“Soltüstık Qazaqstan” газетінің 21 сәуір күнгі санында тұрақты оқырманымыз әрі авторымыз, білім беру ісінің үздігі Әлия Малдыбаеваның “Жас маман бәсекеге қабілетті ме?” деген мақаласы жарық көрген болатын. Саналы ғұмырын Әбу Досмұхамбетов атындағы дарынды балаларға мамандандырылған гимназия-интернатқа арнаған ардагер ұстаз еңбек жолын жаңадан бастаған мамандарға қатысты түйткілді мәселелерді қозғай келіп, өзі қызмет еткен оқу орнындағы келеңсіз жағдайды да тілге тиек еткен еді. “90 жылға тақау тарихы бар білім ошағында бастауыш сыныптар жабылып, тек бесінші сыныптан бастап қана қабылдайды дегенді естіп, қатты ренжідім. Қабырғам қайысқандай болды.
Орысы ормандай өңірде ұлттық мектептер мен сыныптарды қайтсек көбейтеміз деп, жарғақ құлағымыз жастыққа тимей жүргенде мұндай шешім ешқандай ақылға сыймайды. Сондықтан білім саласындағылар ойланар, ең бастысы, ұл-қыздарын ана тілінде оқытуға ниет еткен ата-аналар үшін тиімді шешім қабылдар деген үміттемін”, – деп жазған болатын.
400 орынға арналған білім ошағы қазіргі орналасқан ғимаратқа 1985 жылы көшкені белгілі. Бұл мектеп ұлттық тәрбие, сапалы білім беру жөнінен облыста алдыңғы қатарлы оқу орны саналады. Қазір мұнда 498 оқушы білім алады. 230 бала интернатта жатып оқиды. 2000 жылы республикалық “Дарын” ғылыми-практикалық орталығының қарамағына берілгелі қоғамдық-гуманитарлық, жаратылыстану-математикалық бағытқа бейімделіп, оқу бағдарламасына бірқатар өзгерістер енгізілді. Мәселен, бейіндік пәндерді топтарға бөліп оқыту құқығы берілді.
Алайда соңғы жылдары мектеп басшылығы тарапынан “Білім – инновация”, “ЛОРД” лицейлері, Назарбаев зияткерлік мектебі сияқты оқушыларды жоғары сыныптан (бесінші, жетінші) бастап қабылдау мәселесі көтеріле бастады. Мектеп басшылығы: “Мамандандырылған” деген мәртебеге лайықты болуымыз керек, республикалық “Дарын” ғылыми-практикалық орталығы да осындай талаптар қойып отыр. Қазіргі оқу үрдісі ережемізге сәйкес келмейді”, – деген уәжді алға тартты. Былтыр бұл ұсыныспен келіспеген 180-ге жуық ата-ананың қолы қойылған хат облыстық білім басқармасына тапсырылып, мәселеге нүкте қойылғандай еді.
Алайда гимназия басшылығы биыл бұл мәселеге қайта оралып, ата-аналар тағы дабыл қақты. Осыған орай облыстық “Қазақ тілі” қоғамының және мектептің қамқоршылық кеңесінің бастамасымен мәселе мектеп қабырғасында арнайы талқыланды. Бәрі бірауыздан 19-шы, 20-шы шағынаудандар, Солнечный мен Борки кентінде ұлттық мектеп бой көтермейінше бастауыш сыныптар жұмыс істей беруі керек деген уәжді алға тартты. Гимназия директоры Ержанат Бәкіров ат шаптырым аумағымызға қосымша ғимарат салып берсе, ешқандай проблема туындамас еді деген ұсыныс айтты.
Бұдан кейін ынталы топ мүшелері облыстық білім басқармасының басшысы Нәзір Жәшібековпен кездесіп, бастауыш сыныптардың жабылуына үзілді-кесілді қарсылықтарын білдірді. Бастауышта 111 бала оқиды екен. Демек, сыныптар жабылса, осынша бүлдіршін жан-жаққа тарыша шашылып, ата-аналары оларды өзге оқу орындарына тасып шаршайды деген сөз.
Кеше ата-аналардан құралған ынталы топ мүшелерінің бірі Қайырбек Жолдаспаев редакцияға хабарласып, бастауыш сыныптардың жабылмайтынын қуана хабарлады.
– Алдағы уақытта оқушылар бесінші сыныптан бастап қана қабылданатынын естігенде шыдай алмай кеттік. Білім басқармасына жүгіндік. Ведомство басшысы бастауыш сыныптар қысқартылмайтынын, бірінші сыныпқа 25 бүлдіршін конкурстық негізде қабылданатынын қадап айтты. Алдағы жұмыс жоспарларымен бөлісті. Соның бірі – 19-шы және 20-шы шағынаудан аумағында қазақ мектебін салуға ұсыныс жасау. Осы мәселе бойынша орынбасарын Білім және ғылым министрлігіне жібермек, – деді жағымды жаңалықпен бөліскен ата-ана. Ол бастауыш сынып оқушыларының ата-аналары атынан осынау іске белсене атсалысқан облыстық “Қазақ тілі” қоғамына, журналистер қауымына, тіл жанашырларына ризашылығын білдірді.
Өмір ЕСҚАЛИ,
“Soltüstık Qazaqstan”.