«Soltüstık Qazaqstan»

PDF

ЖҮРЕК ҚАЛАУЫ

Soltüstık Казахстан

 Kyzylzhar_akparat@mail.ru

Ол ауылда өсті. Сонда назарына іліккен бір жай: басы ауырып, балтыры сыздағандардың бәрі дәрігерлік пунктті бетке алушы еді. Және бір байқағаны ақ халатты жанның алдына қабағы түсіп, аһылап-үһілеп жететіндер сәлден соң сырқатынан құлан-таза айығып кеткендей жадырап шығатын. Нақ осы кезде оның жас жүрегі лүпілдеп, қатты қуанатын. Кейде, осындай көңіл күй кешкенде әлгі адамдардың ізімен дәрігердің алдына өзінің де қалай барып қалғанын аңғармаушы еді.

– Кел, кел Мәншүк, бір жерің ауырды ма? – дейтін дәрігер бәйек болып.

– Жоқ, мектепке бара жатыр едім… деп сөзінің ар жағын жұтып қойған ол ұмытқаны есіне түскендей, жүгіре жөнелетін. Бірақ көпке дейін дәрігерлік пункттің ішкі көрінісі оның көз алдынан кете қоймайтын. “Қандай ғажайып әлем?! Бәрі – аппақ, тап-таза. Үстіндегі киімі де тал бойына жарасып тұр. Жүзі қандай жылы?! Жанарынан төгіліп тұрған мейірім-шуақты айтсайшы… Ол осылай дәрігердің алдына келген ауылдастарының тез “сауығып” кету себебін түсінгендей болатын. Мен де тәтей сияқты дәрігер болсам ғой!” деп армандайтын. Орта мектепті тамамдаған жылы Қарағанды медицина институтының табалдырығынан аттатқан жылдар бойы жүрегіне ұялаған сол арман еді. Есіл ауданындағы Өндіріс ауылының тумасы, бүгінде өңір тұрғындарына қолы жеңіл тіс дәрігері ретінде танылған білікті маман Мәншүк Сұрағанқызы Шудабаева медицина саласына осылай қадам басты.

– Мен көпбалалы отбасында тәр­биеленіп, өстім, үйдегі сегіз баланың бесеуі қыз еді, солардың үшеуі өсе келе дәрігерлік жолды таңдады. Мен де солардың жолын қудым. Ол кезде мектепті үздік аяқтағандар көбінесе емдеу ісіне баратын. Ал тіс дәрігері аса бір кісі қызығатын мамандық са­налмайтын. Не дегенмен, бұл таң­да­­уыма еш өкінген емеспін. Маман­ды­ғым өзіме ұнайды. Алдымнан өт­кен пациенттерді кездестіріп қал­сам, алғыстарын жаудырып жатады, – дейді ол.

1987 жылы оқуын тамамдаған Мән­шүк Сұрағанқызы шалғайдағы Ти­­мирязев ау­данында 15 жыл таба­ны тапжылмай қызмет істесе, облыс ор­та­лығындағы Қазақстан Консти­ту­ция­сы көшесіндегі стоматологияда ауысқанына да 20 жыл болып қа­лып­ты. Бүгінде тіс емдеумен айна­лы­­сып келе жатқанына 35 жылдан ас­қан стоматолог Мәншүк Шуда­баева­ға те­ріскей жұртшылығы тек риза­шы­лық­тарын білдіреді. Білікті тіс дә­рі­герінің ұлы да анасының жо­лын қуып, сто­матолог мамандығын таң­даған.

– Қызым – экономист. Астанада қызмет етеді. Ал, ұлым Олжастың стоматолог болып жұмыс істегеніне 8 жылдан асты. Білікті маман имп­лант салудың жаңа әдіс-тәсілін жете меңгерген. Бала күнінен үйде естіп-көргені 32 тістің әңгімесі болса қалай дәрігер болмасын? Бір қызығы, ол осы мамандыққа жастайынан өзі қы­зығушылық танытатын. Сондық­тан әңгімеміздің басым бөлігі емшілік тақырыбы төңірегінде өрбитін еді, – дейді Мәншүк Сұрағанқызы.

Тіс ауруларын емдеудің қыр-сырын жетік меңгерген Мәншүк Шу­дабаева стоматолог маманның бо­йын­да жауапкершілік, мұқиятты­лық, байсалдылық, шыдамдылық пен ең­бексүйгіштік сияқты қасиеттер бо­луы тиіс дейді. Стоматолог ма­ман­дығы – әлем бойынша мәртебелі мамандықтардың алдыңғы қатары­на кіреді. Бұл сала Қазақстанда жақ­сы дамып келеді. Елімізде соңғы үлгі­дегі техникамен жабдықталған клиникалар күн санап көбейіп жа­тыр. Жас мамандарға стоматолог бо­лып жұмысқа тұру қиын емес. Тек өзі­не сенімді және жаңашылдықты тез игеруге құштарлығы болғаны жөн.

– Әр саланың өз ерекшелігі бо­лады. Дәрігер болу дегеніміз – па­циенттерге сапалы кәсіби көмек көрсету үшін үздіксіз оқу және біліктілікті арттыру, өздігінен білім алу, инновациялық технологиялар трендінде болу. Өз басым әлі күнге мамандығыма ғашықпын. Күнде жа­ңа дүниені үйренесің, білім-тәжі­рибе жинақтайсың. Жұмыс барысында түрлі қызықты оқиғалар болып жата­ды. Мамандар күнделікті бір-бірімізбен тәжірибе алмасамыз. Жалпы дәрігер – өмір бойы ізденетін ма­мандық. Қазір бәсекелестік көп, үне­мі өзіңді жетілдіріп, қазіргі заманғы технологиямен жұмыс істей білуді үйрену қажет. Осы ретте түрлі се­минар-вебинарларға қатысамыз, клиникаларда шеберлік сағаттары өткізіледі. Әр мамандықтың өз қиындығы болады. Алдымызға ке­летін әр пациенттің өз мінезі бар, сон­дықтан стоматолог мықты психо­лог та болуы тиіс. Адамды өзіңе жа­қын тарта білсең, кез келген жанмен ортақ тіл табысуға болады. Осылай­ша арада сенім пайда болса, па­циентте еш қорқыныш, емдеу бары­сында артық мәселе де туында­майды, – дейді стоматолог.

Жасыратыны жоқ, соңғы жылда­ры тіс ауруы да жасарып кетті ғой, әңгіме барысында осы мәселеге де тоқтала кетуін сұраған едім.

– Ауыз қуысын күніне екі рет тазалап тұру керек. Жарты жылда бір рет тіс дәрігеріне қаралып тұру қа­жет, тісіңіз сау болса да, профилак­тика артық етпейді. Одан кейін жаңғақты тіспен шағу, бөтелкені тіспен ашу дегеннен мейлінше аулақ болған жөн. Суық пен жылының да тепе-теңдігін сақтаған жөн. Тісім ауырмаса, стоматологқа бармауға болады дейтіндерге айтарым, ауыз қуысындағы тістің бұзылуы процесі бастапқыда ешқандай белгі бермеуі де мүмкін. Бастапқы кезде тісті емдеу оңай әрі арзан. Бұрынғы заманнан қалған стереотиптік миф бар, тіс дәрігеріне бару қатты ауыр­сыну дегенді білдіреді деген. Қазір заманауи технологиялар мен мүм­кіндіктердің арқасында тісті емдеу ауырмайтындай етіп жүзеге асыры­лады. Уақытылы күтім жасау дағды­ға айналғанда ғана табиғи тісті сақ­тап қалуға болады, – дейді маман.

Рабиға ЕРАЛЫ,

“Soltüstık Qazaqstan”.

Әлеуметтік желілерде бөлісіңіз:

Share on facebook
Facebook
Share on telegram
Telegram
Share on whatsapp
WhatsApp