Soltüstık Казахстан
Мархаба Иманқұлованы мен бала күнімнен танимын. Концерттік бағдарламамен ауылымызға өнер көрсетуге келгентін. Сахна төріндегі еркін қимылы әлі күнге дейін есімде. Кейін жергілікті телеарнада режиссерлік қызмет атқарып жүрген кезде концерттерін экранға шығарғаным есімде. Ол – ерекше дарынымен республикамызға танылған өнерпаз. Осындай жанның есімі бүгінде ұмытыла бастаған сияқты.
Қазақстанның еңбек сіңірген әртісі Мархаба Иманқұлова Петропавл қаласында дүниеге келген. Қаладағы сол кездегі Ленин атындағы №1 орта мектепте оқыған. Алматыдағы эстрада-цирк студиясын би-цирк класы бойынша бітірген.
Қызылжардың биші қайыңдарына ұқсап, мың бұралып, би өнерінің биік шыңына шыққан Мархаба Сәдуақасқызының өнерін одақтас республикалардағы көрермендер де жоғары бағалады. Көптеген ұлттардың билерін нақышына келтіріп орындай білген өнерпаз Белорусь, Эстония, Латвия елдерінде және Ресейдің Ленинград шаһарында өнер көрсеткен.
Жас кезінде солтүстік өңірдің барлық ауылдарын гастрольдік сапарлармен аралап, өнерімен жұртшылықтың көзайымы болған. Петропавлға жұмыс барысымен келген балет майталманы Людмила Камская жас қыздың бойынан үлкен талантты байқап, өнерге баулығаны да белгілі.
Мархаба Сәдуақасқызы 1959 жылы қазақ әдебиеті мен өнерінің Мәскеудегі онкүндігіне қатысып, Үлкен театрдың сахнасына шыққан. Шара Жиенқұлова құрған ансамбльдің құрамында өнер көрсетіп, үлкен мектептен өтіп, талапты шәкірттерінің бірі саналған. Бірнеше медальмен марапатталған. Мархаба Иманқұловаға 1991 жылы Петропавл қаласының құрметті азаматы атағы берілді.
Мархаба Иманқұлова – қазақ би өнеріне сіңірген еңбегі және абыройлы қызметімен есімі тарихта қалатын, келер ұрпақ құрмет тұтуға лайықты жан. Өкінішке қарай, атақты бишінің кіндік қаны тамған жерде оның есімін асқақтататын ешбір белгі жоқ. Оның есімімен Петропавлдың бір көшесін атаса немесе шығармашылық ұжымдардың біріне есімі берілсе, артық етпес еді. Заманында өнерімен жұртшылықты сүйсіндірген жанды кейінгі ұрпақ біліп жүргені абзал. Сондықтан дара туған жанның аты-жөнін жадымыздан өшірмес үшін оның кім екенін паш ететін бір нысанның болғаны жөн деп ойлаймын.
Баян БАЙМҰҚАНОВА,
телевизия саласының ардагері.