Тәуелсіз еліміздің тірегі – өскелең ұрпақ десек, оларға заман талабына орай сапалы білім, саналы тәрбие беру басты міндеттердің бірі болып табылады. Ал оларға қосымша білім беру жүйесінің негізгі мақсаты – балалардың бос уақытын мазмұнды және толыққанды ұйымдастыруға, әлеуметтік және кәсіби жағынан жетілуіне ықпал жасау.
Аудандағы бірегей оқу орны саналатын өнер мектебі 2011 жылдан бері жұмыс істеп келеді. 2016 жылы 24 тамызда аудан әкімдігінің шешімімен “Серпер” өнер мектебі болып атауы өзгеріп, қайта құрылды. Бүгінге дейін оның қабырғасынан 57 түлек қанат қағып, жартысы жоғары оқу орындарында білімдерін жалғастырса, қалғандары түрлі салада еңбек етіп жүр. Мектебіміз жоғары, бірінші және екінші санатты ұстаздармен қамтылған. Олардың қатары “Дипломмен – ауылға!” бағдарламасы шеңберінде келген жастармен толыға түскенін айта кеткен жөн. Жас кадрларға бірреттік жәрдемақы төлеу, бюджеттік несие беру, тұрғын үймен қамтамасыз ету сияқты әлеуметтік жеңілдіктер жасалды.
Тұтастай алғанда, ауданымызда балаларды қосымша білім берумен қамту үлесінің артып келе жатқанын байқауға болады. Қосымша білім беру – өскелең ұрпақты тәрбиелеу жүйесіндегі негізгі кезеңнің бірі. Оның жас ұрпақты тәрбиелеудегі рөлі өте зор. Ең бастысы, балалармен тәрбие жұмысын ұйымдастыру нығайып, бірнеше жанр бойынша өнердің тылсым сыры үйретіледі.
Өнер ордасында қызмет ететін ұстаздардың кәсіби шеберліктері жоғары екендігін айта кеткен жөн. Күлшара Ұғыбаеваның жетекшілігімен құрылған “Айтұмар” халықтық ансамблінің халықаралық “Тұлға”, республикалық “Ақ шағала”, “Burabau summer fest”, “Каблучок” байқауларында жеткен жетістіктері – соған бір дәлел.
2017 жылы “Айтұмар”, “Ғасырлар үні”, “Мұрагер”, “Жігер” ансамбльдері “халықтық” және “үлгілі” атақтарына қол жеткізді. Шәкірттеріміз Ақан сері атындағы мәдениет колледжінің түлегі, домбыра сыныбының ұстазы Гауһар Еркібаеваның жетекшілігімен республикалық “Сәлем, Астана – 2015”, “Балапан жұлдыз” байқауларының бас жүлдегері атанды. “Жігер” домбырашылар ансамблі бірнеше рет халықаралық сайыстарда бақ сынады. Колледжді үздік дипломмен бітірген Аманжол Қайырденов “Ғасырлар үні” атты ұлт аспаптар ансамблін құрып, әр баланың бойындағы дарынын ашып, өз үлесін қосып келеді. Қолданбалы өнер саласы бойынша маманымыз Арайгүл Әбдікееваны өз ісінің нағыз шебері ретінде жұртшылық мақтан тұтады.
Биыл “Серпер” өнер мектебінің ұйымдастыруымен тәлімгер ұстаз, ардақты әріптесіміз, күй тартыс жобасының негізін қалаушы Серікбай Қабжанұлының құрметіне арнап екінші республикалық “Домбыра – дастан” атты дәстүрлі күй тартыс байқауы өтті. Жас күйшілердің шығармашылық әлеуетін жетілдіру, орындаушылық шеберліктерін шыңдау, көркемдік деңгейін арттыру – біз ұстанатын басты мақсат. Біздің домбырашылар Қарағанды, Теміртау, Көкшетау, Петропавл қалаларында өткен өнер байқауларынан қалған емес.
Қазір оқушыларымыз өнердің көптеген түрін меңгеруге тырысуда. Ұстаздар тәрбие беру деңгейін көтеріп, мақсатқа жету үшін түрлі әдіс-тәсілдерді жетілдіруге, шығармашылық іс-әрекеттерімен көрінуге мүдделі. Қосымша білім беру жүйесі негізінде қабілетті, кәсіби маман қалыптастыру – біздің басты міндетіміз. Ұжым қол жеткен жетістіктермен шектеліп қалмақ емес. Алдағы жоспарымыз бұдан да ауқымды.
Ләззат ЖЕТПІСБАЕВА,
“Серпер” өнер мектебінің оқу ісі меңгерушісі.
Ақжар ауданы.