Soltüstık Казахстан
Облыс аумағында былтыр тонау 20 пайызға төмендеді. Мұндай нәтиже қылмыстардың осы түрінің алдын алудан және оларды ашу деңгейінің артуынан мүмкін болған. Көп жағдайда тонауды бұрын істі болған адамдар жасап жатады. Мәселен, өткен жылдың мамыр айында С.Мұқанов көшесіндегі үйдің жанында Петропавл тұрғынына бас бостандығынан айыру орындарынан екі ай бұрын ғана босап шыққан 40 жастағы азамат шабуыл жасаған. Ол күш көрсетіп, жәбірленушінің ұялы телефоны мен қымбат емес металдан жасалған екі жүзігін тартып алған. Шығын сомасы 45 мың теңгені құраған. Ер адамды “ізін суытпай” патрульдік полиция батальонының қызметкерлері ұстады. Қазан айында сот оны кінәлі деп таныды. Үкімге сәйкес, тонаушы түрмеге тағы үш жылға қамалды.
Криминалдық полиция басқармасының ақпараты бойынша, бұрын сотты болған адамдарды бақылау қылмыстарды қайта жасау мүмкіндігін азайтады. Өткен жылдың қорытындысы бойынша тонау деректерінің ашылуы 93,6 пайызға дейін өскен. Былтыр облыста 40 тонау дерегі тіркелді, бұл 2021 жылмен салыстырғанда 10 фактіге аз.
Ерлан МАХМЕТОВ,
облыстық полиция департаменті ішкі және сыртқы коммуникациялар бөлімінің бас маманы.