Soltüstık Казахстан
Биыл облысқа жұмыс күші артық өңірлерден 2660 адамды және 138 қандасты көшіру жоспарланып отыр. Бұл туралы облыстық жұмыспен қамтуды үйлестiру және әлеуметтiк бағдарламалар басқармасының басшысы Ринат Елжасов өңірлік коммуникациялар қызметі де өткен баспасөз мәслихатында айтты. Сондай-ақ азаматтардың жекелеген санаттарына мемлекеттік қолдау көрсету бойынша атқарып жатқан жұмыстарын баяндады.
Былтыр квотаға сәйкес өңірімізге 2556 адам немесе 681 отбасы көшіп келген. Еңбекке қабілетті 974 адамның 820-сы жұмысқа орналастырылыпты.
– 652 адамға тұрақты жұмыс орны табылса, 168 адам кәсіпкерлікпен айналысуға бел буды. Оның ішінде 111 азаматқа 136 млн. теңге қайтарымсыз грант пен несие берілді. Келгендердің 1252-сі – бала. Араларында 66 студент пен 63 зейнеткер бар. 201 әйел бала күтімі бойынша демалыста отыр, – деді Ринат Елжасов.
Бағдарлама биыл да жалғасын таппақ. Бүгінгі таңда қоныс аударушыларды қабылдайтын елді мекендердің тізімі бекітілген. Келген азаматтарға материалдық көмек көрсету, оның ішінде көшуге және тұрғын үйді жалға алуға субсидиялар төлеу тетіктері қарастырылған. Тұрғын үй сатып алу немесе құрылыс жүргізу үшін экономикалық ұтқырлық сертификаты не болмаса 4 млн. теңгеге дейінгі мөлшерде ипотекалық тұрғын үй қарыздары бойынша бастапқы жарна беріледі.
Жыл басынан бері облысқа 148 отбасы, яғни 483 адам қоныс аударған. Олардың 3 пайызы – Астана қаласынан, 26 пайызы – Түркістан облысынан және 11 пайызы – Шымкент қаласынан келген.
Шетелдерден көшіп келіп жатқан қанқандастарымыз да аз емес. Биыл 25 отбасы Қызылжар өңіріне көш басын бұрыпты. Дәлірек айтсақ, Ресейден 18 отбасы, Моңғолиядан 3 отбасы, Ираннан 2 отбасы, Өзбекстаннан бір отбасы және Қырғызстаннан бір азамат солтүстікқазақстандықтардың қатарына қосылды.
– Еңбек және халықты әлеуметтік қорғау министрлігімен бірлесіп 2023-2025 жылдарға арналған қоныс аударуды ынталандыру жөніндегі жол картасы әзірленді. Жол картасы аясында 3 жыл ішінде мемлекеттік қолдау шараларын көрсете отырып, 8 мыңнан астам адамды көшіру жоспарланған. Осы жылдар ішінде барлығы 3 мыңнан астам жаңа жұмыс орнын құра отырып, 11 инвестициялық жобаны іске асыру міндеті тұр, – деді басқарма басшысы Ринат Елжасов.
Өз ісін дөңгелеткісі келетін азаматтарға да мүмкіндік кеңейген. Басқарма былтырдан бастап “Бастау-Бизнес” кәсіпкерлікке оқыту курстарын онлайн-режімде ұйымдастырып жатыр. Оқуды сәтті аяқтағандар қайтарымсыз грант немесе несие алады. Үстіміздегі жылы грант мөлшері 1 млн.380 мың теңгеге жетті.
Басқарма мамандарының көмегімен былтыр 605 адам жұмысқа тұрғызылса, 444 адам тұрақты жұмыс орнын тапқан. 97 адам уақытша жұмысқа орналасыпты. Курстар мен оқытудан 19 адам өтті және бизнес-идеяларын іске асырғысы келген 45 азамат аз қамтылғандар санатында грантқа ие болды. Атаулы әлеуметтік көмекті былтыр 8914 адам алса, биыл 9700 азаматқа берілмек. Бұл мақсатқа 787,3 млн. теңге қарастырылған. Бұл – табысы кедейлік шегінен төмен азаматтар санын азайтудың амалы.
Гүлгүл ҚУАТҚЫЗЫ,
“Soltüstık Qazaqstan”.