Өмір Есқали
Мамлют аудандық соты орман ішінде жидек теріп жүрген әйелді аң екен деп ойлап атып өлтірген Жамбыл ауданының тұрғыны Сергей Лосеняны 31 қаңтар күнгі үкімімен 3 жылға бас бостандығынан айырғанын газетіміздің өткен санында жазғанбыз. 2 ақпан күні осы оқиғаның ішінде болған учаскелік инспектор да жауапкершілікке тартылып, оны 5 жылға темір торға қамау жөнінде үкім шықты.
Тәртіп сақшысы арты ауыр зардапқа соқтырған қызметтегі әрекетсіздігі үшін Қылмыстық кодекстің 370-бабының 4-тармағы бойынша айыпты деп танылды. Ол ішкі істер органының жауапты уәкілі бола тұра, аңшымен бірге ішімдік ішіп, оның заңсыз әрекетіне тосқауыл қоймаған. Кінәсі куәгерлердің айғақтарымен және бейнежазба материалдарымен дәлелденді. Ол жазасын қауіпсіздігі орташа түзету мекемесінде өтейтін болады. Сондай-ақ өмір бойына мемлекеттік, заң қорғау органдарында жұмыс істеу құқығынан және полиция майоры шенінен айырылды.
Мамлют аудандық сотының төрағасы Азамат Дүйсенов сот үкімі туралы журналистерге берген түсініктемесінде: “Сот процесі барысында жазаны ауырлататын болмаса жеңілдететін барлық жағдайлар нақты айғақтармен мұқият зерделенді. Қылмыстық кодексте адамды байқамай өлтіргені үшін 3 жылға, атыс қаруын заңсыз сақтағаны үшін 5 жылға жаза белгіленген”, – деді.
Прокурор эксполицейге 6 жылға бас бостандығынан айыру жазасын сұрағанын айта кеткен жөн. Тілшілердің кісі өлтірген адамға – 3 жыл, ал жанында болған инспекторға неге 5 жыл берілгені туралы сұрағына ол Сергей Лосеняның қылмысын толық мойындап, істеген ісіне өкініш білдіргені ескерілгені, ал ауыр зардаптарға соқтыратын қызметтік әрекетсіздік үшін 7 жылға дейін бас бостандығын шектеу жазасы көзделгенін айтты. Бұл жерде кәмелетке толмаған балаларының болуы, жәбірленушіге медициналық көмек көрсету секілді мән-жайлар ескерілген екен.