Soltüstık Казахстан
“Әлеуметтік медициналық сақтандыру қоры” облыстық филиалы Петропавл қаласының стоматологиялық клиникаларына баспасөз турын ұйымдастырды. Шарада тұрғындарға міндетті әлеуметтік медициналық сақтандыру аясында тегін стоматологиялық көмек алу жайы түсіндірілді.
2023 жылы 26 ұйым халыққа стоматологиялық көмек көрсетеді. Олардың қатарында мынадай 18 мемлекеттік және 8 жеке клиника бар: “Кенжетаев клиникасы”, “Юди-дент”, “МД-дент”, “Данара”, “Стоматология”, “Рус-дент”, “Рус-дент плюс”, “Денсаулық” және тағы басқалары. Облыста және бүкіл Қазақстан Республикасында стоматологиялық көмек көрсететін медициналық ұйымдардың тізімін fms.kz ресми сайтынан табуға немесе емхананың өзінен білуге болады.
– МӘМС жүйесіндегі стоматологиялық қызмет әзірге барлығына бірдей қолжетімді емес. Олардың қызметін халықтың белгілі бір әлеуметтік осал санаттары ғана пайдалана алады. Күнделікті стоматологиялық көмек балалар мен жүкті әйелдерге ғана көрсетіледі. Жедел ауырсыну кезінде дәрігердің көмегіне зейнеткерлер, мүгедектер және оларға күтім жасайтын жұмыс істемейтін адамдар, соның ішінде мүгедек балалар немесе бірінші топтағы мүгедектер, әлеуметтік маңызы бар және жұқпалы аурулары бар науқастар, көп балалы аналар, атаулы әлеуметтік көмек алушылар жүгіне алады. Бұл ретте стоматологиялық қызметті пайдалану үшін жолдама алудың қажеті жоқ, – дейді “Әлеуметтік медициналық сақтандыру қоры” облыстық филиалының директоры Лариса Гордеева.
Стоматологиялық клиникалар амбулаториялық негізде консультациялық-диагностикалық қызметтерді ұсынады. Мұнда пломба қойдыртуға, анестезия алуға болады. Сонымен қатар стоматологиялық көмек қажетті құрал-жабдықтар мен мамандары бар тіркеме орнындағы емханаларда да көрсетіледі. Ал мұнда тек осы емханаға тіркелген азаматтар ғана емес, басқа жерде тіркелгендер де медициналық көмек ала алады. Ол үшін тізілім арқылы кездесуге жазылу керек.
Медициналық көмек толық көрсетілмеген немесе бас тарту болған жағдайда емхананың пациенттерді қолдау қызметіне немесе Медициналық сақтандыру қорына хабарласу қажет.
– Біз медициналық сақтандыру қоры есебінен 18 жасқа дейінгі балаларға және жүкті әйелдерге, Ұлы Отан соғысы қатысушыларына, зейнеткерлерге, 1, 2 және 3 топтағы мүгедектерге, “Күміс алқа” және “Алтын алқа” иегерлеріне, атаулы әлеуметтік көмек алушыларға “Міндетті әлеуметтік медициналық сақтандыру туралы” Заңға сәйкес тегін қызмет көрсетеміз. МӘМС жүйесінде жоспарлы стоматологиялық көмек 18 жасқа дейінгі балаларға және жүкті әйелдерге көрсетіледі. Олар анестезия, терапевтік қабылдау, пульпит, периодонтит, гипоплазия, флюороз кезінде тістің анатомиялық формасын толық функционалды қалпына келтіру, тісті жұлудың хирургиялық әдістері, еріннің, тілдің френальды бөлігінің пластикалық хирургиясы, жақ рентгенографиясы және анестезия сияқты қызметтерді жоспарлы түрде ала алады, – дейді “Облыстық стоматологиялық емхана” директорының орынбасары Елена Алишева.
Рабиға ЕРАЛЫ,
“Soltüstık Qazaqstan”.