Тарихтан сыр шерткен

Soltüstık Казахстан

 Kyzylzhar_akparat@mail.ru

Тайынша қаласында тарихи-өлкетану мұражайы ашылып, салтанатты іс-шараға аудан әкімі Берік Әлжанов, қоғамдық бірлестіктердің өкілдері қатысты. Көрнекті жерде орналасқан ғимаратқа күрделі жөндеу жүргізіліп, аудандық және ауылдық кітапханалардың қызметкерлері жәдігерлер жинауға көмек көрсеткен.

Архив деректеріне сүйенсек, ер­те­де аудан аумағында ағылшын артельдері, мал шаруашылығымен, зер­герлік және темір ұстасымен ай­налысатын ауылдар болған. Мұра­жайды тамашалаушыларға сол өт­кен кезеңнен сыр шертетін көптеген деректер ұсынылды. Оның ішінде Тайынша қаласы атауының пайда бо­луы жұртшылықты ерекше қызық­тырды. Бір кездері Ресейден, Герма­ниядан, Орта Азиядан, Қытайдан ке­руен жолымен келген көпестер осындағы көл жағасында ірі қара (құна­жын, тайынша) саудалаумен айна­лыс­қан екен.

Залдың бірінен түрлі этнос өкіл­дерінің ұлттық киімдері, тұрмыстық зат­тары орын алған. Оларды қазақ, орыс, украин, поляк, неміс және ше­шен-ингуш мәдениет орталықтары сыйға тартқан.

Ұлы Отан соғысына, тың жерлер­ді игеруге, ислам, православие, като­лик діндеріне қатысты тарихтан сыр шертетін жәдігерлер бар. Мұражай қабырғаларының бірінде аудан кар­тасы бейнеленген.

Болашақта мұражай қорын толықтыру жоспарланған. Қала, ауыл тұрғындары ата-бабаларынан қалған ескі фотосуреттерді, көне ыдыс-аяқтарды, құжаттарды жинастырып, мұражайға тапсыра алады.

Гүл НҰРАЛИНА,

журналист.

Тайынша ауданы.