![](https://soltustikkaz.kz/wp-content/uploads/2022/12/Диас-300x300.png)
Диас Аяған
Атақты жырау, даңқты қолбасшы Қожаберген Толыбайұлының 360 жылдық мерейтойына орай С.Мұқанов атындағы облыстық ғылыми-әмбебап кітапханада “Қожаберген жырау – аты әйгілі ірі тұлға” атты ғылыми тәжірибелік конференция өтті. Шараға университет ғалымдары, өлкетанушылар, оқушылар мен студенттер қатысты.
Мұнда жиналғандар дауылпаз жырау, қаһарман қолбасшы, көрнекті қайраткер, шешен Қожабергеннің өмірі мен шығармашылығы тақырыбында сөз қозғап, ақын мұраларын насихаттау, оның ерен тұлғасын ұрпаққа үлгі ету мәселелерін көтерді. М.Қозыбаев атындағы Солтүстік Қазақстан университетінің профессоры Зылиқа Бимақанова “Қожаберген батыр, “Елім-ай” тарихи дастаны” тақырыбында баяндама жасады.
– Қожаберген Толыбайұлы тарихымызда сегіз қырлы, бір сырлы тұлға ретінде сипатталады. Қазақтың елдігі жолында ерен еңбек сіңірген ардақты тұлғалардың өмірлері еліміз тұғырлы тәуелсіздікке қол жеткізген жылдардан бастап ерекше зерделене бастады. Академик Манаш Қозыбаевтың: “Қожаберген көп қазақ батырларының бірі емес, бірегейі” деп баға беруі бекер емес. Ең алғаш жырау тұлғасы жайлы үлкен шара 2000 жылы Манаш Қозыбаевтың ұйымдастыруымен Қызылжарда өтті. Салық Зиманов, Бекет Тұрғараев сынды заңгерлер де бұл іске зор үлес қосты. Биылғы мерейтой аясында осының бәрі қайта жаңғырып, зерттеулер жалғасын табуы керек, – деді ғалым.
Университет профессоры Жанар Таласпаева “Қожаберген шығармаларының көркемдік ерекшелігі”, облыс орталығындағы ардақты тұлғаның есімімен аталатын №6 мектептің мұғалімі Роза Елеусізова “Қожаберген жырау поэзиясындағы ұлттық құндылықтар”, Мағжан Жұмабаев атындағы ІТ мектептің мұғалімі Бақытжамал Қанафина “Қожаберген жырау мұрасы өскелең ұрпаққа үлгі” тақырыбында баяндамалар жасады. “Асыл мұра” орталығының жетекшісі Ахметжан Қуантаев, жазушы, журналист Жақсыбай Самрат, еңбек ардагері Жапар Бәриұлы жиналған жастарға тарихымызды танып, тұлғаларымызды ұлықтаудың маңызы туралы айтты.
Ақын Аманжол Зағыпар мерейтой иесіне арнаған өлеңін оқыса, дарынды оқушылар Ілияс Шаяхметов, Саида Изатова, Анел Бейбіт жырау жырларын нақышына келтіре орындады.
Диас АЯҒАН,
“Soltüstık Qazaqstan”.