Жолаушылар билеті субсидияланады

Петропавл халықаралық әуе­жайы арқылы былтыр 1,3 мың әуе рейсі жасалды. Осы аралықта 76 мың адам ұшқан, бұл көрсеткіш оның алдындағы жылмен салыс­тырғанда үш есе артық.

Облыстық жолаушылар көлігі және автомобиль жолдары басқар­масы басшысының орынбасары Мирхат Әбілмәжіновтің айтуынша, былтыр Петропавл әуежайының мү­ліктік кешені “Қызылжар халықара­лық әуежайы” жауапкершілігі шек­теулі серіктестігіне, кейін сатып алу­ға құқығын сенімгерлік бас­қаруға берілді.

“Қазір Қызылжар халықаралық әуежайы жұмыс істеп тұр, ұшуға жа­рамдылық сертификаты бар. Ны­санда 133 адам еңбек етеді. Олар­дың орташа еңбекақысы – 98 мың теңге. Еңбекақы бойынша қарыз жоқ”, – дейді Мирхат Әбілмәжінов.

Бүгінде Петропавл әуежайынан Астанаға және Алматыға ғана рейс­тер бар. Бұл бағыттарға бюджет есебінен жыл сайын субсидия бөлінеді. Былтыр тек Алматы қала­сы бойынша ғана 752 млн. теңге қарастырылған. Астана бағыты бойынша 702 млн. теңге жұмсалды. Бұл қаражат толық игерілді.

“Былтыр желтоқсан айында Азаматтық авиация комитеті келер жылды субсидиялау бойынша кон­курстық рәсім өткізді. Конкурстың нәтижесі бойынша Алматы бағытын “SCAT” компаниясы жеңіп алды. Ас­тана қаласына “Qazaq Air” ұшақтары ұшатын болды. 474 млн. теңге суб­сидия Астана бағыты бойынша, 520 млн. теңге Алматы бағыты бойынша берілді”, – дейді басқарма басшы­сының орынбасары.

Маманның айтуынша, қазіргі уақытта халықаралық әуежайда бір­қатар шектеу бар. Ол әуе отынын құю­ға байланысты. Қондырғыны жаңғыртудан өткізіп, сұйық отын құятын стансаны ретке келтіру қажет.

“Екінші шектеу ұшу уақытына байланысты. Әуежай тек жарық уа­қытта ғана ұшақтарды қабылдап, ұшыра алады. Өйткені сигнал жабдығы жоқ. Бүгінде әуежай тиісті шараларды қолға алып жатыр. Жеке инвестор бұл шектеулерді алып тастау үшін қаражат бөлуде. Маусым айына дейін тиісті жұмыс­тар атқарылады, кейін әуежай толық қуа­тында жұмыс істеуге көшеді. Тек осыдан кейін ғана қосымша авиа­рейстерді ашу үшін жеке компания­ны тарту мәселесі қаралады. Түркі­станға, Шымкентке және тағы бір­неше шетелге бағыт ашу жоспарда бар”, – дейді Мирхат Әбілмәжінов.

Былтыр Петропавл әуежайынан 1295 рейс жасалса, соның 200-і чар­терлік. 76 мың адам көліктің осы тү­рін таңдаған. Бұл 2021 жылмен са­лыстырғанда үш есе, яғни 373 па­йызға артық.

Биыл Астана мен Петропавл ара­сында 10 ай бойы аптасына 7 рет, 2 ай аптасына 8 рет ұшақ ұшпақ. Ал Алматы мен Петропавл арасын­да 9 ай бойы аптасына 5 рет ұшса, жаз­дың үш айында аптасына 7 рет бағыт ашылады. Әзірге билет бағасында өзгеріс жоқ.

Өңір тұрғындары арасында электр пойызына да сұраныс жо­ғары. Ресейдің көрші облыстарына Петропавлдан қазір “Петропавл – Есілкөл”, “Петропавл – Макушино” бағыты бойынша жүреді. Былтыр билет бағасын арзандату үшін 573 млн. теңге қаражат жұмсалды. Бұл кө­лік биыл да жүреді. Мирхат Әбіл­мәжіновтің айтуынша, 2021 жыл­дың желтоқсанында басқарма жо­лаушылар тасымалы бойынша “Тенгри-Экспресс” жауапкершілігі шектеулі серіктестігімен бес жылға келісімге отырды.

“Пандемияға орай шекаралар­дың жабылуына байланысты нау­рыз айынан бастап электр пойызы тоқтатылды. 2021 жылдың қаңтар-наурыз айларында 300 млн. теңгеге жуық субсидия ретінде бөлінген қаражат игерілді. 2021 жылдың жел­тоқсан айында “Жолаушылар тасы­малы” акционерлік қоғамымен келі­сімшарт мерзімі аяқталып, кон­курстық рәсім өтті. Оны Астана қа­ла­сындағы “Тенгри-экспресс” жа­уап­кершілігі шектеулі серіктестігі же­ңіп алды. Шектеулер алынғаннан кейін, 2022 жылдың 8 маусымынан бастап электр пойызы қайта жолға шықты”, – дейді Мирхат Әбілмә­жінов.

“Петропавл – Есілкөл – Петро­павл” бағытында күніне 2 рет, “Пет­ропавл – Макушино – Петропавл” бағытында күніне бір рет жүреді. “Петропавл – Есілкөл” бағытында Қа­ра­қоға стансасына дейін билет құны ере­сектерге 1,5 мың, балалар үшін 750 тең­ге шамасында. “Петропавл – Маку­ши­но” электр пойызына Горбуново стансасына дейін ересектердің би­леті – 945 теңге, балалар билеті 473 теңге тұрады.

“Осы жылға 1 млрд. 200 млн. тең­ге субсидия берілмек, оның 339 млн. теңгесі бөлінді. Бұл 1 рубль 8 теңге курсымен есептелген. Қазіргі таңда рубль арзандап жатыр, шамамен 6,5 теңге тұрады, ендеше жұмсала­тын қаржы сомасы да азаймақ. Не­ліктен субсидиялау рубльдің курсы­на тәуелді деген сұрақ туындайды. Өйткені Петропавлдағы инфрақұрылым толығымен Ресейдің меншігінде, сол үшін өзара есеп айы­рысу рубльмен жүзеге асады. Ал тасымалдаушы компания барлық мүлікті ресейліктерден жалға алып отыр”, – дейді басқарма басшысы­ның орынбасары.

Мирхат Әбілмәжінов автобус­тарға да тоқталды. Бүгінде облыста барлығы 129 маршрут бар. Оның 6-уы облысаралық, 54-і облысішілік, 30-ы ауданаралық, 19-ы қалалық, 9-ы ауылдық және 11-і қала маңына қатынайтын бағыттар. Өткен жылы қала және облысішілік маршрут­тарға 3 млрд. 200 млн. теңге бө­лінген. Ал биылғы қажеттілік 3 млрд. 270 млн. теңге болса, соның 1 млрд. 570 млн. теңгесі қалалық маршруттарға, 340 млн. теңгесі облысішілік бағыттарға берілді.