Soltüstık Казахстан
Биыл елімізде тұңғыш рет республикалық шахмат челенджі өтті. Бұл шараны жергілікті жерлерде құзырлы органдар мен білім беру мекемелері ұйымдастырды. Еліміздің барлық аймақтарында 2-11 сынып оқушылары арасында бір уақытта өткен шараға қала мектептері белсене қатысты.
Облыс орталығындағы әл-Фараби мектеп-лицейінде оқушылар, ата-аналар және педагогтар арасында сайыс өтті. Шахмат ойнауға үш тараптың да қызығушылығы зор болды. Шахмат – адамның ақыл-ойын дамытатын ойын. Челендждің басты мақсаты – оқушылардың ой-өрісін кеңейтіп, белсенділігін арттыру, логикалық ойлау, есте сақтау, аңғарымпаздық пен зейінін дамыту. Оған қоса, балалардың бойында табандылық, төзімділік, ерік-жігер, сабырлылық, өз қабілеттеріне деген сенімділікті дамыту да аса маңызды.
Ойын ФИДЕ ережелеріне сәйкес өтті. Командалар арасындағы жарыс тартысты болып, соңында жеңімпаздар тобы анықталды.
– Шахмат ойыны өте пайдалы. Біздің мектепте шахмат үйірмесі жұмыс істейді. Оған 30 шақты бала қатысады. Әр жұма сайын шахмат сабақтары өтіп тұрады. Келешекте осындай іс-шаралар көптеп ұйымдастырылады. Бұл оқушылардың ойынға деген қызығушылығын арттырары сөзсіз, – деді әл-Фараби мектеп-лицейі директорының орынбасары Нұрқан Қамзин.
Әдия ТАСБОЛАТ,
“Soltüstık Qazaqstan”.