Диас Аяған
Облыс орталығында құрылыс саласына қатысты мәселелер аз емес. Жаңа нысандар салуға қаржы бөлінгенімен, жоспарланған жұмыс уақытынан кешеуілдеп аяқталады. Осындай жайт, әсіресе мемлекеттік тапсырыс аясында салынатын бюджеттік баспаналар құрылысында көп кездесуде. Демек, нысандарды жоспарлау әлі де болса жетілдіруді қажет етеді. Бұл мәселе кәсіпкерлер палатасы жанындағы кеңесте Петропавл қаласының әкімі Руслан Аңбаевпен кездесу барысында көтерілді.
Жиынға қатысушылар тұрғын үй салу мен оған тартылатын инженерлік коммуникациялар жоспары бір болуы керектігін айтты. Құрылыс компаниялары басшыларының сөзінше, көп жағдайда коммуникация желілерін тарту бойынша конкурсты өзге өңірлердің компаниялары жеңіп алады екен. Жарық пен жылу уақытында тартылмағандықтан, үйдің ішкі жұмыстары ұзақ уақыт бойы тоқтап тұрады. “Основание” серіктестігінің директоры Сергей Тимофеев бұл бағыттағы жұмыстарды жетілдіру қажеттігін айтты.
– Жергілікті компаниялар үйді салғаннан кейін ол қаңырап бос тұрады. Себебі инженерлік желілері жоқ. Ал желілерді тарту басқа мердігерге жүктелген. Осының салдарынан біз дайын тұрған нысанды күзетуге мәжбүрміз. Қыста жылу болмағандықтан, ішкі әрлеу жұмыстарына көктем шыға ғана кірісеміз. Осындай жағдайлар қайталанбауы үшін тиісті шешім шығару керек, – деді Сергей Тимофеев.
Бұл мәселе қала басшылығын да алаңдатып отырғаны айтылды. Шаһардағы “Береке” шағынауданындағы, Горький, Парфирьев, Ш.Уәлиханов көшелерінің бойындағы үйлердің де уақытында тапсырылмауының бір себебі осы.
– Біз бұндай қадамға мемлекеттік бағдарлама аясында салынатын баспананың бағасын арзандату үшін барған едік. Бірақ сонда да қосымша қаржы бөліп, олқылықтарды реттеуге тура келіп тұр. Қалада коммуникация желілерін тарту бойынша конкурстарды жеңіп алған 3 фирма да өз міндеттемелерін тиісті деңгейде орындамады. Олармен келісімшартты бұзуға талпыныс жасағанбыз. Одан бөлек, жоспарға да өзгерістер енгізіліп жатады. Бұл түзетулерден кейін келісімшарт бұзылып, жаңа конкурс жариялануы мүмкін. Әрине, біз үй мен инженерлік желілер жоспарының бөлек болуына қарсымыз. Алда мұндай кедергіге кездеспейміз деп ойлаймын, – деді Руслан Аңбаев.
Жиын барысында кәсіпкерлер мемлекеттік бағдарлама аясында үй салудың тиімсіздігіне де тоқталды. Айтуларынша, бір шаршы метрі 160 мың теңгеден аспайтын үй салу пайда әкелмейді. Әсіресе құрылыс материалдарының қымбаттауы компаниялардың қаржылық жағдайына кері әсер еткен. Ал бағаның өсуіне байланысты жасалған түзетулерге нысандардың бәрі енгізілмеген.
– Мұның бәрі қолжетімді баспана салуды тиімсіз етіп отыр. Әсіресе 2-3 жыл салынатын ірі нысандардағы жағдай қиын. Құрылыс барысында баға өсіп, шығынға батамыз. Сондықтан біз бұл мәселенің республикалық деңгейде қаралып, шаршы метрінің құнының көтерілгенін, жергілікті атқарушы органдар бағаларға түзету енгізгенде сақ болғанын қалаймыз. Әйтпесе, жергілікті компаниялар жұмысты тоқтатуы да ғажап емес, – дейді Сергей Тимофеев.
“Soltustik rubber recycling” серіктестігінің басшысы Талғатбек Галеев қала басшысына абаттандыру жұмыстарында қауіпсіз, жарақаттан сақтайтын төсеніштерге басымдық беру керек екенін айтты. Серіктестік өндіретін мұндай материалдар түгел дерлік өзге облыстарға жөнелтілуде. Қалада жыл сайын жөнделетін 90-нан астам аула мен спорт алаңдарының ешбірінде қауіпсіз плиталар қолданылмайды екен. Өз кезегінде Руслан Аңбаев жауапты бөлімге қаланы абаттандыруда жергілікті өнімді пайдалану туралы тапсырма берді.
Сонымен қатар кеңес мүшелері өздерін қаланың сегіз ауданын дамыту бойынша жасалатын жоспардың жұмыс тобына қосуды ұсынды. Аталған жоспар тамыз айында дайын болмақ.