Бектұрған Лақадыл
“AMANAT” партиясының Ақжар аудандық филиалы бес жасар жетім бала Константин Ткаченкоға қамқорлық көрсетті. “Денсаулық” бастауыш партия ұйымының төрайымы, аудандық аурухананың бас дәрігері Шолпан Сәбитованың бастамасымен қолға алынған қайырымдылық шарасына жергілікті кәсіпкерлер Нұрлығайын Байгереева мен Орынбасар Ысқақова қатысты.
Сырқат бала ауруханаға түскен кезде салмағы небәрі 5 килограмм ғана болыпты. Отыра да, жүре де, сөйлей де алмаған, тек жата берген. Сондықтан баланы әр қырынан дамытатын заттар сатып алынған. Оның ішінде киім-кешек, ойыншық, жаялықтардан басқа, баланың өсуіне қажетті дәрумендер де бар.
Демеушілер мұндай көмекті бір рет қана емес, баланың жағдайы жақсарғанша жалғастыратындарын, сондай-ақ баланың жағдайын тұрақты түрде бақылауда ұстайтындарын айтты. Константин 3 айдан бері “Денсаулық” бастауыш партия ұйымы мүшелерінің қамқорлығында. Медицина қызметкерлерінің аялы алақанының арқасында салмағы тағы 3 килограмға көбейіп, отыруды үйренген. Кейде арнайы құрылғының көмегімен аяғын басатын болған.
Мамандар бала одан әрі мамандандырылған мекемеде тәрбиеленгені дұрыс дейді. Сондықтан оны Сәбилер үйіне орналастыру мәселесі қарастырылуда. Кішкентай Константиннің анасы ішімдікке салынып, 2022 жылдың қазан айында қайтыс болған болатын. Ал әкесі түзету мекемесінде жазасын өтеуде.