Soltüstık Казахстан
Қалалық полиция басқармасы бастығының бірінші орынбасары, полиция подполковнигі Әлібек Ғабдуллин 2022 жылғы жедел-қызметтік жұмыстың қорытындысы бойынша есеп беру кездесуін өткізді. Оған қала әкімінің орынбасары Асқар Хабибулин, зейнеткерлер, Петропавл тұрғындары қатысты.
Былтыр “өткен жылдар” санатындағы 60 қылмыс ашылып, 41 қылмыскер ұсталды. Хабар-ошарсыз кеткен 16 азаматтың жүрген жері анықталды. Өткен жылы 199 жол-көлік оқиғасы тіркеліп, соның салдарынан 5 адам қаза тауып, 244 адам түрлі дәрежедегі жарақаттар алған. Алкогольдік ішімдіктерді ішкені және қоғамдық орында мас күйде жүргені үшін 5200-ден астам құқық бұзушы жауапкершілікке тартылған. Заңсыз айналымнан құрамында спирт бар 17 мың литрден астам алкоголь алынды.
Әлібек Ғабдуллиннің айтуынша, жеке құрам қылмыстар мен құқық бұзушылықтардың алдын алу бойынша барлық қажетті шараларды қабылдауда. Дегенмен электрондық төлемдер және онлайн-дүкендермен бірге ақпараттық технологияларды пайдалана отырып жасалатын алаяқтық түрлері де жасарып келеді. Бір жыл ішінде тіркелген алаяқтық фактілерінің саны 818-ді құрады.
Кездесуге қатысушыларды отбасылық жанжалқойларға қатысты қабылданатын шаралар, жолаушылар тасымалын ұйымдастыру, ішкі істер органдарына жұмысқа орналасу сияқты сұрақтар қызықтырды. Полицияның құзыретіне кіретін барлық сұрақтарға жауаптар берілді. Кездесу соңында Асқар Хабибулин қала тұрғындарына интернет-алаяқтардың әдіс-айлаларынан сақ болуға шақырды.
Игорь МЕРЦАЛОВ,
облыстық полиция департаменті ішкі және сыртқы коммуникациялар бөлімінің жетекші маманы.