Soltüstık Казахстан
“Оңтүстіктен – Солтүстікке” бағдарламасымен көшіп келгендердің арасында он саусағынан өнер тамған ісімер де, кәсіптің көзін білетін іскер де баршылық. Солардың бірі – Алматы облысының Есік қаласынан былтыр жазда теріскейге келген Төрежан Карбозов. Негізгі мамандығы – дене шынықтару пәнінің мұғалімі. Мамлютка қаласындағы мектептерде мамандығы бойынша жұмыс болмағаннан кейін іргедегі Воскресеновка ауылына табан тірепті. Өйткені мұнда мал ұстауға қолайлы екен. Оның үстіне зайыбына ауылдық әкімдікте аудармашының жұмысын ұсынған.
Басында қара жұмысқа жегіліп, нәпақасын айырған. Аз айлыққа малданып жүре бергісі келмеген ол жеке кәсіппен айналысуды жөн көріпті. Төрежан бала жастан қолына балға-шегесін ұстап, ағаштан түрлі заттарды жасағанды ұнатады екен. Сол қызығушылық оны үй салуға жеткізіпті.
– Туысқан ағаларымның арасында ағаш шеберлері жоқ емес, бірақ кәсіп қып істемеген. Алматыда арнайы технологиямен мобилді үй жасайтын жерде үш жылдай еңбек еткенім бар. Содан кейін ағашқа қолым жүретінін сезіндім. Жұмысқа икемім бар екенін байқаған бастығым мені жібергісі келмеген. Енді осы кәсіптің соңынан кетпекші ойым бар. Адам өзінің қызыққан жұмысымен емін-еркін айналысқаны жақсы. Бейтаныс ортаға келгеннен кейін алдымен шағын монша салудан бастағанды жөн көрдім. Әр аулаға шақ, көп орын да алмайды, іші де ретті. Бір жерден екінші орынға көшіруге де қолайлы. Үйде жасаймын, кім қызығып сатып алса, арнайы көлікпен жеткізіп беремін. Оған іргетас қалаудың керегі жоқ, астына алты таған тас қойса жеткілікті. Қарағайдан жасалатындықтан қабырғасы суық өткізбейді, ортасы он сантиметрлік суық өткізбейтін материалмен қапталған. Қысы-жазы пайдалана беруге болады, – дейді Төрежан Мерекеұлы.
Шебердің жасаған моншаларының ауданы – 2,5-3 шаршы метр. Мұны тұтынушылардың тапсырысына қарай үлкейтуге де болады. Екі бөлмеден тұрады. Кіреберісте киім ауыстыратын орын бар, түпкі бөлмесін жуынатын әрі буға қыздырынатын етіп ыңғайлапты. Бұл технологиямен үй салуға да болады.
Ағаш шебері бір моншаны үш аптада бітіреді. Айтуынша, теріскей кәсіптің түр-түрімен айналысуға, мал бағып, егіншілікпен шұғылдануға да қолайлы. Тек жұмыс істеуден жалықпаған дұрыс.
Төрежан – екі баланың әкесі. Алла нәсіп етсе көпбалалы атанғысы келеді. Бірақ ауылда қазақша мектептің жоқтығы қынжылтып тұрған жайы бар. Воскресеновкадағы мектеп орыс тілінде. Күзде аралас мектеп болып ашылса деген үміті де жоқ емес. Өйткені мектеп жасына толар ұлы мен қызын орысша оқытқысы жоқ.
Бектұрған ЛАҚАДЫЛ,
“Soltüstık Qazaqstan”.