Облыстық төтенше жағдайлар жөніндегі департаментінің бастығы Рамиль Камалов Тимирязев ауданында болып, Шағалалы өзеніндегі жағдайды бағамдады. Мониторинг барысында су қоймасының жұмыс кестесі, техникалық жағдайы тексеріліп, алдағы уақытта өзенге құйылатын су көлемі болжанды.
Құтқарушылардың сөзінше, егер өзен суының деңгейі көтеріліп, жергілікті тұрғындардың үйлерін су басу қаупі төнген жағдайда мұнда арнайы техника көмекке келеді. Сондай-ақ облыстың бас құтқарушысы Тимирязев ауданы әкімінің орынбасары Евгений Худяковпен бірге төтенше жағдай орын алуы ықтимал Дмитриевка, Степное, Мичурино, Ақсуат, Дзержинское ауылдарын аралап, жергілікті тұрғындармен тілдесті.
Рамиль Камалов Степное және Ақсуат ауылдарындағы тұрғызылған қорғаныс қамалдарының жай-күйін көріп, елді мекендерге апарар грейдерді көтеру жұмыстарын назардан тыс қалдырмады. Мұндай құрылыстар далада еріген қар суының ауылдарға кіру қаупін сейілтеді. Сондай-ақ ол Дмитриевкадағы су арықтарын тазарту үшін қолданылатын техниканың жұмысын бақылады. Бүгінгі күні Степноеда кәріз желілері толыққанды тазартылған. Бұл өз кезегінде еріген қар суының кедергісіз өтуіне септігін тигізетіні анық.
Департамент бастығы республикалық, облыстық және аудандық маңызы бар жолдарда су өткізу арналарының қоқыстан тазартылғанына көз жеткізді.
– Күн күрт жылынып кетті. Ауа райын болжайтын мамандар алдағы күндердің де шуақты болатынын айтуда. Бұл өңірдегі бірқатар елді мекенді су басуы мүмкін деген болжамымызды растай түседі. Тұрғындар зардап шекпеуі үшін қажетті жұмыстардың барлығы атқарылуда. Техникалар да сақадай-сай тұр, – дейді Рамиль Камалов.
Сәкен АҒЗАМОВ,
облыстық төтенше жағдайлар жөніндегі департаменттің бөлім бастығы.