Soltüstık Казахстан
Ұлттық ұлан академиясында тәжік-ауған шекарасында ерлікпен қаза тапқан жауынгерлерді еске алуға арналған шара өтті. Жиынға қатысқан білім ордасының ұжымы, ардагерлер мен курсанттар ерлікпен қаза тапқан сарбаздарды бір минут үнсіздікпен еске алды.
Тәжік-ауған шекарасындағы аймақтың тыныштығын күзетуге 1992-2001 жылдар аралығында біздің елден он мыңға жуық сарбаз бен офицер қатысқан деген дерек бар. Өкінішке қарай, содырлармен болған қақтығыстың салдарынан 46 жауынгер қаза тауып, 100-ге жуығы түрлі жарақат алған.
– Еліміздің сарбаздары Тәжікстандағы Таулы Бадахшан жеріндегі өздеріне тапсырылған шекара бөлігін күзету міндетін абыроймен атқара білді. 7 сәуір күні Пшихавр шатқалында Қазақстан Ішкі әскерінің жетінші құрама ротасы содырлардың тұтқиылдан жасаған шабуылынан от пен оқтың құрсауына түсіп қалды. Жаудың күші басым болған ұрыста 17 әскери қызметші оққа ұшып, 33-і жараланды. Ауған жағынан шабуыл жасаған содырлар бір сағаттың ішінде Тәжікстан аумағына өтіп кетуді жоспарлаған еді. Алайда қазақстандық жауынгерлер жойқын тойтарыс беріп, бес сағаттық қарулы қақтығыстан кейін шабуылшылар кері шегінуге мәжбүр болды, – деді Ұлттық ұлан академиясының бастығы, полковник Артур Тоқышев.
Шара барысында “Тәжік-ауған шекарасындағы жауынгерлік қимылдар мен әскери қақтығыстар ардагерлерінің одағы” республикалық қоғамдық бірлестігі облыстық филиалының төрағасы Асқар Жәменов пен Тәжікстан Республикасынан келген курсант Мухрулои Бахром сөз сөйлеп, ержүрек жауынгерлердің ерліктері ұмытылмайтынын айтты. Петропавл қаласындағы №12, 13 және 14 мектептердің жоғары сынып оқушыларына елді сүюдің, Отанға адал қызмет етудің маңызы түсіндірілді. Іс-шара жеке құрамның салтанатты шеруімен аяқталды.
Олжас ӘДІЛБЕК,
Ұлттық ұлан академиясының баспасөз хатшысы.