Тігіншілікті өнер десе де, кәсіп десе де болады. Ол икемді болуды ғана емес, үлкен төзімділікті де талап етеді. Айналысатын ісіңді жан-тәніңмен сүйгенде ғана оның қыры мен сырын толық меңгеріп шығасың. Ал бұл кәсіпті бір игеріп алсаңыз, сізді табыссыз қалдырмайды. Қазір кәсіпқой ісмерлердің қол еңбегі жоғары бағаланады. Мемлекеттік бағдарламалардың көмегімен өз кәсібін ашып, шаруасын дөңгелетіп отырғандар баршылық. «Еңбек» бағдарламасы арқылы Уәлиханов ауданына көшіп келген Нұргүл Салмұханова – тігін өнерінің тілін түсінген жан.
Ер азаматтың тірлігі түзде болса, әйел – үйдің берекесі, отбасының ұйытқысы. Уақытпен санаспастан бәріне үлгеруі тиіс. Бесікті тербетіп, бала тәрбиесімен де шұғылданады. Шүкір, екі перзентті қатарынан кем қылмай өсіріп отыр. Қосымша жұмыс істеп, табыс таппаса, отбасы бюджетін молайтуға мүмкіндік жоқ. Сондықтан қосымша табыс көзін табуға бел байлайды. Қазір үйінің бір бөлмесін шағын тігін шеберханасына айналдырған.
Нұргүлдің бала кезінен тігіншілікке икемі бар. 2006-2007 жылдар аралығында Шымкент қаласындағы тігіншілерге арналған арнайы курсты аяқтап, тігін өндірісі және киімдерді модельдеу кәсібін меңгеріп шыққан. Уалиханов ауданының Кішкенекөл ауылына көшіп келе салысымен аудандық кәсіпкерлер бөлімінен жеке ісін ашып, оны қалай жүргізу туралы кеңес сұраған. Жұмыспен қамту орталығы арқылы мемлекеттен 583 мың теңге қайтарымсыз грант алып, мемлекеттің шынайы қамқорлығын сезінген кәсіпкер бұл қаражатқа соңғы үлгідегі тігін машиналарын сатып алыпты.
– Мемлекет шағын және орта бизнесті дамыту, кәсіпкерлікті қолдау бағытында көп көмектесуде. Бұл өз ісін жаңадан ашып, кәсіп бастап жатқан біз сияқты жандарға жасалған зор қолдау деп білемін. Себебі экономиканың негізгі тірегі – осы шағын және орта бизнес иелері ғой, – дейді Нұргүл Аташқызы.
Ісмердің қолынан шыққан жастық, көрпелері өзгеше оюларымен көз тартады. Ал қазақы камзол мен кішкентайларға арналған тұсаукесер жиынтығы тіптен ерекше. Тігінші неше түрлі перделер, қыздарға арналған көйлек, тұрмысқа қажетті заттар тігуге тапсырыс қабылдайды. Жаңадан кәсіп бастаған жан үшін бұл үлкен жетістік. Шағын бизнестің ашылғанына аз уақыт болса да тұтынушылары көбейген. Одан бөлек, балабақшалар мен мектептерден де тапсырыс алады.
– Жұмысты тапсырыс берушінің көңілінен шығардай етіп уақтылы дайындауға тырысамын. Егер ол тұтынушы көңілінен шықса, еңбегімнің ақталғаны. Өз қолыңнан шыққан әрбір бұйым өзіңе ыстық. Өйткені ол шынайы сүйіспеншілікпен жасалады, – дейді кәсіп иесі.
Шеберханада қолөнер бұйымдарын тігумен қатар шалбардың балағын қысқарту, үлкен киімді кішірейту секілді қосымша қызметтер де көрсетіледі. Соңғы уақытта қыз жасауына тапсырыс берушілер қатары көбеюде.
– Қазіргі заманда қолөнерді үйренемін деушілерге мүмкіндік көп. Жүрген жерімде ерекше үлгідегі киімдер мен ою-өрнектерге көз қырын салып жүремін. Ғаламтордың да көмегі көп. Халық жаңа үлгідегі ерекше дүниелерді ұнатады. Ал тұтынушы көңілінен шығу – біздің басты мақсатымыз, – дейді ісмер.
Тігіншіліктің тілін түсінген шебердің бұл бастамасы қолдауға тұрарлық. Икемі келетін істі игеріп әкетіп, отбасылық кәсіпке айналдырып отырған Нұргүл Аташқызы көпке үлгі.
Әділет БАҒЛАНҰЛЫ,
“Soltüstık Qazaqstan”.