«Soltüstık Qazaqstan»

PDF

Көл суын ішуге мәжбүр

Soltüstık Казахстан

 Kyzylzhar_akparat@mail.ru

Қызылжар ауданындағы Вино­гра­довка елді мекенінің тұрғын­дары ауыз суға зәру. Ауылдағы су мәсе­лесі 15 жылдан астам шешіл­мей келеді. Қазір тұрғындар көл суын ішіп күнелтіп отыр.

Виноградовка елді мекені об­лыс орталығына тиіп тұр, ара қа­шықтық 50 шақырым ғана. Алайда мұнда өркениет жете қоймаған. Тұрғындар ата-бабаларының жо­лымен ауыл маңындағы көлден су алып ішіп отыр. Оның өзі соңғы жылдары құр­ғай бастап, батпаққа айналып жатыр.

Виноградовкада шамамен осы­дан 15 жыл бұрын су болған. Құ­быр­­­мен келген су сағаттап бері­ліпті. Тұрғындарды тіршілік нәрі­мен қамтамасыз ету үшін қаражат бө­лініп, ұңғыма салынған. Бірақ тұрғын­дардың қуанышы көпке бар­мады.

“Оның суын ішуге болмайды, улы, денсаулыққа зиян. Ұңғыма­ның суын ішеміз деп ауыл халқы­ның жартысы ауру болды, бүйрек­тері ауырады, қатерлі ісік ауруы­мен есепке алынғандар көп. Сон­дықтан да ұңғыманың суын пай­далануға қорқамыз”, – дейді елді мекен тұр­ғыны Валентина Труб­чинская.

Былтыр ауылда су құбырын тарту жұмыстары басталған. Жер­гілікті билік тұрғындарды топтық су құбыры салынады деп сендірді. Жо­ба бойынша ұзындығы 14 ки­лометр болатын  құбыр тартылып, сорғы стансасы мен тарату желісі пай­далануға берілуі керек еді. Алайда жұмыс бір аптаға ғана созылып, тоқтап қалды.

“Жауапты мамандар жоба ес­кірген, сондықтан оны жаңарту керек деп айтты. Елді мекенде 500-ге жуық тұрғын бар. Олардың ба­сым бөлігі зейнеткер, яғни олар­дың басқа ауылдан немесе қала­дан су тасып әкелуге мүмкін­діктері жоқ. Таза суды қанша күтуге бола­ды?”, – дейді Валентина Трубчин­ская.

Ауыл тұрғындары көлден әкел­ген суды сүзгіден бес рет өткізіп, қай­натып барып қана тамаққа қол­данады.

Облыстық энергетика және тұр­ғын үй-коммуналдық шаруа­шы­­лы­ғы басқармасының мәліметінше, облыста сумен қамтылмаған 226 елді мекен бар. Былтыр осы мә­се­лені шешуге 10,3 млрд. теңге жұм­салса, биыл 12,3 млрд. теңге бө­лін­ді. Бұл қомақты сома 55 елді ме­кенге тіршілік нәрін тартуға жұм­сал­мақ. Нәтижесінде 12 елді ме­кен­де сумен қамту жүйесі жақса­рады, 10 ауылға таза су келмек, ал қалған 33 елді мекенде басталған жұмыстар келер жылы аяқталады.

Ақерке ДӘУРЕНБЕКҚЫЗЫ,

“Soltüstık Qazaqstan”.

 

 

Әлеуметтік желілерде бөлісіңіз:

Share on facebook
Facebook
Share on telegram
Telegram
Share on whatsapp
WhatsApp