Диас Аяған
Тағдыр толқыны адамды қай жағаға тастайтынын ешкім білмейді. Өмірде қиын жағдайда қалған жандардың күйін көру неткен ауыр. Ал сол адамдардың қуанған, күлімдеген жүзіне қарау қандай ғанибет! Осындай жылылықты жақында ашылған “Надежда” қарттар үйіне отбасылық үлгідегі балалар үйінің ұл-қыздары сыйлады. Балғындар аға буын өкілдеріне арнап концерт қойды. Осылайша бұл жандар өздері іздеген қуанышты бір-бірінен тапқандай болды.
– Біз мұнда келу үшін ұзақ дайындалдық. Қарт адамдар қуанып, күлімдеп жүрсе екен дедік. Осыған орай өз қолымызбен сыйлықтар да дайындап әкелдік. Бүгінгі кеште ән айтып, би биледік. Егде жастағылардың денсаулығы мықты болып, ұзақ өмір сүрсін деп тілеймін, – дейді қарттарға қуаныш сыйлаған балғындар.
Өнерге жаны жақын балалар қариялардың алдында ештеңеден аянып қалмай, бар қабілетін көрсетті. Бұдан бөлек, олар ата-әжелеріне сыйлықтар мен өз қолдарымен әзірлеген кәдесыйларын да ала келіпті. “Надежда” үйіндегі 50 қария балғындардың құрметіне риза болып, өнерлеріне қол соқты.
– Менің бар өмірім осы қалада өтуде. Жарымнан айырылғаннан кейін жалғыз қалдым. Сондықтан да осында келдім. Мұнда замандастарыммен бірге уақыт өткіземіз. Бізге келіп, өмірімізді мерекеге айналдырған балаларға ризамыз, – дейді қарттар үйінің тұрғыны Георгий Сурду.