Нұргүл Оқашева
Биыл қасиетті Қызылжар топырағында дүниеге келіп, ғұмырын алаш жұртының бақытына, Тәуелсіздігіне арнаған ақиық ақын Мағжан Жұмабаевтың туғанына 130 жыл толады.
Өткен ғасырдың отызыншы жылдары “Мен қазақпын” деп тайсалмай, жүректі кернеген мақтанышпен айта алатын ұлттық элита түгелдей дерлік қуғындалып, мұның аяғы отыз жетінің ойранына ұласты емес пе! Жазықсыз жапа шеккендердің қатарында Мағжан ақын да болды. 1937 жылы “халық жауы” деп танылып, атылған ардақты перзентімен халқымыз азаттық таңы рауандап атқан уақытта ғана қайта қауышты.
“Мағжан – алдымен, сыршыл ақын. Мағжан сөзіндей “тілге жұмсақ, жүрекке жылы” тиетін үлбіреген нәзік әуез қазақтың бұрынғы ақындарында болған емес. Ол жүректің қобызын шерте біледі, оның жүрегінен жас пен қаны аралас шыққан тәтті сөздері өзгенің жүрегіне тәтті у себеді. Мағжан не жазса да сырлы, көркем, сәнді жазады”, деп жазушы Жүсіпбек Аймауытов айтқандай, ақынның асыл жырлары топтастырылған кітаптарды парақтай бастағанда көңілің толқып, жаның жадырай салатыны жалған емес. Осындай әсерлі сезімді облыстық халық шығармашылығы және мәдени-бос уақыт қызметі орталағының мамандары қолға алған Мағжан өлеңдерін оқу челленджі барысында тағы бір мәрте басымыздан кешіргендей болдық. Өңіріміздің жас ақындары Мағжан Жұмабаевтың “Мен кім?” өлеңін нақышына келтіріп оқуды жөн көріпті.
“Арыстанмын, айбатыма кім шыдар?
Жолбарыспын, маған қарсы кім тұрар?
Көкте – бұлт, жерде – желмін гулеген,
Жер еркесі – желдің жөнін кім сұрар?”, – деп өрілетін өлеңді айтыс ақындары Жарқын Жұпархан, Хабдолла Бейісхан, Қазақстан Жазушылар одағының мүшелері Аманжол Зағыпар, Күлайхан Рахмет пен өзім де оқып, бұл челленджді ары қарай жалғастыру үшін оны облыстық мәдениет, тілдерді дамыту және архив ісі басқармасының басшысы Досбол Әбдірейісовке, М.Жұмабаев атындағы Ақмола облыстық ғылыми-әмбебап кітапханасының директоры, ақын Қуаныш Оспанға және Павлодар облыстық мәслихатының депутаты, ақын Жарқынбек Амантайұлына жолдадық. Жыл басында қолға алынған бұл челленджге Қазақстанның барлық аймағының ақын-жазушылары үн қосып, ұлтының мамыражай заманға жетуін тілеген, соған шынайы иланған үркердей топтың ішінде дараланған Мағжан ақынның шынардай шумақтары әр көкіректе айрықша сәуле шашатынына сенеміз.