Soltüstık Казахстан
Біздің өңірден Парламент Мәжілісіне депутат болып сайланған жерлесіміз Еркебұлан Мәмбетов өңірді газдандыру мәселесін көтерді. Премьер-Министрдің бірінші орынбасары Роман Склярға депутаттық сауал жолдаған халық қалаулысы Қызылжар өңірін табиғи газбен қамтуды жеделдетуді ұсынды. Бұл мәселе жиырма жылдан бері көтеріліп келгенімен, Үкімет тарапынан әр-түрлі себеппен қолдау таппағанын айтты.
“Президент Қасым-Жомарт Тоқаев 2021 жылғы 17 маусымда еліміздің газ саласын дамыту мәселесі жөнінде өткізген кеңесте солтүстік өңірді толық газдандыру “Сарыарқа” магистральді газ құбырын жалғастыру немесе Ресей газ тасымалдау жүйесіне қосылу арқылы жүзеге асыруға болатындығын айтып, Үкіметке өңірлердің әкімдерімен бірлесіп, жақын арада таңдау жасауға тапсырма берген болатын. Алайда содан бері бір жарым жылдан астам уақыт өтсе де, Үкімет бұл маңызды мәселе бойынша нақты шешім қабылдаған жоқ. “Қызылорда – Жезқазған – Қарағанды – Теміртау – Астана” бағытында 1061 шақырымға созылған “Сарыарқа” магистральді газ құбырының 1-ші кезеңі бір жылдан астам уақыт ішінде салынып, пайдалануға берілді. Ендеше, екі еседей қысқа келесі кезеңінің құрылысын да барынша жеделдетуге не кедергі?” – делінген депутаттық сауалда.
Депутаттық сауалда атап көрсетілгендей, жобаны іске асыру солтүстік өңір тұрғындарының өмір сүру сапасын арттырып, экономиканың қарқынды дамытатыны және экологиялық ахуалды жақсартатыны сөзсіз. Сонда оңтүстік өңірлерден қоныс аударушылар мен шет мемлекеттерден көшіп келіп жатқан қандастар үшін өңірдің тартымдылығы артып қана қоймай, жергілікті тұрғындардың кері көші-қонын да азайтып, облыстағы демографиялық жағдайды тұрақтандыруға оң әсерін тигізері анық.
Өмір ЕСҚАЛИ,
“Solstüstık Qazaqstan”.