Soltüstık Казахстан
Былтыр әйелдер кәсіпкерлігін дамыту орталығына төрт жүзге жуық нәзікжан жүгінген. Мұнда ісін жаңа бастаған шағын бизнес өкілдеріне жеті бағыт бойынша 760 тегін қызмет көрсетіліпті. Бұдан бөлек, бизнес стратегиясын әзірлеу, оқыту (тренингтер, шеберлік сыныптары), қаржыландыру (краудфандинг, инвестиция, грант, лизинг), халықаралық жобаларға қатысу, тағы басқа мәселелер бойынша ақыл-кеңестер беріледі. Орталық тәлімгері Әсел Есжанова жыл бойы он қыз-келіншекті менторлық қызметтің қыр-сырын үйретіп шығарғанын да айта кеткен жөн.
– Кейбіреулер бизнесте түрлі қиындықтарға тап болуы мүмкін. Ондай жағдайда тығырықтан шығу үшін бағыт-бағдар беріліп, “Бизнестегі желі” бағыты аясында онлайн оқулар ұйымдастырылады. Мұның байланыс желісін құруға, өндірістегі бизнес-үрдістерді жетілдіруге, клиенттермен тиімді қарым-қатынас орнатуға, есеп беруге және дұрыс жүргізуге пайдасы мол, – дейді әйелдер кәсіпкерлігін дамыту орталығының кеңесшісі Ирина Васильева.
Аталмыш тренингтен өткендердің бірі – сән үйінің негізін қалаушы және иесі Зарина Мавляни. Ол ұлттық киімдер мен аксессуарлар тігу саласында жұмыс істей жүріп, тәжірибесін әбден шыңдады. Заринаның тігін өндірісі саласындағы жұмыс өтілі – 8 жыл. Өз кәсібін ұлттық киім тігуден бастаған. Әйелдер кәсіпкерлігін дамыту орталығының көмегімен менторинг және нетворкинг курстарынан өтіп, білімін жетілдірген. Әріптестерімен бірге республика бойынша қыздар мен әйелдердің киімдерін тігумен айналысатын “Мир” фабрикасын ашты. Өнімдері үлкен сұранысқа ие.
Тайынша ауданының жас кәсіпкері, “Баракят” жеке кәсіпкерлігінің жетекшісі Зәуре Тұрлыбаева “Бастау бизнес” курстарынан өткеннен кейін шағын азық-түлік дүкенін ашыпты. Ол да менторлық, нетворкинг қызметтерін кеңінен пайдаланады. Өз бизнесін дамытуда үлкен тәжірибе жинады. Жартылай фабрикаттар желісі іске қосылып, өндірістік цех пен қоғамдық тамақтану нысаны жұмыс істеп тұр.
Әйелдер кәсіпкерлігін дамыту орталығында менторинг жобасын аяқтаған барлық қатысушыларға облыстық кәсіпкерлер палатасының директоры Тимур Бекеев Лондондағы Халықаралық бизнес-мектептің Алғыс хаттарын табыс етіп, өңірдегі әйелдер кәсіпкерлігін дамытуға қосқан үлесі, белсенді өмірлік ұстанымы үшін рақметін айтты.
– Әйелдер отбасының тірегі, бала-шағаның анасы болумен қатар, елінің игілігі үшін еңбек етеді. Сенім, біліктілік, білімділік – бизнестегі ең маңызды қасиеттер, – деді Тимур Берікұлы.
Әйелдер кәсіпкерлігін дамыту орталығы 2022 жылдың наурыз айынан бастап жұмыс істеп келеді. Жобалар БҰҰ-ның даму бағдарламасы және Азия даму банкінің қолдауымен жүзеге асырылады. Оның шеңберінде әйел кәсіпкерлер үшін қаржылық емес қызметтердің 7 түрі көрсетіледі.
Сағынгүл ІРГЕБАЕВА,
облыстық кәсіпкерлер палатасының баспасөз хатшысы.