«Soltüstık Qazaqstan»

PDF

Әр оқушыға – сапалы білім

Soltüstık Казахстан

 Kyzylzhar_akparat@mail.ru

Қызылжар ауданының Петерфельд ауылында орналасқан орта мектепке 2020 жылы күрделі жөндеу жұмыстары жүргізілген. Мектепті жөнге келтіруге 300 млн. теңге жұмсалыпты. Бүгінгі таңда оқу ошағы жаңа, яғни “Назарбаев зияткерлік мектептері” дербес білім беру ұйымы тәжірибесі бойынша балаларға дәріс беруде.

Заман талабына сай жабдық­талған Қызылжар Абай орта мектебі – өңіріміздегі сенімгерлік басқаруға берілген білім ордаларының алғаш­қысы. Оқу ордасы облыс орталы­ғын­дағы Назарбаев зияткерлік мектебі­мен бірлесе жұмыс істеу арқылы ұстаздардың кәсіби шеберлігін, оқушылардың білім сапасын арт­тыруды көздеп отыр. Бұл туралы мек­теп қабырғасында ұйымдастырыл­ған ашық есік күнінде айтылды. Ша­раға барлық ауданның білім бөлімдерінің басшылары жиналды.

– Біз Қызылжар Абай орта мекте­бінің сенімгерлік басқаруға берілген­нен кейінгі жағдайын, өзгерістері мен даму қарқынын, артықшылықта­ры мен жетістіктерін облысымызда­ғы барлық әріптестерімізге көрсет­кіміз келді. Мектептің материалдық-техникалық базасы, оқу-әдістемелік жұмысы өзге аудандардан келген ұс­таздардың көңілінен шықты деп ой­лаймын. Қазіргі уақытта білім орда­сында 277 оқушы білім алуда. Олардың 43-і жақын маңдағы елді мекен­дерден тасымалданады. Балалар Конд­­ратовка, Якорь, Кривозерка, За­тон ауылдарынан келіп оқиды. Құ­рылтайшының қоғамдық қоры есебі­нен балалар білім ордасына тегін жеткізіледі. Олардың барлығы дарын­ды, білімді, өнерге жақын, спорт­қа да бейім. Білім ордасының жа­нын­да 7 үйірме жұмыс істеуде. Олар­дың жетекшілерін таңдар сәтте мамандардың білім-білігіне, тәжіри­бесіне баса мән береміз. Мәселен, во­кал үйірмесін есімі өңірімізге бел­гілі әнші Дәмеш Құрманкина жүргі­зеді. Одан бөлек, күрес, футбол, кер­линг, театр үйірмелері бар, – дейді “Қызылжар Абай орта мектебі” қо­ғамдық қоры директорының міндетін атқарушы Гүлдарай Қайнетова.

Білім ордасының негізгі мақсаты – оқушыларды сапалы біліммен қам­тамасыз ету. Ол үшін бағдарлама әзір­леніп, оқу әдістемесі қайта құ­рылған. Мектеп заманға сай жабдық­талған. Мамандар 10-20 жылдан ке­йін көптеген мамандықтардың жойы­латынын, олардың орнын жаңа дүниелер басатынын айтуда. Бұған қазіргі жастар да дайын болуы керек. Яғни, ұстаздар оқушының бойына өмірлік дағдыларды дарытуды бірін­ші кезекке қоюда.

Қызылжар Абай орта мектебі елді мекеннің мәдени, спорттық, ақ­па­раттық орталығына айналған. Мұн­да отбасы психологы, құқықтық сұ­рақ­тар бойынша кеңес беретін заң­гер жұмыс істейді. Олар оқушы­лар­ды ғана емес, тұрғындарды да маза­лаған сауалдардың жауабын іздеуге тырысады.

– Қазіргі таңда Қызылжар ауда­ны бойынша екі мектеп мемлекеттік жекешелік серіктестікке берілген. Біріншісі Петерфельд орта мектебі болса, екіншісі – Бескөл мектеп-гим­на­зиясы. Қызылжар Абай орта мек­тебін “Bilim Faundation” серіктестігі 10 жыл басқаруы тиіс. Осы уақыт аралығында кәсіпкер білім ордасы­ның толықтай материалдық-техникалық базасы мен жөндеу жұмысына жауапты. Мұнда жаңа спортзал, акт залы салынып, химия, физика, робо­тотехника кабинеттері заман тала­бына сай жабдықталды. Барлық парта, орындық, жиһаздар жаңартыл­ған. 200-ден астам бала серіктестіктің есебінен тегін тамақтандырыла­ды, – дейді Қызылжар аудандық бі­лім бөлімінің басшысы Амангелді Абдрахманов.

Ашық есік күні аясында алдымен мектеп ішіне экскурсия жүргізілді. Келушілер физика, химия, биология, информатика кабинеттерін аралап, лаборотория, тынығу алаңын барып көрді. Кабинеттердегі әр техникалық жабдықтың мүмкіндіктері мен пайда­сы туралы жан-жақты сөз етілді. Оқу­шылар робототехника бағдарлама­сы бойынша құрастырған роботта­рын көрсетіп, өз жұмыстарын таныс­тырды. Сондай-ақ ашық кітапханаға шолу жасалды. Сабақтан тыс уа­қытта бұл жерде оқушылар қалаған кітаптарын алып оқи алады. Одан бөлек, қабырғаларда аудиокітап­тарды тыңдауға мүмкіндік беретін QR-кодтар орналасқан.

Кейін зертханалық жабдықтар көр­месі ұйымдастырылды. Мұнда әр сынып оқушылары дайындап әкелген заттарын көрсетті. Пайдалы қазбаларға жататын тастар, магнит­тер, олардың қасиеттері мен ерек­шеліктері жайлы айтылған мағлұ­маттар жиналғандарды қызықтырды. Мұның барлығын оқушылар сабақ барысында үйренген.

Шара соңында пленарлық оты­рыс өтті. Онда Кайдзен техноло­гия­сы принциптері негізінде Қызылжар Абай орта мектебінде оқу-тәрбие үде­рісін тиімді басқарудың негізгі қағидалары, бағалау жүйесін үздіксіз жетілдіріп отыру, сапалы жоспарлау, мұғалімдердің өзара ынтымақтастық жұмысы, құндылықтарды дамыту мәселелері талқыланды.

Әлеуметтік желілерде бөлісіңіз:

Share on facebook
Facebook
Share on telegram
Telegram
Share on whatsapp
WhatsApp