Soltüstık Казахстан
Ұлы Отан соғысының ардагері Қабен Мырзағұлов 100 жасқа толды. Қарт майдангерді бір ғасырлық мерейтойымен Петропавл қаласының әкімі Руслан Аңбаев, ардагерлер кеңесінің өкілдері мен қорғаныс істері жөніндегі басқармасының штаб бастығы құттықтады.
Қабен Егімбайұлы 1923 жылы қаңтардың 14-і Шал ақын ауданындағы Ысқақ Ыбыраев ауылында дүниеге келді. Бақытты балалық шағы туған ауылында өтті, сонда алғаш мектеп табалдырығынан аттады. Әскер қатарына 1942 жылы маусымның 7-і күні шақыртылып, сол жылдың қыркүйек айының 26-сы майданға аттанып, 3-гвардиялық танк полкінің құрамында соғысты. Кейін 14-артиллерия полкында жауға қарсы Украина, Белоруссия, Балтық елдері, Венгрия, Румыния, Польшаны азат ету шайқастарына қатысты. “Қызыл Жұлдыз” ордені, 1-ші және 2-ші дәрежелі “Ұлы Отан соғысы” ордендерімен, “Ерлігі үшін”, “Германияны жеңгені үшін” және тағы басқа медальдармен марапатталып, Жеңісті Берлинде қарсы алды. Бір ғасырлық мерейтоймен қарияны құттықтаған қала әкімі Руслан Аңбаев жылы лебізін білдіріп, сый-сияпат жасады.
– Сізді 100 жасқа толуыңызбен шын жүректен құттықтаймын. Соғыста ерлік көрсетіп, Отанымызды басқыншылардан аман сақтауға өз еңбегіңізді сіңірдіңіз. Сіздің жүріп өткен жолыңыз – жас ұрпаққа үлгі-өнеге, – деді Руслан Аңбаев.
Қазіргі күні Қабен Мырзағұлов алты ұл мен қыздан 10 немере-жиен және 12 шөбере сүйіп, солардың қызығына кенеліп жүр. Ғасыр жасаса да майдангердің жүрісі нық, қашанда аталық ақылымен бөлісуге даяр. Осы жолы да туған күнімен құттықтауға келгендерге алғысын білдіріп, ақ батасын берді.
“Неменеге жетістің бала батыр, қариялар азайып бара жатыр” деп өлең шумақтарында айтылғандай, уақыт өткен сайын майдангерлердің саны азайып барады. Қазір өңірде көзі тірі 9 ардагер ғана бар, 8-і Петропавлда тұрады. Қалалық ардагерлер кеңесінің ақпаратына сәйкес, облыс орталығындағы майдангерлердің үшеуінің жасы 100-ден асқан. Ал соғыс кезінде тылда тынымсыз еңбек еткендердің саны 2 мыңнан асады.
Аманжол НҰРТАЗИН,
“Soltüstık Qazaqstan”.