Жеңіс саябағы – Петропавлдағы ең көрікті жерлердің бірі. Онда серуендеп қана қоймай, отбасыңызбен Есіл өзенінің жағалауын тамашалауға, ал қыста сноуборд теуіп, аққала соғуға болады. Зәулім арка мен шамдар, әдемі орындықтар – бәрі де қала тұрғындары мен қонақтарының иглігі үшін жасалған.
Саябақта Ұлы Отан соғысына арналған көптеген тарихи және мәдени ескерткіштер бар. 2015 жылы мұнда ауқымды жұмыстар жүргізіліп, ескерткіштердің біразы қалпына келтірілді. Тоғыз ақпараттық пилон орнатылып, биіктігі 4,5 метр болатын ескерткіш қойылды. Сондай-ақ солтүстікқазақстандық батырлардың есімдері жазылған тақталар да алыстан көз тартады.
Бір өкініштісі, қазіргі күні олардың көбі жөндеуді қажет етеді. Солардың бірі – Ұлы Отан соғысындағы Жеңістің құрметіне орнатылған обелиск. Ескерткіштің қаптамасы қирап, плиткалары құлап жатыр. Биік ескерткіштің жүдеу күйі қала тұрғындарының көңіліне қаяу салатыны жасырын емес.
– Мен осы маңда, 20-сыншы шағынауданда тұрамын. Кешкісін достарыммен серуендеп, ит жүгіртемін. Ескерткіш жартылай қираған, көңілге кірбің ұялатады. Өкініштісі, күтім жоқ, ешкім назар аудармайды, ешкімге керегі жоқ секілді. Бұл жеңіс туралы естелік, ал мерекеге аз ғана уақыт қалды, – дейді қала тұрғыны Камилла Ахметова.
Петропавл қаласы әкімдігінің мамандары 9 мамыр – Жеңіс күніне дайындық қызу жүріп жатқанын хабарлады. Жеңіс мерекесіне орай барлық ескерткіштерге, обелисктерге, майдангерлер жерленген орындарда тексеру жүргізілді.
– Оның нәтижелері бойынша 22 нысанға ағымдағы жөндеу қажет. Нақты айтқанда, Жеңіс стелласы, Даңқ обелискі, “Мәңгілік алау” мемориалы, Настя Прокопичева ескерткіші, саяси қуғын-сүргін құрбандарына арналған монумент, аза тұту қабырғасы, Венгр-большевиктерінің бауырластар зираты, сондай-ақ Жеңіс саябағында орналасқан нысандар қалпына келтіріледі, – деді Петропавл қаласы әкімінің орынбасары Асқар Хабибуллин.
Жөндеу жұмыстары 11 сәуірде басталған. 25 сәуірге дейін аяқталмақ.
Алтынай ҚАЗИҚАН,
“Soltüstık Qazaqstan”.