Халықтың тарихы мен тағдырын, ата жолы мен дәстүрін зерделілікпен қабылдап, көрегендікпен ой түйген ақылы мен тәжірибесі телегей дана бабаларымыз “қилы-қилы заман болып, қарағай басын шортан шалып, жайқалған көк егінді көк шегіртке орып, өзен-көл, теңізді су аяғы құрдым жұтып, тілеулестер азайып, бір-бірімен қас болысып, кәрілер жас болғансып, қара көже ас болып, жүрек біткен тас болып, асықтай ұлдарымыз, өріктей қыздарымыз ата атандырып, сүйек сындырып, жесіріңді жылатпа, жетіміңді тентіретпе, Алла тағала патшамызға сабыр беріп, елің-панаң, жерің-анаң екендігін ұмытып кетпесе екен!” деп тілейді екен.
Қазақ елі нешеме зұлмат-зобалаңдарды, үркіншілікті, “ақтабан шұбырындыны”, ашаршылықты, сталиндік қуғын-сүргінді, жеке басқа табынушылықты, тың игерудің пәлекет-сәлекеттерін, отаршылдық саясаттың зұлымдықтарын көріп, (“өзін-өзі билеген ел бақытты” дегендей) Мемлекет Тәуелсіздігіне ие болдық. Әлемнің төріне Ұлы Даламыздың даусы естілді. Отыз жылдың ішінде мемлекет пен халық игілігіне орай ірі істер қанат жайды, ел мәртебесі асқақтады.
Алайда қоғам өміріндегі кедейшілік, жұмыссыздық, жоқшылықты тудырды. Жоқшылық ар-намыс, ұят-иман, әдеп-сабырды тәрк еткізіп, шарасыздыққа ұрындырды. Тұйыққа тірелу жантүршігерлік қауіпті қайшылықтарға (ұрлық-қарлық, тонау, кісі өлтіру, жең ұшымен жалғасу, парақорлық) соқтырды. Бір жағынан, қоғамда дүниеқоңыздар, алармандар, ардан аттағандар, опасыздар шегірткедей қаптады. Әділетсіздік белең алды. Желге мініп, жер бетінен ғайып болды. Атаның дәстүрлері аяқасты күйге ұшырады, бірлік-берекенің құты қашты. Зиялылар күнкөрістің шылауында кетті. Елдің, халықтың, ұлттың шаруасын итжемеге қалдырып, өз бастарын күйттеп, “мықтылардың” сойылын соқты, жел сөздермен желіктірді, ішкен-жегеніне мәз болды.
Халық атажұртын, алтын мекенін тастап, тентіреп қалаға жөңкілді, байлардың лашығын сағалады. Елге мәлім, өзін-өзі өлімге байлағандар, өртке оранғандар (мысалы, бес сәбидің жанып кеткені), нашақорлар, тәнін сатқандар көбейді… Мұның бәрі – кедейшіліктен. Қытай философы Мацзы (Моди): “Елдегі алапат тәртіпсіздіктердің түп негізі – кедейшілік” деген (б.з.д. V-IV ғғ. 480-400 жылдар).
Біздің қоғамды қайшылықтар шырмауықша шырмады. Қаратаудай қадірлі естілерді дәрменсіз күйге түсірді, ала-құлалық естен тандырды. “Тышқанға мысықтан күшті аң жоқ” дегендей, билік басындағылар өзім білетін жан иесін пысқырмады.
Сонымен, не керек, немқұрайдылық, тоғышарлық, менмендік, бойкүйездік, бейнетсіз байлық жинау, енжарлық арамшөптей қоғамды іштей шірітті.
Бұндайға бір нақты айғақ келтірсек, 1999 жылдың 12 сәуірінде Ақ үйде Нобель сыйлығының лауреаты Эли Визель “Немқұрайдылықтың қатері” дейтін баяндамасында: “Немқұрайдылық әрқашанда жаудың досы, өйткені ол агрессордың қолында, немқұрайдылық-жауапкершілікті сездірмейді”, – деген. (Речи, которые изменили мир. Москва, 2014. с.238-243).
Абайдың 32-сөзінде “ақыл кеселі деген төрт нәрсе бар. Содан қашық болу керек”. Соның ішінде “уайымсыз салғырттық деген бір нәрсе бар, зинһар, жаным, соған бек сақ бол, әсіресе әуелі – құданың, екінші – халықтың, үшінші – дәулеттің, төртінші – ғибраттың, бесінші – ақылдың, ардың – бәрінің дұшпаны. Олар бар жерде бұлар болмайды”.
Маңыраған қойдай, жамыраған қозыдай шетсіз-шексіз Ұлы Дала Елі құлазыған бос кеңістікке айналды. Нуға, суға, аң-құсқа, топыраққа, өсімдіктерге (сенатор Мұрат Бақтиярұлының дерегінше, 2014-2017 жылдарда Сыр мен Түркістан өңірлерінен 64800 тонна қызылмия Қытайға әкетілген) қырағы көз, жанашыр жан болмады. Табиғатымыздың қорғаушысы бола алмадық. Қоқысқа толтырып, “Бабаның өсірген бәйтерегі сая”, “көлеңкелі ағашты кескен көмусіз” қалатынын ескермедік. Ертедегі көлжұтарлар, таусоғарлар тіріліп, ен даламыздың ұлы қазынасы тістегеннің аузында, ұстағанның қолында кетіп, жер түбіндегі аралдардың ішіне барып, ғайып болды. Сыбайлас жемқорлық, қомағай обырлар тайраңдап елді рухани және материалдық тұрғыдан діңкелетті. Ақырында “қасіретті қаңтар” қантөгісіне тап болдық. “99 пәле бар, 100 жақсылық және бар” деп дана бабаларымыз айтқандай, арты қайырлы болғай деп келер күнге үмітпен көз тіктік.
Ел Президенті Қасым-Жомарт Кемелұлы Тоқаев “Жаңа Қазақстан: жаңару мен жаңғыру жолы” атты Қазақстан халқына Жолдауында мемлекетіміздің біртұтастығы мен тәуелсіздігіне үйірілген қара құйынның, “қанды қылмыстың” түп себебінің ақиқатын былайша талдап, әділ түсініктемесін былайша жеткізді:
“Соңғы жылдары біз Қазақстанды түбегейлі жаңғыртуға, трансформациялауға көштік. Түрлі салада ауқымды өзгерістер басталды. Бұл кейбір ықпалды адамдарға ұнамады. Олар жылдар бойғы заңсыз әрекеттерін одан әрі жалғастыра беруді көздеді. Неғұрлым жоғары билікке ие болуды көкседі. Сол үшін кәнігі қылмыскерлер, қарулы бандылар мен опасыз шенеуніктер бірігіп, астыртын топ құрды.
Ішкі және сыртқы жауларымыз өзара ымыраласып, билікті басып алғысы келді. Олар халықтың наразылық шеруін басқа арнаға бұрып, жұртты қасақана арандатты. Лаңкестер мемлекеттік органдарға, стратегиялық нысандар мен бизнеске тиесілі ғимараттарға шабуыл жасады. Билікке күйе жағу үшін бейбіт тұрғындарға оқ атты”.
Қаны сорғалаған шынайы шындықты қақырата айтуы – ұлт патриотының рухани келбетін толық айқындайды. Бұл – мемлекетіміздің қаскөй, арам күштерден мүлде тазарып, әділдіктің жолына біржола бет бұруға, ұлт мәселесін, халық тағдырын шешуге тарихи-мәдени құндылықтарды байытуға айқын құбыланама іспетті. “Қанды қылмыстың” мән-жайына қанық ел Президенті:
“Президентті биліктен кетіргісі келді. Шын мәнінде, бұл мемлекеттілігімізге төнген аса қауіпті сын-қатер болды. Бірақ қастандық жасаушылардың арам пиғылы іске аспады. Мен ең қиын сәтте, қандай жағдай болса да, ақырына дейін халқыммен бірге боламын деп ашық айттым”, – деп өзінің гуманистік көзқарасын, елшілдік-мемлекетшілдік ұстанымын мәлімдеді.
Қиын-қыстау шақта алдаспандай жарқылдап, қара қылды қақ жарып, ар-намыстың сөзін айтпаса, сөздің атасы өлетінін, жүйелі сөзге түйе шөгетінін сезінген Қасым-Жомарт Кемелұлының мемлекеттік биліктің тұтқасын мықтап ұстағандардың өзін долбарлап, ишараттап емес, нақтылы көрсетті. Мәселен, “Жоғары лауазым иелері мемлекетке сатқындық жасады. Опасыздардың ішінде әскери және арнаулы органдардың басшылары да бар”.
Президент Қасым-Жомарт Тоқаев халқымыздың мәртебесін асқақтатып: “Отаншылдық рухының арқасында қасиетті Тәуелсіздігімізді сақтап қалды”, – деп тебіреніспен айтты. Расында, мемлекет саясатының беломыртқасы – Рух, Сана, Дәстүр.
Бұдан былай “Халыққа көпірме сөз, бос уәде емес, көзбен көріп, қолмен ұстауға болатын оң өзгерістер керек”, – деп тағдыранықтағыштық мәселенің мәнісін ашты.
Жолдауда 1) мемлекет тәуелсіздігі, 2) территорияның тұтастығы, 3) ұлттық мүдде, 4) еліміздің саяси жүйесін кешенді жаңарту, 5) диалог пен мәміленің жоғары мәдениетін қалыптастыру, 7) жалпыұлттық бірлік, 8) интеллектуалдық құндылықтарды жетілдіру, 9) Президент өкілеттігін ықшамдау, 10) “Күшті Президент – ықпалды Парламент – есеп беретін Үкімет” қағидатын орнықтыру, 11) дала демократиясының дәстүрін тірілту (бұл нағыз ұлт мәселесі), 12) мемлекет пен қоғамның яки билік пен қауымның келісімін көркейту, 13) билікті орталықсыздандыру, азаматтық қоғамды өркендету, 14) өңірлерді қаржыландыру жүйесін түбірінен қайта жасақтау, 15) жаңадан әкімшілік-аумақтық құрылым жасау, “Қуатты өңірлер – қуатты ел” ұстанымын қолдау, 16) Жаңа Қазақстан негізінде “түрлі көзқарас, бірақ біртұтас ұлт” қағидатына жүгіну, 17) құқық қорғау органдарын күшейту, 18) Конституциялық Сот құру турасында тұғырнамалық білікті тұжырымдамалар, өрелі өркендемпаз идеялар ұсынылған. Лайым, мемлекет пен халықтың игілігіне, береке-бірлігіне, Тәуелсіздігіне қызмет еткей!
Ел Президент Қасым-Жомарт Тоқаевтың жаңаша ойлауы, жаңаша пайымдауы, конституциялық қағидалар мен саяси-құқықтық жүйені жетік меңгеруі, мемлекет басқару тәжірибесі жеткілікті екендігін мынадан көруге болады. Ол “Қазақстанда суперпрезиденттік басқару үлгісі” енді жарамайтынын батылдықпен түсіндіргені. Мұның нақты себептерін көрсетті. Атап айтқанда: “Біз “қасіретті қаңтардан” мынадай маңызды сабақ алдық: мемлекеттегі ең жоғары лауазымды тұлғаның қолында барлық өкілеттіктің шоғырлануы оған жақын тұлғалар мен қаржылық-олигархиялық топтардың ықпалын орынсыз күшейтеді. Сосын олар мемлекетті жекеменшігі сияқты көре бастайды. Я болмаса: “Қай елде болса да тамыр-таныстық кадр іріктеу ісін бұрмалап, сыбайлас жемқорлықтың тамыр жаюына әкеп соқтырады. Тамыр-таныстық пен рушылдық құрдымға бастайтынын нақты ұғыну қажет.
Мұндай қарым-қатынас шағын ғана топтың шалқып өмір сүруіне жол ашады. Ал өзгелерді өмірінің ешқандай болашағы жоқ екеніне біржола мойынсұнып, тек өлместің күнін көру үшін арпалысуға мәжбүрлейді”.
Өркениетті елдерде, әсіресе Жапония мен Қытайда ерлі-зайыптылар, ағайындылар бір мекемеде, бір компанияда істеуге құқы жоқ. Еліміздің мысалына жүгінсек, 1946-1954 жылдарда Қазақстан КП Орталық Комитетінің бірінші хатшысы Жұмабай Шаяхметов балалары мен жақын туысқандарын жоғары лауазымды қызметке сүйремек тұрсын, көлігіне де мінгізбеген. Үстінде кителі мен темір кереуеті болған. Аңыз қайраткер Еркін Әуелбековтің жеке көлігі де, дачасы да болмаған, бала-шағасының жайын ойламаған. Атағы Алатаудай СССР-ге әйгілі классиктер Мұхтар Әуезов пен Сәбит Мұқанов, мемлекет қайраткерлері Ілияс Омаров пен Кенжалы Айманов, Кеңес Одағының Батыры Мәлік Ғабдуллин мен Рейхстагқа ту тіккен Рахымжан Қошқарбаев та сондай көргенді, көшелі қайраткерлердің елім жетілсе екен деген ой ғана болған. Ай мен күннің аманында, ел Тәуелсіздік туын желбіреткенде, биліктегілердің бей-берекет, бейбастақ әрекеттерге баруы тарих алдындағы әдепсіздік, жөнсіздік.
Мемлекет пен қоғамның мүддесіне орай – Жаңа Қазақстанды одан әрі гүлдендіру мақсатында: “Сондықтан Президенттің жақын туыстарына саяси мемлекеттік қызметші болуға және квазимемлекеттік секторда басшылық лауазымдарды иеленуге заң жүзінде тыйым салынады. Мұндай норманы Конституцияға енгізсек те артық болмайды деп санаймын. Президенттің өкілеттігі неғұрлым көп болса, ол соғұрлым шексіз биліктің иесіне айналады”, – деуі даналық шешім екені рас. Өйткені Конституция – қазыналы қағидаттарға негізделген киелі құжат. Ұлт байлығы, жер байлығы, халықтың атам заманнан бергі тарихи, мәдени, даналық, гуманистік құндылықтары, ғылыми-шығармашылық әлеуеті, ел басқару өнері мен өнегесі, тұрмыс-тіршілік жайы көрініс тауып, тұжырымдалған.
Әрі қарай: “Президентті тым көп өкілеттігінен айыру еліміздегі саяси жаңғыру үдерісінің тек ілгері басуын қамтамасыз етеді”, – деп саяси трансформацияның жемісті нәтижесін көрсетеді.
Мінеки, мемлекет мүддесіне орай туындаған ел құптарлық іс. Ата заң туралы ой толғағанда 6-баптың 3-ші тармағында “Жер және оның қойнауы, су көздері, өсімдіктер мен жануарлар дүниесі, басқа да табиғи ресурстар мемлекет меншігінде болады. Жер, сондай-ақ заңда белгіленген негіздерде, шарттар мен шектерде жекеменшікте де болуы мүмкін?” – деп жазылған. (Астын сызған – С.Н.).
Ал енді 2009 жылы мемлекет қазынасына құныққан құзғындар теңіз түбін меншіктеуге тәуекелдепті. Маңғыстаулық әкім Каспий теңізінің тұңғиығынан 16 гектар аумақты бір кәсіпкерге 50 млн. теңгеге сатып жібермекші болған. Әйтеуір, осы бір сорақылықтың жолы болмапты-ау. Сонда заң екіұшты, солқылдақ болмау керек.
Конституциялық-құқықтық құжатта Ұлы дала жұртының, ой-санасындағы ғасырлық қасиетті даналық ұғымдары; ата тіл, ата жолы, ата-тек, ата дәстүр, ата кәсіп, атақоныс, ата салт, атамұра, қара шаңырақ, қара қазан, киіз туырлықты, Алаш ұранды, ошақ, от және т.с.с. Бұлар – халық рухының рәміздері. Ұлтымыздың философиялық, стратегиялық, кемеңгерлік көзқарасы, озық тәжірибесі, мемлекеттік ойлау дәрежесі, тәлімгерлігі, әдебі Ата заңда тастүйін көрсетілсе, Жаңа Қазақстанның өрлеуіне серпін береді.
Ұлтымыздың бірегей нұсқалы, озық та озат қоғамдық-психологиялық мәні терең рухани-интеллектуалдық, гуманистік құндылықтары және стратегиялық, лидерлік, патриоттық идеялар – Жолдаудың негізін құрайды. Солардың кейбіреулеріне кезек берейік.
“…Ақыл мен сабыр, парасат пен ұстамдылық қажет. Біз әр шешімді мұқият саралап, әр істі байыппен жасауға тиіспіз. Отаншылдық рухы жоғары ел көздеген мақсатына қалай да жетеді”. “Мемлекет әр азаматтың үніне құлақ асады. Адал еңбек, озық білім және үздік тәжірибе әрдайым жоғары бағаланады”. “Әрбір адам және бүкіл қоғам жаңғыруы қажет. Құндылықтарымыз түбегейлі жаңаруға тиіс”.
Нағыз өркениет биігіне жетудің, төтенше жаңарудың кілті осылар.
Президент Қасым-Жомарт Тоқаев еліміздің әлеуметтік, экономикалық, саяси-мәдени жүйесін кемелдендіру орайында жаңадан әкімшілік-аумақтық өңірлерді құру. “Ең алдымен, Семей аймағында Абай облысын құруды ұсынамын. Семей қаласы жаңа облыстың орталығы болады. Осы мәселені аймақ тұрғындары көптен бері айтып жүргенін білемін. Қазір ол жақта шешімін таппаған түйткілдер аз емес. Мысалы, аймақтың ішкі инфрақұрылымы әбден тозған. Кезінде Алаш арыстарының басын қосқан Семей қаласының жағдайы да мәз емес”, – дейді. Енді бұл аймақта жаңадан инфрақұрылымдар құрылады. Жетімсіреген жерге жан бітеді. Жері мал атаулыға қайысқан, егіншілігі, шаруашылығы, өндірісі, өнері, демографиясы дамыған дәулетті, сәулетті елге айналады. Абай рухы асқақтайды.
Ендігі бір көкейкесті ел тілегін мықтап ескергені Ұлытау жайында: “Ел тағдыры шешілген ұлы жиындар осында өткен. Сарыарқаның төрінде орналасқан бұл аймақтың туристік әлеуеті өте зор. Оның өндірістік қуатын, логистикалық мүмкіндігін ұтымды пайдалану керек. Бір сөзбен айтқанда, біз Ұлытау аймағының дамуына жол ашамыз”. “Кең-байтақ қазақ жерінің дәл жүрегінде орналасқан Ұлытаудың төл тарихымыздағы орны ерекше”. Ұлытаудың қасиетін, тарихын, өркениетін жете түсіндірген. Қаңбақ кезген Ұлы далаға құт, бақ құсы қонған, ақ түйенің қарны жарылған деген осы.
Біздің ойымызша, бұрынғы Жезқазған облысының территориясы негізге алынбаған дұрыс. Ақтоғай ауданы Жезқазғаннан 750 шақырым жерде, Балқаш қаласы 800 шақырым жерде. Ел тағы да азып-тозып шұбырмау үшін басқаша бір амалын ойлау ләзім.
Тағы бір айтайын дегенім, Қарағанды облысының Қазыбек би ауданы Қарқаралы ауданымен кіріктірілген, енді осыны қалпына келтіру керек. Атақты күйші Тәттімбет, Қаздауысты Қазыбек бидің ұрпағы, ақын-композитор, әнші Мәди, мемлекет қайраткері Нығмет Нұрмақов, Әлихан Бөкейханға тілеуқор Ақайдың Хасені, қазақ халқының 700 әнін шырқаған Жүсіпбек Елебеков, сондай-ақ Қали Байжанов, Қуан Лекеров, Рахия Қойшыбаева, Мағауия Көшкінбаев, театр актері Қалибек Қуанышбаев, көркемөнер шеберлерінің білгірі Мақсатбек Майшекин А.Затаевичті табындырған дүлдүл әнші Ғаббас Айтбаевтар осы бір жері пүліш, суы күміс ұлы топырақта дүниеге келген. Даңқты Қоянды жәрмеңкесі ше!
Алматы облысынан Жетісу облысының бөлініп шығуы оң өзгерістерге даңғыл жол ашады.
Жолдауда қазақ қоғамын “түбегейлі жаңғырту” орайында қаншама бастамалар көтерілген: “Оны жүзеге асыру үшін Конституцияның 30-дан астам бабына өзгеріс енгізу қажет. Сондай-ақ жылдың соңына дейін тағы 20-дан астам заң қабылдау керек”.
Шынайы Президент болмысы қандай дегенде, негізінен, ел басына күн туғанда шұғыл шешімпаздық ісімен, көрегендік, стратегиялық ойлау қабілетімен, отаншылдық рухымен, ақыл-сабыр, парасатымен, таза еңбегімен, халқымен мұраттас, пікірлес, тілектес қарапайым мінезімен ерекшеленген тұлға болуға тиісті. Асылы, сөзі мен ісі, кісілік өнегесі бір-бірімен үйлесімді. Бұл ретте ел Президентінің мына бір түйінді пікірі: “Ең бастысы – еліміздің егемендігі! Шын мәнінде, біз үшін Қазақстанның Тәуелсіздігі бәрінен қымбат. Осы тұрақсыз, құбылмалы әлемде Қазақстанымыз бізден басқа ешкімге керек емес. Сондықтан маған елімнің амандығы мен жерімнің тұтастығынан асқан ешбір құндылық жоқ”, – дегені мемлекеттік ойлауы мен жан тілегінің нақты көрінісі.
Сондықтан да Мемлекет басшысының “Жаңа Қазақстан: жаңару мен жаңғыру жолы” атты халқына арнаған Жолдауы – елімізді шындап көркейтудің стратегиясы, саяси-құқықтық негіздемесі, Тәуелсіздіктің философиясы!
Бұл күнде әлемнің әлек-шәлегі шықты. Жер-Ананың мейірімін менменшіл адамзат ұмытып (әсіресе көсемдер), келешектің тамырына балта шабуда. Геосаясат күрделі. “Жаңа Қазақстанның” алдында Алаштың ұранын жазған Сұлтанмахмұт Торайғыров толғағандай, “толған мақсат, толғау таңдау”. Ұлт ұстазы Ахмет Байтұрсынұлы 1913 жылдың 2 ақпан күнгі “Қазақ” газетінің №1 нөмірінде замана заңғарынан “Озғандарға жету керек, жеткендерімізден озу керек. Дүниенің төріне тырмысқандар төрден орын алып жатыр”, – деп айтқан ғасырлық патриоттық ойы Ұлы дала рухын асқақтатып, асу-асу асқарларға шақыратындай!
Серік НЕГИМОВ,
Қазақстанның еңбек сіңірген қайраткері, филология ғылымдарының докторы, профессор.