Soltüstık Казахстан
Біздің облысқа 5 жыл ішінде «Еңбек» мемлекеттік бағдарламасы бойынша еліміздің жұмыс күші басым өңірлерінен 9 мыңнан астам адам көшіп келді. Қоныс аударушылардың 94% — ы өңірде тұрақтап қалды, деп хабарлайды Qyzyljarnews.kz тілшісі.
Жұмыспен қамтуды үйлестіру және әлеуметтік бағдарламалар басқармасы басшысының орынбасары Ринат Елжасовтың айтуынша, Түркістан, Алматы, Жамбыл, Қызылорда, Маңғыстау облыстарынан, Нұр-сұлтан, Алматы және Шымкент қалаларынан келген 2700 отбасы өңірдің 225 елді мекеніне орналасты.
2016 жылдан бері облысқа ҚХР, Өзбекстан, Ресей және Моңғолия, Иран, Ауғанстан, Тәжікстан, Түркіменстан, Қырғызстан және Украинадан 436 отбасы, яғни 850 адам көшіп келген. Жұмыспен қамту органдарына 229 отбасы өтініш білдірген екен, олар квотаға енгізіліп, көшуге және тұрғын үйді жалдау немесе сатып алу шығындарын өтеуге субсидиялар төленді.
— Биыл азаматтарды көшіру «Қуатты өңірлер-ел дамуының драйвері» ұлттық жобасы шеңберінде жалғасады. Еңбек және халықты әлеуметтік қорғау министрлігі 2685 адамға квота бекітті. Облыс әкімі қоныс аударушылар мен қандастарды тарту, оларды әлеуметтік бейімдеу жөніндегі жол картасын бекітіп, қоныс аударушыларды қабылдау және тұрғын үймен қамтамасыз ету үшін елді мекендерді бағалау өлшемшарттары және қоныс аударатын азаматтарға арналған жадынама әзірленді, — деді Ринат Елжасов.
Фото: ашық дереккөздерден