Петропавлда Қазақстан полициясының 30 жылдығына орай қазақ күресінен Ішкі істер министрлігі спартакиадасының және “Динамо” дене шынықтыру-спорттық қоғамы спартакиадасының қорытындысы шығарылды. Екі күн бойы еліміздің түкпір-түкпірінен келген 150 погонды балуан алты салмақ дәрежесі бойынша өзара үздіктерді анықтады.
Жарыстың ашылу салтанатына қатысқан облыс әкімінің орынбасары Сәтжан Аблалиев ұлттық күрестің бұл түрі күш құрылымдары қызметкерлерінің арасында кең таралып келе жатқанын атап өтті. Құрметті қонақтар арасында жарысты мәдениет және спорт вице-министрі Серік Жарасбаев пен “Динамо” дене шынықтыру-спорттық қоғамы орталық кеңесі төрағасының орынбасары Асқар Омарқұлов тамашалады. Облыстық полиция департаментінің бастығы, полиция полковнигі Айдын Қабдұлдинов те ұлттық күрес тәртіп сақшыларын төзімділікке тәрбиелейтінін айтты.
– Қазақ күресі – көнеден келе жатқан ұлттық спорт түрі. Төзімділік, күш-жігер және шыңдалған техника – бұның бәрі қызу тартыста сәтті өнер көрсетудегі маңызды қасиеттер. Бұл спорттық мереке – 23 маусымда атап өтілетін ел полициясының мерейтойына дайындықтың бір кезеңі, – деп атап өтті Айдын Қабдұлдинов.
Ішкі істер министрлігі спартакиадасында жалпыкомандалық есеп бойынша Қарағанды облыстық полиция департаментінің командасы жеңіске жетті. Нұр-Сұлтан қаласының полиция департаменті екінші орынды қанағат тұтса, үшінші орын Алматы қаласының полиция департаментіне бұйырды. Жекелей сында Жәнібек Дүйсембаев (Алматы облысы 100+ килограмм), Александр Косачев (Алматы облысы 100 килограмм), Әсет Жүнісов (Ақмола облысы 90 килограмм), Еркеғали Қуандық (Түркістан облысы 82 килограмм), Дәурен Қамаш (Алматы қаласы 74 килограмм), Ерболат Құнанбаев (Нұр-Сұлтан қаласы 66 килограмм) үздіктер қатарынан көрінді.
Ал “Динамо” дене шынықтыру-спорттық қоғамының ведомствоаралық спартакиадасында бірінші орынды Ішкі істер министрлігінің командасы жеңіп алды. Ұлттық ұлан екінші орынға қол жеткізсе, үшінші орынға Төтенше жағдайлар министрлігінің командасы жайғасты. Аталған жарысқа “Qyzyljar arlandary” командасының өкілдері де қатысты. Батырхан Қайырбек 74 килограмм салмақ дәрежесінде жеңіске жетіп, “Динамо барысы” атанса, 82 килограмда сынға түскен Еламан Қойшыбаев күміс медальға ие болды. Үздіктерге “Динамо барысы” белдігі табысталып, кубоктармен, грамоталармен және бағалы сыйлықтармен марапатталды.
Әділет БАҒЛАНҰЛЫ,
“Soltüstık Qazaqstan”.