Диас Аяған
Облыс орталығында “Айбын – 2023” әскери-патриоттық жиындардың жеңімпаздарын марапаттау салтанаты өтті. Байқауға өңіріміздің мектеп оқушылары мен колледж студенттерінен құралған командалар қатысты. Олар өздерінің әскери дайындықтарын сынға салып, ептілік пен мықтылықтарын көрсетті. Жарыс қорытындысы бойынша 5 команда үздік деп танылды.
– Байқауды облыстық білім басқармасы мен қорғаныс істері жөніндегі департамент бірлесіп ұйымдастырып отыр. Өскелең ұрпақ елін сүйіп, оның қорғанына айналуы керек. Оларды отансүйгіштікке тәрбиелеуде осындай шаралар өз септігін тигізеді. Жаңа Қазақстанды құру жастардың қүш-қуаты, азаматтық ұстанымдарына байланысты, – дейді байқау ұйымдастырушысы департамент бастығының орынбасары Ержан Хамитов.
Дәстүрлі “Айбын – 2023” жиыны жеңімпаздары қатарында қаламыздағы гуманитарлық-техникалық колледж студенттері де бар.
– Біз бұл жолы екінші орынға тұрақтап отырмыз. Мұндай жетістікке жету оңай болған жоқ. Үздіксіз дайындық пен тәртіптің арқасында қол жеткіздік. Сайысқа келесі жылы да қатысатын боламыз. Алдағы мақсатымыз – жеңіс тұғырынан көрініп, бірінші орынды иелену, – дейді колледж студенттері.
Әскери-патриоттық жиын қорытындысы бойынша бірінші орынды Ғабит Мүсірепов атындағы ауданның командасы иеленді. Сайыста үздік атанғандар алдағы уақытта Қарағанды қаласында өтетін республикалық кезеңге жолдама алды.
Диас АЯҒАН,
“Soltüstık Qazaqstan”.