағы 600 басқа арналған заманауи сүт кешенін ашу жоспарланып отыр. 4 мың гектар жерге жемшөп дақылдары егіледі. Әли Әбдікәрімұлы шаруашылық дұрыс бағытта дамып келе жатқанын атап өтті.
– Солтүстік Қазақстан облысында астық өндірісімен қатар мал шаруашылығы да дамып, тауарлы-сүт фермаларының көптеп тұрғызылуы қолдауға тұрарлық іс. Оған мемлекет тарапынан беріліп жатқан жеңілдіктер өз алдына, инвесторлардың қаржылық демеуі де өте маңызды, – деді “Ауыл” халықтық-демократиялық патриоттық партиясының жетекшісі серіктестік жұмысшыларымен кездесуде.
Серіктестік басшысы Асқар Мәдиевтің айтуынша, өз қаражатына 19 үй салған. Мамандар жетіспейтіндіктен, оларды ауылдық жерге тарту мақсатымен әлеуметтік мәселелерді жүйелі түрде шешу қолға алынған. Биыл 10 баспана пайдалануға беріліп, орталықтандырылған жылыту жүйесіне қосылған. Аулалары асфальтталған. 36 адам тұрақты жұмыспен қамтылып отыр.
Артем Косоуров Мамлют ауданынан осында жұмыс іздеп келген. Қазір бас инженер болып еңбек етеді. Еңбекақысы – 350 мың теңге. Баспана беріліпті. Балалары мектепке және балабақшаға барады. Зайыбы да жұмысқа орналасқан.
Парламент Сенатының депутаты Петерфельд ауылындағы Қызылжар Абай мектебіне де соқты. 1969 жылы салынған білім ошағы осыдан 3-4 жыл бұрын сенімгерлік басқаруға беріліп, күрделі жөндеуден өткен. Бұл мақсатқа 300 миллион теңге жұмсалған. Заманауи үлгіде қалпына келтірілген білім ошағына озық үлгідегі жабдықтар алынған.
– Мектебіміз сенімгерлік басқаруға берілгеннен кейін іші-сырты ғана өзгеріп қоймай, материалдық-техникалық базасы әлдеқайда жаңарды, білім сапасы жақсарды. Оқушылардың ғылыми үрдіске қызығушылығы жоғары. Назарбаев зияткерлік мектебімен, Оқушылар сарайымен тығыз байланыстамыз, – деді мектеп директоры Әділбек Ысмағұлов. Бұл білім ошағында қазір 270 бала білім алады.
Облыста “Ауыл” партиясының 15 өкілі түрлі деңгейдегі мәслихат депутаттары болып сайланып, жемісті еңбек етіп жүргенін айта кеткен жөн. Олардың үшеуі – облыстық, 12-сі аудандық мәслихат мандатын жеңіп алған. Партия атынан 3 адам ауыл әкімі болып сайланған.
Зағифа АХМЕТОВА.
Қызылжар ауданы.