Soltüstık Казахстан
Облыстық бейнелеу өнері музейінде суретші Вячеслав Смирновтың көрмесінің ашылуы өтті. Экспозицияда пейзаж және натюрморт жанрларында 55 көркем кескіндеме туындысы бар.
Залға кірген адамның барлығы ақ қайыңдар мекеніне тап болғандай әсер алады. Облысымыздың көркіне айналған әсем мүсінді қайыңдар суретшінің көптеген шығармаларына арқау болыпты. “Туған жер”, “Ормандағы кеш”, “Жазғы кеш” сынды туындыларынан автордың туған жерге деген ыстық сүйіспеншілігін анық аңғаруға болады.
Вячеслав Смирновтың туған өлкеміздің көрікті жерлері мен тамаша табиғатын суреттеуді жаны сүйеді. Өз туындыларын есте сақтау арқылы бейнелейді екен. “Уақыттың тығыз болуына байланысты үнемі табиғат аясына шығу мүмкіндігі бола бермейді”, – дейді теріскейлік суретші.
Қылқалам шебері – Жамбыл ауданының тумасы. Ол сурет салуды небәрі 5 жасында бастаған. Алайда ержеткен кезінде отбасылық жағдайға байланысты бұл бағытта жоғары білім ала алмапты. Десе де, тынбай ізденіп, талай тәжірибе жинақтаған. Нәтижесінде жерлесіміз табиғатты қағаз бетіне айнытпай түсірудің шебері атанды. Бір қызығы, ол еңбектерінде тек майлы бояуды қолданады.
Шығармашылық кешке Вячеслав Борисовичтың жақындары мен достары жиналды.
Диас АЯҒАН,
“Soltüstık Qazaqstan”.