Диас Аяған
Мағжан Жұмабаевтың 130 жылдығына орай жыл басында жарияланған “Мен өлмеймін, менікі де өлмейді…” атты мүшәйраның жеңімпаздары мен қазылар алқасы өңірімізге келіп, бірқатар оқу орындарында жастармен кездесулер өткізді. Атап айтқанда, ақын Дәулеткерей Кәпұлы М.Қозыбаев атындағы Солтүстік Қазақстан университетінің, Танакөз Толқынқызы М.Жұмабаев атындағы жоғары колледждің, Бауыржан Қарағызұлы мен Абылай Маудан Назарбаев зияткерлік мектебінің, оқушыларымен кездесті. Абай облысынан келген Мерей Қарт пен көкшетаулық Қуаныш Оспан Абай атындағы мектеп-гимназияның оқушыларымен жүздесіп, руханият, әдебиет төңірегінде әңгіме өрбітіп, оқушылардың сұрақтарына жауап берді.
Абай атындағы мектептің оқушылары ақындарды күй шашумен қарсы алды. Кейін дарынды ұл-қыздар өз өнерлерін көрсетіп, ән салып, өлең оқыды. Қуаныш Оспан мен Мерей Қарт өз шығармашылықтары жайлы баяндады.
– Бұл – менің Қызылжарға екінші рет келуім. Ақын Мағжанның мерейтойы аясында осында табан тіреп отырғаныма қуаныштымын. Мұндағы жастармен кездесіп, осында да өнерге жаны жақын ұл-қыздардың көп екеніне куә болдым. Оқушылардың ынтасы, өлең жырға деген қызығушылығы қуантады. Солтүстікте басталып жатқан осынау Мағжан тойы күллі түркі жұртына таралып, жалғасын табады деп сенеміз, – деді ақын, Қазақстан Жазушылар одағы Абай облыстық филиалының директоры Мерей Қарт.
Мазмұнды кеш соңында жастар ақындарға алғыстарын білдіріп, қонақтар мектеп кітапханасына жыр жинақтарын тарту етті.